Kolose 2:15 - Alkitab Duri

¹⁵ Nataloi Almaseh jao kaju sitamben to sininna tomakuasa ba'tu tomangparenta jao langi' anna te'damo nakullei mangpanggaukan. Napugaukki Puang Allataala susi joo nanii mpakasiri'i to tomakuasa ba'tu tomangparenta jao langi' anna pasusii to toditalo lumingka jio boko'-Na Almaseh na jolo to Almaseh susi topatalo.

Kolose 2:15 ပူးပေါင်းရင်းမြစ်များ

Matius 12:29

Mangkai joo too, mangngajahhimi Puang Isa mpake pangpasusian nakua, “Na umbo nakua to taboko mentama bola, ke mawatangngi to ampu bola? La napumpungri jolo' to ampu bola, namane' nnalai ngasanni to ewananna.

Lukas 10:18

Mebalimi Puang Isa nakua, “Den kukita Ballisi' polloh jao mai langi' susi palepa'.

Lukas 11:22

Apa ia ke denni to la'bih mawatang ratu rrarii, nataloi, manassa kumua la naalai ngasanni joo parewa kapararian narannuan, narampai to ewananna natawa-tawai.

Yahya 16:11

La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino.

Yahya 19:30

Nacuccu'i Puang Isa joo anggoro', namane' mangkada nakua, “Mangkami!” Namane' cukku, naka'tu sunga'-Na.

1 Korintus 15:24

Mangkai joo too, Kiama'mi lino. Ia joo wattu la nataloi Almaseh to sininna kaparentan, kamakuasan, na sininna kamawatangan, namane' mpangben kakuasan-Na susi Raja lako Ambe'ta' Puang Allataala.

2 Korintus 2:14

Apa kurru sumanga' lako Puang Allataala to tuli ssolankan nabenkan kapataloan, nasaba' memmesa' penawakan sola Almaseh! Napakekan Puang Allataala mpangpeissenanni to karebanna Almaseh, anna kaissenan susi bau bunangngu' silele to padang la umbo-umbo kinii.

2 Korintus 4:4

Ia to Ballisi', to ngkuasaii tee lino, iamo ssamboii tangngahna tuu lako tote'da namatappa', anna te'da nakitai to arrangna Kareba Kasalamatan to napupangngarrang kamala'biran-Na Almaseh to sangrupa bang una Puang Allataala.

Efesus 3:10

Napugaukki Puang Allataala susi joo la mpapajanni to mangrupa-rupa kamaccan-Na sola kapaissenan-Na Puang Allataala lako mangrupa-rupa tomakuasa ba'tu tomangparenta jao langi' ke nakitai to tomatappa' menjaji susi mesa' kale.

Efesus 4:8

Susi to diuki' lan Sura' Allataala mpau Almaseh kumua, “Ia tonna mangka ntaloi ewalinna, endekki de' ngenan kaminang majao, mbawai buda todirampa, na mben barakka' tolino.”

Efesus 6:12

Nasaba' tangngia padanta' rupa tau to taewa, apa nnewaki' sininna tomakuasa ba'tu to mparentai tee lino gaja', sola sininna setang to mangparenta jao langi' tee wattu.

Kolose 1:16

Iamo napake Puang Allataala mpadenni to sininna apa lan lino na sininna apa jao suruga, ia to dikitanna na tangdikitanna, sininna kuasa ba'tu kaparentan jao langi'. Ia tee lino sola issinna dipaden mpake Almaseh na dipatuju lako too Almaseh.

Kolose 2:10

na te'da kakuranganmi, sanga ia to sipa'-Na sola kuasan-Na Puang Allataala miputawa too, nasaba' memmesa'mo kamu' sola Almaseh. Ia to Almaseh ngkuasai sininna tomakuasa ba'tu tomangparenta.

Ibrani 2:14

Ia tuu lako to nasanga anak, tolino ia. Iamo namentolino Puang Isa, anna menjaji susi tuu lako anak. Napugaukki susi joo, dikua anna ia to kamatean-Na wa'dingngi ntaloi Ballisi' to ngkuasai kamatean.

Pengkitanna Yahya 12:9

nadipenca'bean tama lino sola sininna malaeka'na. Ia to naga, iamo to ulah tua disanga Ballisi' ba'tu puanggawana setang to mpalao sala sininna tau lan lino.

Pengkitanna Yahya 20:10

Na ia to Ballisi' mangka mpalao salai tuu lako tau, dipembuanganni tama api colo' manglanya-lanya to mangkamo dinii pembuanganni to olok-olok na nabi tangtongan. La dipa'dikki allo-bongi te'da cappa'na.