Yahya 16:11 - Alkitab Duri

¹¹ La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino.

Yahya 16:11 ပူးပေါင်းရင်းမြစ်များ

Matius 12:18

“Iamo tee to pesuro-Ku' kupilei. Iamo tee kupakamoja', to mpamasannangna'. La kuben kapakullean pole jio mai Roh-Ku' Napangpeissenanni to parenta-Ku' lako sininna bangsa.

Matius 12:36

Iamo joo ingaranni: Ia ke Kiama'mi lino pada la napebalii tau to kada tangkebattuanna lako Puang Allataala.

Lukas 10:18

Mebalimi Puang Isa nakua, “Den kukita Ballisi' polloh jao mai langi' susi palepa'.

Yahya 12:31

Nadete'mi wattunna la dira'tah kara-karana tolino. Ia tee too la dica'beanmo lako salean to Ballisi' to ngkuasaii tee lino.

Yahya 14:30

Te'damo nabuda bang la kupauan kamu', nasaba' wattunnami la ratu to Ballisi', to ngkuasai tee lino. Apa te'da nakuasaina'.

Yahya 16:12

Budapa to la kupauan kamu', apa te'dapa mikullei mpahangngi.

Jamanna Rasulu' 10:42

Na Iamo ssuakan mpangpeissenan Kareba Kasalamatan lako tau kumua Iamo naangka' Puang Allataala menjaji tomangra'tah kara-kara lako tolino, la ia totuo unapa, la ia tomatenamo.

Jamanna Rasulu' 24:25

Apa mpatarruhhi kadanna Paulus nakua, “Nang la mpugaukki' kameloan, ntaloi penawa katolinoanta', nasaba' ia ke Kiama'mi lino, la dira'tah kara-karana tolino.” Ia tonna sa'dingmi joo malaja'mi Gubernur Feliks nakua, “Aa, polemoko too! Ianna den wattungku', iapa kutambai pole'ko.”

Jamanna Rasulu' 26:18

mpami'cikki to matanna, ssolanni jio mai kamalillinan lako macerona, lla'paranni jio mai kuasanna Ballisi' lako kuasan-Na Puang Allataala, anna didampangan, namenjaji umma'-Na to napilei Puang Allataala, sanga matappa'i lako Aku'.’ ”

Roma 16:20

Puang Allataalamora, to mben kamasannangan lako tolino, la rro'pokanni to kuasa Ballisi'. Dennaa upa' nabarakka'i kamu' Puangta' Puang Isa Almaseh.

Roma 2:16

Susimi joo to la jaji ke Kiama'mi lino. Ia joo allo, situru' Kareba Kasalamatan kupangpeissenan, nasuai Puang Allataala to Puang Isa rra'tah kara-kara to membuni lan penawanna tolino.

1 Korintus 4:5

Iamo joo danggi' mimadoi' bang mpasala tau kumua tokasalan, ba'tu ntongananni kumua tomelo, sanga te'dapa nadete'i wattunna. Tajanni karatuan-Na pole' Puang, sanga Ia la nnarrangngi to apa membuni. Ia too la mpapajanni to akkattana tolino to nabunianan lan penawanna. Ia joo wattu mane'ri napuji Puang Allataala to tau, to tosipato' dipuji.

2 Korintus 4:4

Ia to Ballisi', to ngkuasaii tee lino, iamo ssamboii tangngahna tuu lako tote'da namatappa', anna te'da nakitai to arrangna Kareba Kasalamatan to napupangngarrang kamala'biran-Na Almaseh to sangrupa bang una Puang Allataala.

Efesus 2:2

Ia joo wattu ia to panggaukanmi susi bang to panggaukanna tolino to tangnturu' Puang, ammituru' Ballisi' jao langi' to mparenta sininna setang. Iamo tatta' ngkuasaii to totangmatappa' lako Puang Allataala.

Kolose 2:15

Nataloi Almaseh jao kaju sitamben to sininna tomakuasa ba'tu tomangparenta jao langi' anna te'damo nakullei mangpanggaukan. Napugaukki Puang Allataala susi joo nanii mpakasiri'i to tomakuasa ba'tu tomangparenta jao langi' anna pasusii to toditalo lumingka jio boko'-Na Almaseh na jolo to Almaseh susi topatalo.

Ibrani 2:14

Ia tuu lako to nasanga anak, tolino ia. Iamo namentolino Puang Isa, anna menjaji susi tuu lako anak. Napugaukki susi joo, dikua anna ia to kamatean-Na wa'dingngi ntaloi Ballisi' to ngkuasai kamatean.

Ibrani 6:2

ba'tu bungah pangngajaran laen susinna to pangjioran, kapanglullungan pala', katuoan pole' jio mai kamatean, ba'tu pangsessa te'da cappa'na.

Ibrani 9:27

Mangka napattantu Puang Allataala, kumua pissenra mate to tolino, namane' Puang Allataala rra'tah kara-karana.

2 Petrus 3:7

Ia to langi' na lino tee too naampai Puang Allataala mpake kadan-Na, arannai nadete' wattunna la dira'tah kara-karana to tolino. Ia joo wattu la disabu'i to langi' na lino nakande api, anna ia to totangmangpesa'ding la disessa na disabu'i.

1 Yahya 3:8

Ia to tompugauk tarruh dosa, napuanak Ballisi', nasaba' ia to Ballisi' iamo garonto'na dosa mammula jiona mai. Iami joo naratumo to Anak Allataala la ssabu'ii to jamanna joo Ballisi'.

Pengkitanna Yahya 1:7

Kitai, la ratumi natalimbung saleu'. La nakitai sininna bangsa lan lino, nasikarrakan, moi to tomangka ndokeii. Nang tongan! Amin.