Yahya 8:14 - Alkitab Duri

¹⁴ Mebalimi nakua, “Moi kusa'bii kale-Ku', tongan to kadang-Ku', nasaba' kuissen to kunii ratu, kuissen too to la kunii male. Nate'da miissenni to kunii ratu, ba'tu la kunii male.

Yahya 8:14 ပူးပေါင်းရင်းမြစ်များ

Kada Bulawan 8:7

Tongan ngasan to kupau, kukaba'ci to mpau kada mangnguraga.

Yahya 10:36

matumbai misangana' ncapa' Puang Allataala, ke kukua ‘Anak Allataalana'’? Na Ambe' Ia mpileina' nasuana' tama lino.

Yahya 13:3

Naissen Puang Isa kumua sininna kuasa napaben ngasanmo Ambe' lako kale-Na. Naissen too kumua topole jioi mai Puang Allataala, na la pole lako pole' tooi Ia Puang Allataala.

Yahya 14:10

Te'daraka mumatappa' kumua Aku' memmesa' sola Ambe', na Ambe' memmesa' sola Aku'? Ia to apa kupauan kamu', te'da na Aku' bangra mpaui. Apa Ambe' to da'tan memmesa' sola Aku', Iamo mpugauk ngasanni to apa kupugauk.

Yahya 16:28

Topole jiona' mai Ambe', kumentama lino. Na ia tee too la kusalaimi tee lino, kupole pole' lako Ambe'.”

Yahya 17:8

Kupauanmo kadan-Ta' to mangka tapauanna', na natarimamo. Naissen toomo kumua tonganna' topole jio mai Ambe'. Nakatappa'imo kumua Kita'mo to mangka ssuana'.

Yahya 18:37

Mekutana omi Gubernur Pilatus lako Puang Isa nakua, “Ia ke susii joo, Rajarokoka?” Mebalii Puang Isa nakua, “Susi tuu tapaunna kumua Rajana'. Dijajianna' kumentama lino mesa'ra akkatta-Ku', iamo to la mpamanassa katonganan. Ia to topole jio mai katonganan, napesa'dingngina'.”

Yahya 5:31

Ia ke la Aku' bang mpaui kumua, ‘Ambe' to ssuana'’, te'da mikatappa'ii to apa kupau.

Yahya 8:42

Nakua omo Puang Isa, “Ia ke la Puang Allataala Ambe'mi, la mipakamoja'na', nasaba' pole jiona' mai Puang Allataala. Na ratuna' te'da naeloh-Ku', apa Ia ssuana'.

2 Korintus 11:31

Puang Allataala, Ambe'-Na Puang Isa, nnissenni kumua te'da kumangnguraga. Ia dipakala'bih te'da cappa'na.

2 Korintus 12:11

Sitonganna ia to kupau nena' susimo' tobango', nasaba' mpujina' kaleku'. Apa miparukuna' mpugaukki susi joo, nasaba' kamu'ra to la mpujina'. Na moi nate'da bua'ku', apa te'da lalo nacau'na' tuu mati' tau to ssanga kalena rasulu' te'da susinna.

2 Korintus 12:19

Mbai misangai kumua sininna tee kuukiran kamu' mpangngewankan kaleki' jio olomi. Ee, tokupakamoja'! Puang Allataala ngkitakan kumua sitonganna sininna tee apa kiuki' situru'ra pakkaeloran-Na Almaseh. Na sininna to kiuki' ba'tu kipugauk, la napumawatang kamatapparanmi.

Pengkitanna Yahya 1:5

Ia to Puang Isa sa'bi maruruh. Iamo bungah dipatuo jio mai kamatean. Ia toomo ngkuasai sininna raja lan lino. Napakamoja'ki' namate anna la'paranmiki' jio mai dosata'.

Pengkitanna Yahya 3:14

Nasuana' nakua, “Uki'i susi tee lako malaeka'na jamaa jio kota Laodikia: Ia tee pepasan pole jio mai Aku' to disanga Amin, todikatappa'i, sa'bi maruruh na tongan, garonto'na sininna to apa napaden Puang Allataala.