Pengkitanna Yahya 11:18 - Alkitab Duri

¹⁸ Liwa' birih to tote'da naturu'ki', sanga nadete'mi wattun-Ta' mpangpekitan kamabirisan-Ta'. Nadete' toomi wattunna tanii mbicarai to tomatemo. Iamo tee wattunna tanii mbenni pahalana to taun-Ta' nabi, sola to sininna taun-Ta' to ssompaki', la tokaissenan, la tobiasa. Iamo tee wattunna tanii ssolangngi tau to ssolangan lino.”

Pengkitanna Yahya 11:18 ပူးပေါင်းရင်းမြစ်များ

Daniel 11:44

Apa den kareba tangmelo jio mai kadellekan sola jaja mai la mpasabakanni, arannai raja jajanna liu gaja birih na la male mangrari la ncappu'i tau liwa' buda.

Daniel 7:26

Cumadokkomi to tomangra'tah kara-kara, napasoro'i mangparenta joo raja, naancuru'i arannai lanynya'.

Daniel 8:25

Gaja mangngakkalanni na nnuraga buda tau. Nnangga' majao bang kalena, liwa' matampo. Te'da napau-paui, na te'da nakalannai tau nata'pa nnancuru'i. Moi Allataala, Raja ngkuasai sininna raja, naewa too. Katampakanna ditaloi, apa tangngia tolino ntaloi.

Matius 5:12

Parannu kamu' mimasannang, nasaba' buda pahalami jao suruga. Ia tee kadipakario-rioanmi tee too, susi bang una to pura digaukanni tuu lako nabi tonna anu'.”

Lukas 1:50

Napangpekitanmi to kamamasean-Na lako mangpapa'-papa' bati' to ngkasiri'i.

Ibrani 9:27

Mangka napattantu Puang Allataala, kumua pissenra mate to tolino, namane' Puang Allataala rra'tah kara-karana.

Pengkitanna Yahya 10:7

Ianna malaeka' mangpempitu mpannoni tarompe'na, la napugaukmi Puang Allataala to akkatta membunin-Na susi to mangka napangpeissenan lako sininna nabi to nasua.”

Pengkitanna Yahya 11:2

Apa danggi' omo musuka'i to rante saleananna, sanga ia joo saleanan mangkamo dipangben lako totangnnissenna'. Ia tuu mati' totangnnissenna' la ssolang-solangngi joo kota-Ku' kota Yerusalem patang pulo dua bulanna.

Pengkitanna Yahya 13:10

“Ia to tau la ditarungku, nang la ditarungku ia. Na ia to tau la dibuno mpake pa'dang, nang la dibuno ia. Jaji la sabbara'i namatappa' to umma'-Na Puang Allataala.”

Pengkitanna Yahya 13:16

Naparuku ngasan to tau, moi tomapangka' ba'tu tobiasa, tosugih ba'tu tokaasi-asi, kaunan ba'tu totangkaunan la ntarima tanda jio lima kananna ba'tu jio kidena.

Pengkitanna Yahya 14:10

la nniso' anggoro' kamabirisan-Na Puang to mangkamo diballuan tama isotan kamabirisan-Na to tangdirau wai moi ci'di'. Battuananna la disessa joo tau lan api manglanya-lanya jio olona Anak Bembala' sola malaeka'-Na Puang.

Pengkitanna Yahya 15:1

Ngkita pole' omo' mesa' tanda jao langi' mejangngaran te'da susinna. Den pitu malaeka' nnampui pitu cappa' pangsessa. Cappa'nami to Puang Allataala mabirih.

Pengkitanna Yahya 15:7

Mesa' jio mai joo a'pa' olok-olok mpangben pitu isotan bulawan lako joo pitu malaeka'. Ia joo isotan ponno kamabirisan-Na Puang Allataala to tuo te'da cappa'na.

Pengkitanna Yahya 18:6

Pabalahhii susi ia mpabalahhi kamu'. Pugaukki manglokkon penduan to kedo nagaukan kamu'. Patamanni isotanna to pangngisotan masarru' manglokkon penduan na ia to napasadian kamu'.

Pengkitanna Yahya 19:15

Den pa'dang liwa' taran messun lan mai anga'na, na iamo napake la ntaloi sininna bangsa. Naparentai mpake tekken bassi, nalese tooi to anggoro' lan panglulluran anggoro' kamabirisan-Na Puang Allataala, battuananna mpangpekitanni kamabirisan-Na.

Pengkitanna Yahya 19:18

ngkande juku'na raja, pangbarani, surudadu, nyarang sola tomessakena. Juku'na sininna tau, la tokaissenan, la tobiasa, juku'na to kaunan iarika totangkaunan!”

Pengkitanna Yahya 19:5

Ta'pa den omi gamara jio mai cadokkoan mala'bih nakua, “Ee, sininna taun-Na Puang Allataala to ssompai, la tobiasa, la tomapangka', pakala'bihhi Puangta'!”

Pengkitanna Yahya 20:12

Kukita tooi to tomate, la tokaissenan, la tobiasa, ke'deh jio olona cadokkoan mala'bih. Diballahmi to ba'tu pira-pira sura' tilulun. Den omi mesa' sura' tilulun laen diballah, iamo Sura' Katuoan. Namane' dira'tah kara-karana tee mai tomate situru' to diuki' lan joo sura' tilulun.

Pengkitanna Yahya 22:12

Mangkada pole' omi Puang Isa nakua, “Ingaranni tee! La ratuna' madoi' mbenni assele' panggaukanna to tolino.