Lukas 6:35 - Alkitab Duri

³⁵ Te'da nalasusi joo! Sibalikanna, pakamoja'i to ewalimmi, na la manggauk melo kamu' lako kalena. La mangpaindan kamu', na danggi'mo mitajanni to polena. Ia ke susii joo, la buda to pahalami, na la menjaji kamu' anak Puang Allataala Jao Majaona. Nasaba' melo to penawan-Na Puang Allataala lako totangnnissen mangkurru sumanga' na tomanggauk gaja'.

Lukas 6:35 ပူးပေါင်းရင်းမြစ်များ

Kada Bulawan 19:17

Ia ke ngkamaseiki' tokaasi-asi, butung to mangpeindan lako Puang Allataala, na Puang Allataala Ia la mpabalahhi joo panggaukanta'.

Kada Bulawan 22:9

Nabarakka'i Puang Allataala to tomalaboh, sanga mbenni kande tokaasi-asi.

Matius 5:9

Masannang to tau mpasikalino padanna rupa tau, nasaba' la disanga anakka-Na Puang Allataala.

Markus 5:7

Nasuai Puang Isa joo setang, nakua, “Ee, setang, messunko lan mai tee tau!” Metambai joo setang nakua, “Oo, Puang Isa, Anak Allataala to kaminang makuasa! La tapatumbamora' tee? Nakitana' Puang Allataala, meta'dana' danggi' dikka' tacallana'!”

Lukas 1:32

La mala'bihhi joo pea nadisanga Anak Allataala jao majaona. La naangka'i Puang Allataala menjaji Raja susi Raja Daud, tojolona.

Lukas 6:36

Mamase kamu', susi Ambe'mi Puang Allataala mamase!”

Yahya 13:35

Ia ke sipakamoja'mo kamu', iamo nanii nnissen ngasanni tau kumua, kamu'mo tonturu'na'.”

Yahya 15:8

Na ia ke membua budamo kamu', iamo dinii mpakala'bih Ambe'-Ku'. Pajan toomi kumua kamu'mo to ntongan-tongannii nturu'na'.

Jamanna Rasulu' 14:17

Apa te'dara natangmpangpekitan kalena lan mangrupa-rupa panggaukan melo susinna: naben kamu' uran jao mai langi' sola assele' padang ke wattunna omi. Naben kamu' kande, napemasannangngi tooi to penawammi.”

2 Korintus 8:9

Miissen kumua gaja napakamoja' kamu' Puangta' Puang Isa Almaseh. Sugih Ia, apa mpupengkaasi-asii kalena nasaba' kamu', anna ia joo kakaasi-asian-Na mpupessugih kamu'.

2 Timotius 3:2

Tangsiissenanmo to tau, doi' mandamo napikkiri', namatampo. Nakabudai ncapa' tau, nnewa tomatuanna, tangnaissen to penawa melo na tangkasiri' Puang Allataala.