1 Tes 2:19 - Musamu Wamubwete 2013

¹⁹ Mukwongo, beenu luri nsiitu yeetu, kiminu kyeetu, bunu pe lukoongolo lweetu lwa ndulukulu, ha busu bwa Mfumu yeetu Yesu mu ntaangu ya nyisulu yaandi.

1 Tes 2:19 ပူးပေါင်းရင်းမြစ်များ

Musamu wamubwete watina Matayi 16:27

Mukwongo, Mwaana muutu weki mu kwiisa mu munkeembu wa taayi dyaandi, kintwaari na bambasi baandi; haho, nde kabvutula kuri muutu-muutu, bunu buri biyiriki byaandi.

Musamu wamubwete watina Malako 8:38

Mukwongo, wunde wuba na nsoni mu me, na mu maampu maami, mu kiseendu kimaki, kya kimpala na kya masumu, lo Mwaana muutu se, ha kakwiisa nde na bambasi bangisi mu nkeembu Taayi dyaandi, sa kamumwiina nsoni.»

Musamu wamubwete watina Yowane 21:22

Yesu wabvutula kuri nde ti: «Mbuti me ntiiri ti kanamitina kuba natee ku nyikwiisa me, lo ye nki wubakila? Ye ngo wuri, nama me!»

1 Kol 15:23

ngo muutu-muutu ha kibeendu kyaandi, Kiristo ngo watete, tumi bari mu Kiristo, mu ntaangu ya nyisulu yaandi.

1 Kol 4:5

Hango, yaa lutsuundisa muutu ko, tekesele ntaangu yitubuka, natee Mfumu wiisiri. Nde mbasi-tsuku wuyaabisa mansweeki mari ku mampimbisi, na kusoongo bitsimi bya mitima. Haho, mpisi muutu kataambula masiiku kuri Nzaambi.

2 Kol 1:14

bunu bu lumwaabakula kwa ndaambu, ti beetu turi kimweese kya beenu, bunu bu luba beenu se kuri beetu, mu kiluumbu kya Mfumu yeetu Yesu.

Mukaanda kuri bari Filipo 2:16

bu luri lwakaangama mu maampu ma mwooyo. Mu mimyo me nyiba na kimweese mu kiluumbu kya Kiristo, bukuri me nyasii kudzumuna kwa buunu ko, na nyasii mono mpasi kwa buunu ko.

Mukaanda kuri bari Filipo 4:1

Mu didyo, bampaangi baami ba mutima, ba ntiiri kwalaka, beenu luri kiminu kyaami na lukoongolo lwaami; ngo banduku ba mutima, beenee na keketee mu Mfumu.

1 Tes 2:20

Mukwongo, beenu luri nkeembu yeetu na kiminu kyeetu.

1 Tes 3:13

Hemese nde kakumisa mitima myeenu, mpisi heki beenu luba bangisi na bahele maseembu ha busu bwa Taayi dyeetu Nzaambi, mu ntaangu ya nyisulu Mfumu yeetu Yesu kintwaari na bangisi baandi bobanso. [Amene].

1 Tes 4:15

Mukwongo, mi turi mu kuleele beetu, bunu buri maampu ma Mfumu, mimami: beetuneenu tuba twakiri mwooyo natee mu nyisulu Mfumu, ka tuba ku mankula ma babo bafwa ko.

1 Tes 5:23

Hemese Nzaambi ya kiyeengi nde-meene, kalusa bangisi mu kiteesu kyakuka, na bumuutu bwa beenu bwobunso, kiluunsi, muheebulu na nyutu, biba byakebu kwahele maseembu, mu nyisulu Mfumu yeetu Yesu Kiristo.

2 Tes 1:4

Hango-nkuumbu, beetu turi na kimweese mu beenu ha kakati dya mabuundu ma Nzaambi, mu ntoono kifiki kyeenu na kanyi dyeenu, kunsa nkwamusunu dzeenu dzodzinso, na manyoongi ma luri mu kwekuunda.

2 Tes 1:7

na kaha mpuumunu, kuri beenu luri mu kwemono manyoongi, na kuri beetu. Mimyo mbasi-tsuku sa myaba ha monokono Mfumu Yesu mu mayulu na bambasi ba mpinu dzaandi,

2 Tes 2:1

Ngo mu mitariri nyisulu Mfumu yeetu Yesu Kiristo, na kukutukuna kuri nde, bampaangi, beetu tululoombo ti:

Mukaanda kuri Tito 2:13

mu kwekiingila nsiitu yayibwete, na monokunu nkeembu ya Nzaambi wadzaangama, na ya Mubvuukisi weetu Yesu Kiristo.

Mukaanda wa Yakobo 5:7

Ngo bampaangi, kiinduseenu mitima, natee nyisulu Mfumu. Monee muhati-manseke, nde wukiingila bimbutu bya butoto bya ntalu, wukiindisaa mutima natee ku katoriri bimbutu bitekesele na bisyeelele.

Mukaanda wa Yakobo 5:8

Beenu se kiindusee mitima, kumisee mitima myeenu, bukuri nyisulu Mfumu yeki bebele.

1 Pet 5:4

Tumi ha monokono mukuutu batari, beenu lutaambula lukoongolo lwa nkeembu luri lwabiiya ko.

2 Pet 1:16

Mukwongo, kari mu kwenama bimpa byabalu mu madyeele ko, beetu turi twaluyaabisila mpinu na monokunu ya Mfumu yeetu Yesu Kiristo, ngo beetu-meene, twaba bambaangi bamono mu miisu bunene bwaandi.

2 Pet 3:4

na kweleele ti: «Lusiilulu lwa nyisulu yaandi buri luri kuyirima pe? Mukwongo, kipilu kya fwiiri bakuutu, momanso mari bunu, bwaba mu mbandukulu nyirikulu bitotolo byobinso!»

1 Yow 2:28

Na mu lumalu, mwaa-baala, seenee kikuundi mu nde. Mpisi heki, mbuti nde monikini, lo tubeeneenu na nsiitu, na tuhelee kufwa nsoni la na nde, mu ntaangu ya nyisulu yaandi.

Mukaanda Yuda 1:24

Kuri wunde wakuka mu kulukebe kwahele kubumuna makya, na kulutelemese ha busu bwa nkeembu yaandi, kwahele maseembu, kunsa nyeense,

Nyabusulu ya Yowane 1:7

Mono, nde wuri mu kwiisa mu matuti, mpisi muutu sa kamumono, na babo bamutobiri dyoongi. Makaanda momanso ma ha butoto sa makoto mu manyoongi mu ntoono nde. Heehe! Amene!

Nyabusulu ya Yowane 22:12

«Mono, me nyiri mu kwiisa mu mawasu na museendu waami, mu kubvutula kuri muutu-muutu bunu buri biyiriki byaandi.