Pengkitanna Yahya 5:9 - Alkitab Duri

⁹ Makkelongngi mpukelong kelong baru: “Sipato'ki' nnalai tapiak tooi to segelna tuu sura' tilulun, sanga mangkamiki' digere' anna ia to rara kamatean-Ta' tapake nnallian tau Puang Allataala jio mai sininna rapu tau, tondok, basa na bangsa.

Pengkitanna Yahya 5:9 ပူးပေါင်းရင်းမြစ်များ

Daniel 4:1

Iamo tee sura'na Raja Nebukadnezar to dikiring lako sininna bangsa, rapu tau na basa lan lino. Nauki' raja susi tee, “Salama' lako kamu', dennaa upa' miampa' buda barakka'.

Daniel 5:19

Matonggo kuasanna, iamo joo nakalaja'i sola nakasiri'i sininna bangsa, simesa'-mesa' rapu tau to mpake mangrupa-rupa basa. Ia ke madoangngi mpatei tau, Napatei bang unamira. Susi too ke madoangngi mpasalama' tau, Napasalama' too. Napamajaoi to to-Nakabudai, Napamajiongngi to totang-Nakabudai.

Daniel 6:25

Napangparentanni raja nadijokko to tau mangka mpangpeasan Daniel, moi anakkana sola bainena nadica'bean ngasan tama lo'ko' singa. Te'dapa narapa' do' litak lan lo'ko' singa to tau, natoangmi singa, napasigaropoanni to bukunna.

Matius 20:28

Susi tee Aku', Anak Mentolino, te'da kuratu tama lino la massua, apa ratura' la menjaji todisua-sua sola la mpangben sunga'-Ku' kumua nadila'bak to tolino jio mai dosana.”

Matius 26:28

Nasaba' rara-Ku' tee, to mpaassah basse-Na Puang Allataala, rara to dipato'do la ndampangan buda tau.

Jamanna Rasulu' 20:28

Njagai kamu' kalemi. Mijagai tooi jamaa to mangka napangben Roh Allataala la mijagai, nasaba' kamu'mo diangka' menjaji tonnatoro' jamaa-Na Puang Allataala. La mijagai melo to taun-Na susi tomangrewa rrewai bembala'na, nasaba' elohnamo Puang Allataala namate Puang Isa dikua nawa'ding lla'bak taun-Na.

1 Korintus 6:20

Mangkamo kamu' naalli putta Puang Allataala. Iamo joo pake meloi to batang kalemi, anna pakala'bihhi tau to Puang Allataala.

1 Korintus 7:23

Danggi'mo mieloran kalemi menjaji kaunanna tolino, nasaba' mangkamo kamu' naalli putta Puang Allataala.

Efesus 1:7

Mangkamiki' nala'bak Puang Allataala jio mai kuasa dosa, battuananna didampanganmiki', nasaba' kita'ra namate to Almaseh.

Efesus 5:19

La sipamasumanga' kamu' makkelong Zabur sola kelong pangpujian, mimakkelong situru' canning atimmi ke sitammu kamu' mpakala'bih Puang.

Kolose 1:14

Iamora tee Anak lla'bakki' jio mai kuasa dosa, battuananna didampanganmiki'.

Kolose 1:23

Apa la tatta' kamu' matappa', danggi' nasitawa-tawa to penawammi. La mirannuan tarruhhi to Puang Allataala kumua la napugaukki to apa nabassean kamu' lan Kareba Kasalamatan to mangka misa'ding. Ia joo Kareba dipangpeissenanmo lako issinna lino. Na ia tee aku' Paulus menjajimo' tompangpeissenanni.

Titus 2:14

Mangkamo Ia mpangkaroban kalena la lla'bakki' jio mai sininna kagajatanta' napupenjajiki' umma'-Na to tangmadosa antatatta' too mpugauk kameloan.

Ibrani 11:14

Ia to tomangkada susi joo mpamanassai kumua nnangngahhi tondok to la nanii mari'pih.

