Matius 5:29 - Alkitab Duri

²⁹ Jaji ianna mata kananmi ntumang kamu' mipugauk dosa, cukke'i, ammica'beanni! La'biran, ke tangsukku'i to batang kalemi, na ia ke sukku'i, apa dipatama kamu' naraka.

Matius 5:29 ပူးပေါင်းရင်းမြစ်များ

Matius 10:28

Danggi' mimalaja' lako tolino to batang kale manda nakulle nabuno, apa te'da nakullei mbuno penawammi. Puang Allataalara to sipato' mikalaja', nasaba' ianna mangka mbuno kamu', makuasapa Ia mpatamai naraka to batang kalemi sola penawammi.

Matius 11:6

Masannang tongan to tau tangmenassan ntarimana'.”

Matius 16:26

Apara bua'na lako tau ke naassang ngasanni tee lino, apa te'da naampa' katuoan melo te'da cappa'na? Wa'dingraka joo katuoan dipasiangga' waramparan?

Matius 17:27

Apa dikua danggi' namabirih tee mai tau, malemoko mamekan lako randan tasik. Ia to bale bungah muala den doi' lan anga'na, alai tapamajaranni sola dua tama Bola Puang Allataala.”

Matius 19:12

Den tau te'da nakullei mendapoh simula jajinna. Den to dianggai' meman too, dikua nate'da namerrampean. Na den too to cia' merrampean, nasaba' nala'biranni to pangjaman Puang Allataala. Ia to tau ngkullei nturu'i tee pangngajah, ma'namo ia napugaukki.”

Matius 23:15

Macilaka kamu' to guru agama sola to-Farisi, nasaba' tomajekkong kamu'! Male kamu' manglalan mambela llamban tasik na ngguririkki padang nnangah mesa' tau la mipupenjaji anak gurummi. Ia tonna turu'mo kamu', mipupenjajimi tawana naraka, na manglokkon penduan to gaja'na na ia to gaja'mi sola ngasan.

Matius 23:33

Togaja' kamu', sanga bati' togaja' kamu'! Umbora la mikua mpalaian kalemi jio mai pangsessa naraka!

Matius 5:22

Apa kukuan kamu' kumua, ia to tomabirih lako padanna rupa tau, la dipangngoloi lako tomangra'tah kara-kara, na ia to tongkada-kadai padanna rupa tau la dipangngoloi lako tomangparenta, na ia to tomangkada lako padanna rupa tau kumua, ‘Te'da iko bua'mu,’ sipato' dibuang tama api naraka.

Matius 5:30

Ia ke lima kananmi ntumang kamu' mipugauk dosa, ta'takkii, ammica'beanni! La'biran, ke tangsukku'i to batang kalemi, na ia ke sukku'i, apa dipatama kamu' naraka.”

Markus 8:36

Apara bua'na lako tau ke naassang ngasanni tee lino, apa te'da naampa' katuoan melo te'da cappa'na?

Lukas 12:5

La kupauan kamu' to sipato' la mikalaja': Malaja' kamu' lako Puang Allataala! Nasaba' ianna mangka mbuno kamu', makuasapa Ia mpatama kamu' naraka. Ingaranni, Ia mandara to parallu mikalaja'.

Roma 6:6

Taissenmo kumua ia to sipa' gaja'ta' mangkami dita'dei tontadipampang sola Almaseh jao kaju sitamben. Na ia ke susii joo, te'damo napukaunanki' kuasa dosa, nasaba' ia to tomatemo dila'paranmi jio mai kuasa dosa.

Roma 8:13

Ia ke taturu'i to kamadoangan penawanta', la mateki'. Apa ia ke taeloranni to Roh Allataala ntulungki' nca'beanni to panggaukan gaja'ta', la tuo meloki' te'da cappa'na.

1 Korintus 9:27

Kupengkulle-kullei tongan ngkuasai kaleku', sanga iamo ke aku'mo to mpangpeissenan Kareba Kasalamatan na aku' pole' ora tangdipasalama'.

Galatia 5:24

Na ia to taun-Na Puang Isa Almaseh mangkami naca'bean to kamadoangan gaja'na.

Kolose 3:5

Iamo joo ca'beanni to sininna kamadoangan gaja'mi, susinna manggauk sala, panggaukan laen to tangsipato', nturu' bang pakkaeloran penawa, mangpanggaukan tangmelo na madoang nnassang sininna apa, nasaba' ia to tomangngassang dipapadai tossompa dewata.