Yahya 14:12 - Alkitab Duri

¹² La miingaran tee kadang-Ku' kumua, ia to tomatappa' lako Aku', la napugauk to apa mangkamo kupugauk. La'bih matonggo pole'pa ia to la napugauk, nasaba' malena' kutorro sola Ambe'-Ku'.

Yahya 14:12 ပူးပေါင်းရင်းမြစ်များ

Matius 21:21

Mebalimi nakua, “La miingaran tee kadang-Ku' kumua, ia ke matappa' kamu' na te'da mibata, wa'ding kamu' mpugaukki susi tee kupugauk lako tee garonto' kaju ara! Na te'da na ia manda joo, apa wa'ding too kamu' mangkada manda lako joo buntu mikua, ‘Tiangka'ko mutibuang do' tasik.’ Nang la jajinna ia!

Markus 11:13

Nakita mambelami, den garonto' kaju ara membalumbun daunna. Malemi ngkandoppi'i, nasangai den buanna. Apa ia tonna ratumo lako, te'da bang buanna naampa', daunna mandari, sanga tangwattunnapa membua.

Markus 16:17

Ia to tau matappa' la ntarima kuasang-Ku' la mpugauk tanda mejangngaran, nnula'i setang, na mangkada mpake basa to te'da naissenni.

Yahya 14:28

Misa'dingmo kukua, ‘La malena', apa la ratu unapa' lako kalemi.’ Ia ke mipakamoja'na', la masannang kamu' kumale lako Ambe', sanga la'bih makuasa ia to Ambe' na Aku'.

Yahya 16:7

Tongan tee kupauan kamu' kumua, ‘La'bih den bua'na lako kamu' ke polena'’, sanga ia ke la te'dai kupole, te'da nalaratu joo tomangpakatana. Apa ia ke polena', la kusuai ratu lako kalemi.

Yahya 4:37

Tongan tee sambenan kada to kumua, ‘Laen to tomantanan na laen to tomepare.’

Yahya 5:20

Napakitan ngasanna' sininna to apa napugauk Ambe', sanga napakamoja'na'. Na la napakitan pole'pa' tanda mejangngaran to la'bih matonggo ammijangngah.

Yahya 7:33

Ia joo wattu nakua Puang Isa lako tobuda, “Cingga'tu'mora nate'damo tasola, sanga la polemo' lako to tossuana' ratu.

Yahya 7:39

(Ia to nasanga wai katuoan, iamo to Roh Allataala, to la natarima tomatappa' lako kale-Na. Ia joo wattu ia to Roh Allataala te'dapa nadipangben, nasaba' te'dapa nadiangka' to Puang Isa de' suruga.)

Jamanna Rasulu' 10:46

Sanga nasa'ding to tau mangkada mpake mangrupa-rupa basa to nabenni Roh Allataala, mpakala'bih Puang Allataala. Nakuanni Petrus,

Jamanna Rasulu' 16:18

Ba'tu pirang allo masainna metamba-tamba bang susi joo. Ia tonna marossomo Paulus, messailei nakuanni joo setang, “Kuasan-Na Puang Isa Almaseh kupupangngewa, kusuako messun lan mai ntee baine!” Ta'pa messun bang unami lan mai kalena.

Jamanna Rasulu' 19:12

Ianna dibawan tomasaki to saputanganna iarika kaen puramo napake Paulus, malagahhi, napessunni tooi setang.

Jamanna Rasulu' 2:33

Ia tonna pamatandei Puang Allataala napajioi sa'de kanan-Na, nabenni Roh Allataala to Puang Isa susi to dipau jolo, na Iamo mparatuankan joo Roh, susi tee misa'ding sola mikita too.

Jamanna Rasulu' 2:41

Buda tau ngkatappa'ii to pangngajahna Petrus anna dijio'. Kerangngan omi budanna to tomatappa' joo allo agi-agi tallung sa'bu.

Jamanna Rasulu' 4:16

nakua, “Apara la tagaukanni tee tau? Naissen ngasanmo to-Yerusalem kumua mejangngaran tongan ia to apa napugauk. Na tangdiissen mpessakkannii.

Jamanna Rasulu' 4:33

Ia to rasulu', matongko ke mangkadai, mpangpeissenanni kumua tuo pole'mi to Puang Isa, nabarakka'i ngasanni Puang Allataala to tomatappa'.

Jamanna Rasulu' 4:4

Apa ia to mangka mpesa'dingngi pangngajahna rasulu', budai to matappa'. Kerangngan pole'mi to tomatappa' namenjaji agi-agi limang sa'bu muane.

Jamanna Rasulu' 5:15

Susimi joo, to tanda mejangngaran napugauk rasulu', arannai ia to tomasaki dikolong lako randan lalan nadipajao katindoan iarika ampah, dikua na moi bajo-bajona bangra Petrus ngkannai ke nnola jioi, wa'ding napumalagah tomasaki.

Jamanna Rasulu' 6:7

Susii joo laoanna nasatitaleh-talehna to kadan-Na Puang Allataala na sakerangngan-rangnganna too to tomatappa' lako Puang Isa jio kota Yerusalem. Na moi imang buda too memmatappa'.

Jamanna Rasulu' 8:7

Buda tau nanii messun setang. Na ia tonna messunmo, melallak-lallak to tau. Buda too tokupi' sola tokeppang dipamaleke.

Jamanna Rasulu' 9:34

Nakuanni Petrus, “Ee Eneas! Napamalekeko Puang Isa Almaseh. Ke'dehko lulunni tuu ampahmu.” Ta'pa ke'deh bang unami Eneas.

Jamanna Rasulu' 9:40

Nasua ngasanni Petrus messun, namengguntu' massambajang. Ia tonna oloimi joo batang rabukkuna nakuanni, “Ee Tabita, mi'cokmoko!” Ta'pa mpami'cikmi matanna, nami'cok cumadokko tonna kitai to Petrus.

Roma 15:19

Nabenna' Almaseh kuasan-Na Roh Allataala mpugauk panggaukan mejangngaran to tangnadete' akkalan. Susimi joo kupangpeissenanmi to Kareba Kasalamatan, karebanna Almaseh, lako sininna tau, mammula jio mai kota Yerusalem ratu lako tana Ilirikum.