Pengkitanna Yahya 12:9 - Alkitab Duri

⁹ nadipenca'bean tama lino sola sininna malaeka'na. Ia to naga, iamo to ulah tua disanga Ballisi' ba'tu puanggawana setang to mpalao sala sininna tau lan lino.

Pengkitanna Yahya 12:9 ပူးပေါင်းရင်းမြစ်များ

Matius 13:39

Ia to ewali nnambohhi pare-pare, iamo Ballisi'. Na wattu peparean, iamo ke Kiama'mi lino, na ia to tomepare, iamo sininna malaeka'-Na Puang Allataala.

Matius 24:24

Nasaba' buda nabi tangtongan sola tossanga kalena tomangpasalama' la mpangpekitan kalena. La mpugauk mangrupa-rupa tanda mejangngaran sola panggaukan mekalajatan, la mpalao sala tau, na ke wa'dingngi moi too umma'-Na Puang Allataala.

Matius 25:41

Mangkai joo too kukuamo lako to to jio sa'de kairing-Ku' kumua, ‘Ee, kamu' to ditampakki ropu, palai kamu' ntee! Mentama kamu' api naraka dukku te'da cappa'na, to dipasadianmo Ballisi' sola tuu lako malaeka'na.

Matius 4:1

Mangkai joo too, napatujumi Roh Allataala to Puang Isa namale de' tangnga padang pallawangan, dikua anna pengkulle-kullei nasede Ballisi' mpugauk dosa.

Matius 4:10

Mebalimi nakua, “Ee Ballisi', malaiko! Den diuki' lan Sura' Allataala kumua, ‘La ssompako Puangmu, Puang Allataala, na Ia manda to la mupu-Puang.’ ”

Matius 4:5

Nasolan omi Ballisi' to Puang Isa de' kota Yerusalem, (iamo to kota-Na Puang Allataala), anna solanni de' bubungan Bola Puang Allataala.

Matius 4:8

Nasolan pole' omi Ballisi' to Puang Isa de' buntu gaja jao, napakitanni to sininna kaparentan lan lino sola kamala'biranna.

Lukas 10:18

Mebalimi Puang Isa nakua, “Den kukita Ballisi' polloh jao mai langi' susi palepa'.

Lukas 13:16

Ia tee baine bati'na Nabi Ibrahim nakuasai Ballisi' sangpulo karuamo taunna. Iamo joo nasipato' dila'paran jio mai kuasanna Ballisi' ke Allo Katorroanni.”

Lukas 22:3

Mangkai joo too natamaimi Ballisi' joo Yudas to disanga too Iskariot, iamo sala mesa'na to sangpulo dua anak gurun-Na Puang Isa.

Lukas 22:31

Nakuamo Puang Isa, “Ee Simon, ee Simon pesa'dingngii! Dieloranmo to Ballisi' ssedeko, susi gose' dirido nadita'pii, anna sisarak issinna na sowokkona.

Lukas 8:12

Ia to banne ta'pah do' lalan dipasangrapangngi to tossa'ding kadan-Na Puang Allataala. Apa ratui to Ballisi' rrampai joo kada mangkamo nasa'ding, dikua anna danggi' namatappa' na te'da nadipasalama'.

Yahya 12:31

Nadete'mi wattunna la dira'tah kara-karana tolino. Ia tee too la dica'beanmo lako salean to Ballisi' to ngkuasaii tee lino.

Yahya 14:30

Te'damo nabuda bang la kupauan kamu', nasaba' wattunnami la ratu to Ballisi', to ngkuasai tee lino. Apa te'da nakuasaina'.

Yahya 16:11

La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino.

Yahya 8:44

Ballisi' kamu' to ambe'mi. Iamo mimadoang bang mpugaukki to pangkabudaianna Ballisi'. Mammula jiona mai topabuno ia. Te'da lalo ia nampau katonganan, sanga te'da katonganan naampui. Ia ke mangnguragai, sipato'namo, sanga iamo garonto'na sininna pangnguraga.

Jamanna Rasulu' 26:18

mpami'cikki to matanna, ssolanni jio mai kamalillinan lako macerona, lla'paranni jio mai kuasanna Ballisi' lako kuasan-Na Puang Allataala, anna didampangan, namenjaji umma'-Na to napilei Puang Allataala, sanga matappa'i lako Aku'.’ ”

Jamanna Rasulu' 5:3

Nakuanni Petrus, “Ee, Ananias, ammueloran bang ora kalemu nakuasai Ballisi', ammuuragara Roh Allataala, ssarakan buni kalemu sesena alli padangmu?

