Matius 6:1 - Alkitab Duri

¹ Mangngajahhimi Puang Isa nakua, “Danggi' mipugauk panggaukan melo ke la mipangpekitanri lako tau, dikua napuji kamu'. Ia ammimanggauk susi joo, te'da miampa'i to pahalami jio mai Ambe'mi Puang Allataala jao suruga.

Matius 6:1 ပူးပေါင်းရင်းမြစ်များ

Daniel 4:27

Ie', dennaa upa' na ia tee pangpakainga'ku' tapesa'dingngi, danggi'mo tapugauk kasalan, apa mpugaukki' kameloan. Pemambelaii kaleta' jio mai dosa antakamaseii to tomaparri'. Ia ke susimiki' joo, kamasannanganta' la dipatarruh.’

Matius 16:27

Te'damo namasai kuratu, Aku' Anak Mentolino sola malaeka'-Ku', angkupupangngarrangngi to kamala'biran-Na Ambe'-Ku'. Ia joo wattu la kunii mbenni assele' panggaukanna to tolino.

Matius 16:6

Mangkadami Puang Isa nakua, “Majaga kamu' lako raginna to-Farisi sola to-Saduki.”

Matius 23:13

Nakua omo Puang Isa mpatarruh kadanna, “Macilaka kamu' to guru agama sola to-Farisi, nasaba' tomajekkong kamu'! Tangmieloran to tau menjaji umma'-Na Puang Allataala. Te'da mimadoang menjaji umma'-Na, na ia to tomadoang kannori mianggai. [

Matius 23:5

Ia ngasan to panggaukanna napangpekitan bangri lako tau. Iamo joo na ia to pakean tanda kamatapparanna, susinna to rombe-rombe bajunna dipemalandoi, na ia to karappe' dinii nnanna aya' Sura' Allataala napematonggoi.

Matius 25:40

La mebalina' kukua, ‘Sitonganna kukuan kamu' kumua, ia to mipugauk lako tee mai to kupusile'to, moi namakario-rio, battuananna mipugauk lako too Aku'.’

Matius 5:16

Iamo joo, pemakassingngimi tuu panggaukanmi nturu' Puang, nakitai tau susi lampu nnarrangngi tau, nawa'ding nnissenni to kameloan-Na Ambe'mi Puang Allataala jao suruga.”

Matius 5:46

Sitonganna, ia ke mipakamoja'i to tompakamoja' kamu', te'da miampa'i to pahalami jao suruga, nasaba' moi passassung napugauk toda susi joo.

Matius 5:48

Ia to Ambe'mi Puang Allataala jao suruga mpakamoja' sininna tolino. Iamo joo la susi toda mipugauk.”

Matius 6:16

Mangngajahhimi Puang Isa nakua, “Ia ammipuasa, danggi' mimenggamuru bang susi tomajekkong. Ia to tau susi joo naanggai' bang tangmendau', dikua naissenni tau kumua puasai. La miingaran tee kadang-Ku' kumua, mangkami ia ntarimai to pahalana!

Matius 6:9

Jaji, ia ammimassambajang, la mikua susi tee: Oo, Ambe'ki', Puang Allataala jao suruga. Dennaa upa' na sininna tau mpakala'bihki',

Markus 8:15

Napupangngingaranmi Puang Isa nakua, “Majaga kamu' lako raginna to-Farisi sola Raja Herodes.”

Lukas 11:35

Iamo joo jagai anna danggi' napamalillinni Ballisi' to mata penawammi.

Lukas 12:1

Ia joo wattu sirempunmi massa'bu-sa'bu to tau madoang ngkita Puang Isa. Nasisi'pin-si'pin ntalimbungngi to Puang Isa anna den to disilesei ajena. Napamulami Puang Isa nnajahhi anak gurun-Na nakua, “Majaga kamu' jio mai raginna to-Farisi. Ia to kusanga iamo to kamajekkonganna.

Lukas 12:15

Mpatarruhhi kadan-Na Puang Isa lako tobuda ntuu jio nakua, “Majaga kamu', miingaran meloi, danggi' mimadoang nnassang sininna apa lan tee lino. Nasaba' ia to katuoanna tau te'da napole jio mai kasugiran, moi nasugih lallang.”

Lukas 16:15

Apa nakua Puang Isa lako, “Mianggai' bangra melo jio olona tau, apa naissen Puang Allataala to lan penawammi. Nasaba' apa to nasanga tolino mala'bih, nakaba'ci Puang Allataala.

Yahya 12:43

La'bih nakabudai to kadipujian pole jio mai tolino, na ia to kadipujian pole jio mai Puang Allataala.

Yahya 5:44

Umbo la mikua matappa' lako Aku', ke nnangahra kamu' kadipujian jio mai padammi tolino, na te'da miangahhi to kadipujian pole jio mai Puang Allataala te'da susinna.

Jamanna Rasulu' 3:12

Ia tonna kitai Petrus to tobuda nakuamo, “Ee, to-Israel, matumbari mijangngahra? Matumbari mikaje'jek tarruh bangkan? Misangaraka kumua kapakulleanki'ra ba'tu kamenturusanki' lako Puang Allataala anna wa'ding lumingka tee tau?

Galatia 6:12

Ia to guru tangtongan, madoangri la napakala'bih tau. Naparuku kamu' mpugauk sunna', dikua nadanggi' napakario-rioi to-Yahudi, sanga pangngajaran kaju sitamben-Na Almaseh, battuananna kumua kamatean-Na mandara Almaseh jao kaju sitamben la mpupenjaji tomelo tau.

Ibrani 11:26

Nasangai Nabi Musa kumua la'bih keangga' ke dikita majiongngi sanga matappa'i lako Raja Mangpasalama' to nabasse Puang Allataala la ratu na ia ke namesaii to sininna ewanan jio tana Mesir, sanga rrannuanni pahalana jio ahera'.

Ibrani 2:1

Mala'bih to Almaseh na ia to malaeka'. Iamo joo nagaja paralluki' nningaranni to pangngajah mangkamo tasa'ding, danggi' nasata'de-ta'dena to kamatapparanta'.

Ibrani 6:10

Te'da natangmaruruh to Puang Allataala. Te'da natangnningaranni to apa mipugauk, iamo to pangpakamoja'mi to mipangpekitan lako kale-Na tommitulung padammi tomatappa', la jolona, la ia too allo.

2 Yahya 1:8

Iamo joo mijagai meloi to apa kipengkulleimo mpugaukki ammida'tan matappa' lako Puang Isa. Ia ke te'damo mimatappa', te'da milannampa' katuoan melo te'da cappa'na jio mai Puang Allataala.