Yosua 18:1 - Alkitab Duri

¹ Ia tonna mangkamo to-Israel rrampai to tana mangka Nabasseanni Puang Allataala, sirempun ngasanmi to umma' Israel jio kota Silo, napake'dehhi jio to Tenda Kasitammuan.

Yosua 18:1 ပူးပေါင်းရင်းမြစ်များ

Jamanna Rasulu' 7:45

Sitarruhna nabawa tooi, tonna solanni Yosua male parari mpassialaii tee tondokkota' jio mai kuasanna bangsa laen to naula'i Puang Allataala jio mai olona. Ia joo tenda jioi tangnga-tangngana to-Israel ratu lako kaparentanna Raja Daud.

Yosua 18:2

Ia joo wattu denpa pitu suku to-Israel to te'dapa tawana tana manah.

Yosua 18:8

Ia tonna la malemo to todipilei napatujui Yosua jolo' nakua, “Malemo kamu' ngkitai joo tana, miuki'i to anggena, mimane' pole mpauanna', kumane' nnundii inde' kota Silo, nadiissen umbonna to tana Napattantuan kamu' PUANG Allataala la miputawa.”

Yosua 19:51

Susimi joo Imang Eleazar, na Yosua anakkana Nun, sola sininna tomatua-tua to-Israel mpeta'da pangpatujun-Na PUANG Allataala ntawa tana mpake undi, naditawan suku to-Israel jio kota Silo jio olo Tenda Kasitammuan PUANG Allataala. Susimi joo mangkaii ntawa tana.

Yosua 22:12

Ia tonna sa'dingngi joo, sirempunmi sola ngasan jio kota Silo namangngatta la male rrarii suku to-Israel to mangpadang jio kadellekanna Sa'dan Yordan.

Yosua 22:19

Ia ke misanga carepai to kampongmi, misangai kumua te'da nasipato' minii ssompa Puang Allataala, mellele bangmo kamu' tama tana-Na PUANG Allataala to nanii Tenda-Na. Wa'ding kamu' nnalai pira' to padangki' minii torro, danggi'mo miewa PUANG Allataala, ba'tu danggi' miewakan mimpake'deh pole' mesa' ngenan pangkaroban, na miissen kumua denmo ngenan pangkaroban lako PUANG Allataala to tasompa.