Roma 16:18

Ia to tosusi joo te'da namengkaunan lako Almaseh Puangta', apa naniiri ia mpemasannangngi penawanna. Melo bang to kadanna to la nanii nnuraga tomaruruh kaju dalle.

Roma 16:20

Puang Allataalamora, to mben kamasannangan lako tolino, la rro'pokanni to kuasa Ballisi'. Dennaa upa' nabarakka'i kamu' Puangta' Puang Isa Almaseh.

2 Korintus 11:14

Te'da namejangngaran ke susii joo, nasaba' moi Ballisi' ssullei too kalena mpuarrang arrang malaeka'-Na Puang Allataala.

2 Korintus 11:3

Apa magiangna', iamo ke denni to mpalao sala kamu' ammicia'mo matappa' tongan lako Almaseh susi jolona. Susi todai Hawa tonna anu' tonna sedei ulah napalao salai.

2 Korintus 12:7

tangngia to pengkitangku' to te'da susinna. Apa nabenna' Puang Allataala sangrupa kamaparrisan, anna danggi' kupumatampoi joo pengkitangku'. Ia joo kamaparrisan susi duri ntossokna', napake tonasua Ballisi' mbunona', anna danggi' kumatampo.

2 Korintus 2:11

Kupugaukki susi joo, nadanggi' nataloiki' Ballisi', sanga taissenmo to pangtangngaranna.

2 Korintus 4:4

Ia to Ballisi', to ngkuasaii tee lino, iamo ssamboii tangngahna tuu lako tote'da namatappa', anna te'da nakitai to arrangna Kareba Kasalamatan to napupangngarrang kamala'biran-Na Almaseh to sangrupa bang una Puang Allataala.

Efesus 4:14

Te'damo tasusi tontamane' matappa' napamale melako mangrupa-rupa pangngajaranna tokalasi, to madoang mpalao sala ba'tu nnuragaki'.

2 Tesalonika 2:3

Moi apa nakua tau, danggi' lalo mimatappa', sanga tomangnguragara. Nasaba' den dua kara-kara la jaji namane' ndete'i wattu karatuan-Na pole' Puang Isa. Mangpempissenna buda tau la mpessakkanni Puang Isa. Na mangpenduanna den mesa' tau la mpangpekitan kalena, iamo to Togaja' to napattantumo Puang Allataala la mentama naraka.

1 Timotius 2:14

Apa pole'pi tangngia Adam, apa bainera to nakalasii ulah, anna memmadosa.

2 Timotius 3:13

apa ia to togaja' na topangnguraga la sagaja'-gaja'nai. Ia tuu lako tau nnuraga tau laen, apa sitonganna moi ia diuraga too.

Ibrani 2:14

Ia tuu lako to nasanga anak, tolino ia. Iamo namentolino Puang Isa, anna menjaji susi tuu lako anak. Napugaukki susi joo, dikua anna ia to kamatean-Na wa'dingngi ntaloi Ballisi' to ngkuasai kamatean.

1 Petrus 5:8

La sadia kamu', ammimajaga! Nasaba' ia to ewalimmi Ballisi' susi bang singa lumingka male lako male jio mai, namangngaung-ngaung nnangahhi to la nakandena.

1 Yahya 5:19

Taissen kumua napuanakmiki' Puang Allataala, moi nakuasaii Ballisi' to tolino tangnturu' Puang Allataala.

Yudas 1:9

Moi Mikhael, to puanggawana malaeka' jao suruga, te'da napugaukki susi joo. Ia tonna sisakka sola Ballisi' ssialaii batang rabukkuna Nabi Musa, te'da nabarani Mikhael mpasalai ba'tu ncapa'-capa'i to Ballisi'. Nakua mandara Mikhael, “Na Puang Allataalamora nggarra'ko.”

Pengkitanna Yahya 12:12

Iamo joo tamangmaroah-roahmo antaparannu-rannu to kita' mari'pihmo inde' suruga. Apa maparri'mo kamu' totorro lan lino, nasaba' mellaomi mati' to Ballisi', liwa' birih, sanga naissenni kumua ci'di'mora to wattunna.”

