Yakub 3:13 - Alkitab Duri

¹³ Denraka tomacca na mandalan tangngah lan tangnga-tangngami? Ia ke denni, la mpamajiong kalena mpugauk panggaukan melo susi to napugauk tomacca. Iamo joo la mpangpekitanni kumua macca tongan ia.

Yakub 3:13 ပူးပေါင်းရင်းမြစ်များ

Daniel 2:21

Iamo mpattantu sininna wattu. Ia toomo nnangka'i sola mpasoro'i to tomakuasa. Ia toomo mbenni kapaissenan sola kamapahangan lako tomacca.

Matius 11:29

Turu'i to parenta-Ku', mipelajahhii to pangngajaran-Ku', nasaba' Aku' tee te'da kulassussai kamu', te'da kamu' to la kukita majiong, milolongan kamasannangan.

Matius 21:5

“Pauanni to-Yerusalem kumua, Ee, ratumi to Rajami. Mpamajiong penawanna ssakei keledai, mesa' keledai lundara.”

Matius 5:5

Masannang to tau mpamajiong penawanna, nasaba' la nnampui Lino Baru.

Matius 7:24

Mangngajahhimi Puang Isa nakua, “Iamo joo, ia to tompesa'dingngii tee kadang-Ku', napugaukki, iamo dipasusi tomandalan tangngah to mpake'deh bolana jao pondasi batu.

1 Korintus 6:5

Liwa' ia mesirisan! Tantu den lan tangnga-tangngami to padammi tomatappa' na paissen, to wa'ding mbicarai joo kara-karami.

2 Korintus 10:1

Den ba'tu pira-pira tau lan tangnga-tangngami ssangana' kumua, baranina' ke sikambelaki', porrokanna' ke sioloanki'. Apa ia tee aku' melo penawangku' na tangmakarrah toona' susi Almaseh meta'dana' lako kalemi kumua,

2 Korintus 8:24

La mipangpekitan to pangpakamoja'mi lako, anna issen ngasanni jamaa kumua tomangpakamoja' kamu', namanassa kumua tongan to apa kipujian kamu'.

Galatia 5:23

mpamajiong penawa, mparenta kalena. Te'da ia atoran agama nnanggaii to panggaukan susi joo.

Galatia 6:1

Ee, tokupusile'to! Ia ke denni mesa' tau diampa' mpugauk dosa, ia to kamu' nturu' Roh Allataala la mipatuju rampa'i joo tau lako lalan kameloan. Apa la mijagai to kalemi danggi' mituru' toda mpugaukki.

Galatia 6:4

Pada la mparessaki' kaleta' kumua, meloraka ba'tu te'daraka namelo to panggaukanta'. Ia ke melomi, mane'ki' wa'ding masannang. Apa te'da tawa'ding mpasibandingngi panggaukanna tolaen,

Efesus 4:2

Danggi' mimatampo, sipangkada rampa' kamu', sisabbarasan kamu' ammisipakamoja' too.

Filipi 1:27

Samari ia to kumua la mituru' tarruh bang to pangngajaran-Na Almaseh. Na moi malena' mati' ba'tu tangmalena' mati', da'tan bang kusa'ding to karebammi kumua mesa' penawa kamu', mipada-pada mpengkulleii anna buda tau matappa' lako Kareba Kasalamatan,

Kolose 3:12

Napakamoja' kamu' Puang Allataala na mangkamo kamu' napilei menjaji tau mesan-Na. Iamo joo la sikamasean kamu' padammi rupa tau, melo penawa, danggi' matampo, mangkada rampa' lako tau, sola sabbara' kamu'.

1 Timotius 4:12

Danggi' naden mesa' tau ntunaiko, nasaba' kallolopoko, apa la menjajiko palelean mata lako tomatappa' ke mangkadako, ke messipa'ko, ke mangpakamoja'ko padammu rupa tau, ke matappa'ko, mujagai kalemu anna te'da caccana.

1 Timotius 6:11

Ee, Timotius! Danggi' mupugaukki tuu lako, sanga taun-Namoko Puang Allataala. Apa la mpugaukroko pakkaeloran-Na Puang Allataala, massompa lako kale-Na, matappa' lako Puang Isa Almaseh, mpakamoja' padammu rupa tau, sabbara' lan kamaparrisan na mpangkadai rampa' tau.

2 Timotius 2:25

na mpangkadai rampa' tobatta'. Dennaa upa' naben unapi wattu Puang Allataala to tau susi joo namengkatoba' jio mai dosana anna issenni to pangngajaran tongan.

Titus 3:2

danggi' pau gaja' tau, danggi' massipura, apa la mabassa na mangkada rampa' too lako sininna rupa tau.

Ibrani 13:5

Danggi' napukaunan kamu' doi', apa pumasannang bangmi to apa miampui, sanga mangkamo napau Puang Allataala kumua, “La kupuinawa tarruhko, te'da kulassalaiko.”

Yakub 1:21

Iamo joo danggi'mo mipugaukki to kabiasan tangmelomi ba'tu panggaukan gaja'mi, mitarima rampa'i to kada natanan Puang Allataala lan penawammi, sanga ia joo kada makuasa mpasalama' kamu'.

Yakub 2:18

Apa mbai den to mangkada kumua, “Den tau matappa' manda, den too tau mpugauk manda panggaukan melo.” La kukua mpebalii, “Pakitanna' umbo nakua to tau matappa' ke te'dai napasiolanan panggaukanna, angkupakitanni panggaukan to mpamanassai kumua den kamatapparanku'.”

Yakub 3:1

Ee, tomala'bihku'! Danggi' mimadoang ngasan bang menjaji guru jamaa. Nasaba' miissen kumua ia to kita' menjaji guru la'bih la dipemaparessaiki' na ia to tangngia guru.

Yakub 3:17

Apa ia to tonnampa' kamaccan pole jao mai, melo te'da caccana, sitarruhna sikabudan tau, mabassa, mangpasipatu, mangkamase, na tuli mpugauk kameloan, te'da narempe' sangbali na te'da too namajekkong.

1 Petrus 1:15

Sibalikanna la messipa' melo kamu' mikaba'cii to kagajatan, susi Puang Allataala to mangka mpilei kamu'.

1 Petrus 2:12

Mbai den tau to tangnturu' Puang to mpau gaja' kamu'. Iamo joo la melo to sipa'mi nakitai tau kumua melo to apa mipugauk. Na undinna naakui kumua melo to sipa'mi anna mpakala'bih Puang Allataala ke ratui rra'tah kara-karana tolino.

1 Petrus 2:9

Apa kamu'mo to bangsa napileimo Puang Allataala, ammimenjaji imangna Raja to mipangjaman. Napupenjaji kamu' bangsa to disarakki jio mai bangsa laen ammimenjaji tau mesan-Na. Napileimo kamu' la mpangpeissenan panggaukan-Na to te'da susinna. Iamo ntambai kamu' messun lan mai kamasolangan, ammimentama kamasannangan to liwa' mejangngaran.

1 Petrus 3:4

Apa sibalikanna, la miangahri to kamaloloan to napapajan sipa' melomi, susinna te'da mikassara' apa massikalino kamu'. Ia to kamaloloan susi joo nakabudai Puang Allataala.