2 Petrus 2:1

Ia to wattu pura diboko', den nabi tangtongan mentialla' lan tangnga-tangngana umma'-Na Puang Allataala. Susi toomi tee too den guru tangtongan la mentialla' lan tangnga-tangngami. Ia to pangngajaranna la mpalao sala na ssolangan tau. Mpessakkannii Puang Isa to mangka lla'bakki jio mai kuasa dosa. Iamo joo madoi' la mparatu kamasolangan lako kalena.

1 Yahya 1:7

Apa ia ke tuoki' situru' pakkaeloran-Na Puang Allataala, mesa' penawamiki' sola padanta' tomatappa', anna ia to rara-Na Puang Isa, Anak Allataala, mpemaceroiki' jio mai sininna dosata'.

1 Yahya 2:2

Iamo karoba to mpasikalinoki' Puang Allataala anna wa'ding ndampanganki' to tomadosa. Na te'da na kita' manda, apa moi sininna tolino.

Pengkitanna Yahya 10:11

Mangkai joo too nasua omo' nakua, “Pangpeissenan omi joo kadan-Na Puang Allataala, to apa la jaji lako sininna tondok, basa, bangsa na raja.”

Pengkitanna Yahya 11:9

Ia to tau jio mai sininna rapu tau, tondok, basa na bangsa ratu ngasan la ngkitai to batang rabukkuna tallung allo sitangnga, na te'da naeloranni dilamun.

Pengkitanna Yahya 13:7

Dieloran too nnewa umma'-Na Puang Allataala nataloii, naparentai to sininna rapu tau, tondok, basa na bangsa.

Pengkitanna Yahya 13:8

La nasompa sininna to totuo lan lino, saliwanna to tomangkamo diuki' sanganna lan Sura' Katuoan tonna te'dapa nadipaden tee lino. Ia to Sura' Katuoan, sura'-Na Anak Bembala' to mangkamo digere'.

Pengkitanna Yahya 14:6

Ngkitana' mesa' malaeka' laen mentia' liwa' tande. Nabawai to Kareba Kasalamatan to te'da cappa'na la dipangpeissenan lako tolino, iamo to sininna rapu tau, tondok, basa na bangsa.

Pengkitanna Yahya 15:3

anna makkelong mpukelong kelongna Nabi Musa, taun-Na Puang Allataala, na kelong-Na Anak Bembala' nakua, “Oo, Puang Allataala! Tomakuasaki', liwa' mala'bih na te'da susinna to panggaukan-Ta'. Rajanaki' sininna bangsa, melo na tongan to panggaukan-Ta'.

Pengkitanna Yahya 17:15

Nakuan toona' joo malaeka', “Ia joo sa'dan mukita to randanna nanii baine bandarang, iamo sininna tobuda, tondok, basa na bangsa lan lino.

Pengkitanna Yahya 4:11

“Oo, Puangki' Puang Allataala to kisompa! Kita' manda to sipato' ntarima passompa, kamala'biran na kuasa. Nasaba' Kita'mo mpaden ngasanni to sininna apa, na den ngasanmo, natuo, nasaba' pakkaeloran-Ta'.”

Pengkitanna Yahya 5:12

makkelong nnandongngi gamaranna nakua, “Ia joo Anak Bembala' mangka digere', sipato' ntarima kuasa, kasugiran, kapaissenan sola kamawatangan. Nang sipato' ia dikasiri', dipakala'bih, na dipuji.”

Pengkitanna Yahya 5:6

Ngkita pole' omo' cadokkoan mala'bih naguririkki a'pa' olok-olok. Ia joo duang pulo a'pa' tomatua-tua ngguririkkii joo cadokkoan sola a'pa' olok-olok. Na ia to Anak Bembala' ke'deh jio olona joo cadokkoan. Ia joo Anak Bembala' susi to mangka digere'. Den pitu tandukkuna na pitu matanna, iamo joo to pitu roh-Na Puang Allataala, to mangka disua male llingkai lino.