Pengkitanna Yahya 12:3

Ta'pa dikita pole' omi to tanda mejangngaran jao langi'. Den mesa' naga malea liwa' tonggo, ulunna pitu na sangpulo tandukkuna. Ia tuu lako ulunna pada mpake mahkota.

Pengkitanna Yahya 12:7

Anna sirari to malaeka' jao suruga. Mikhael sola malaeka'na nnewai joo naga, apa ia joo naga nabalii toda ia malaeka'na.

Pengkitanna Yahya 12:8

Apa ia joo naga ditaloi, na te'damo nadieloran mari'pih lan suruga,

Pengkitanna Yahya 16:14

Ia tuu lako setang mpugauk tanda mejangngaran. Namale lako sininna raja lan lino narempunni nasirari Puang Allataala ke Kiama'mi lino ba'tu allo mala'bih-Na Puang Allataala to matonggo kuasanna.

Pengkitanna Yahya 18:2

Metambami nakua, “Ro'pokmi. Ro'pokmi Babel kota matonggo. Ia tuu lako setang sola roh gaja' mari'pih lan. Messerang lan to mangrupa-rupa manuk-manuk harang to nakaba'ci tau.

Pengkitanna Yahya 18:23

Te'damo arrang palita sola pangmaroasan tobotting. Ia to pangdangkangmu liwa' kaissenan, na ia to pangngissen-issenmu mupake nnuraga sininna bangsa lan lino.”

Pengkitanna Yahya 19:20

Apa ditalomi anna dijokko joo olok-olok sola nabi tangtongan, namane' dipembuangan tuo tama api colo' manglanya-lanya. (Ia to nabi tangtongan iamo to mangka mpugauk tanda makalaen-laen jio olona joo olok-olok. Ia joo tanda napake joo olok-olok mpalao sala tau to den tandana joo olok-olok jio kalena na ssompa tooi joo tau-taunna.)

Pengkitanna Yahya 2:13

Kuissen to minii mari'pih, iamo to nanii mangparenta Ballisi'. Matappa' tonganmo kamu' lako Aku'. Susinna tonna dibuno tomatappa'-Ku' Antipas jio olomi to nanii Ballisi' torro, anna te'da mipessakkannina' kumua tangngiana' Puangmi.

Pengkitanna Yahya 2:24

Apa ia to kamu' jio kota Tiatira to te'da mituru'i to pangngajah gaja'na, sola te'da mipelajahhii to kapaissenanna Ballisi', kukua mangkada, te'da kulamben kamu' parenta mabanda'.

Pengkitanna Yahya 2:9

Kuissen to kamasussanmi na kamakario-rioanmi apa sitonganna sugih kamu'. Kuissen too to kada gaja' to naanggasan kamu' tuu mati' to ssanga kalena to-Yahudi apa te'da natongan, sanga umma'na ia Ballisi'.

Pengkitanna Yahya 20:10

Na ia to Ballisi' mangka mpalao salai tuu lako tau, dipembuanganni tama api colo' manglanya-lanya to mangkamo dinii pembuanganni to olok-olok na nabi tangtongan. La dipa'dikki allo-bongi te'da cappa'na.

Pengkitanna Yahya 20:8

anna male lako sulapa'na lino mpalao sala bangsa, iamo to to-Gog sola to-Magog. La narempunni tuu lako tau la mangrari. Liwa' budanna tuu lako tau susi kassi' jio randan tasik.

Pengkitanna Yahya 3:9

Pesa'dingngii tee! Ia to umma'na Ballisi' to ssanga kalena to-Yahudi apa tomangnguragara, la kubawai ratu ssuju' kamu', anna akui tooi kumua tokupakamoja' kamu'.

Pengkitanna Yahya 9:1

Ia to malaeka' mangpellima mpannoni tarompe'na, kumengkita, nadenmo bintuin polloh jao mai langi'. Ia joo bintuin diben goncing lako lalan posi' tana to gaja dalan,

Pengkitanna Yahya 9:20

Ia tuu lako tau laen to mangkamo disessa apa te'da namate, te'da natorroii ssompa dewata to nagaraga susi tau-tau jio mai bulawan, salaka, tambaga, batu na kaju. Apa ia joo tau-tau mamang, te'da napakita ba'tu lumingka.