Ibrani 7:19 - Alkitab Duri

¹⁹ sanga ia to atoranna Nabi Musa te'da nakullei mpupenjaji melo tau, moi mesa'. Na ia to tarannuan tee too la'bih melo na ia to dirannuan jolona, antabarani mangngolo lako Puang Allataala.

Ibrani 7:19 ပူးပေါင်းရင်းမြစ်များ

Yahya 1:17

Ia to atoran-Na Puang Allataala nabenki' Nabi Musa, apa ia to pangpakamoja' sola katonganan jio mai Puang Allataala napamanassa Puang Isa Almaseh.

Yahya 14:6

Mebalimi Puang Isa nakua, “Aku'mo minii nnissen Puang Allataala sola nnampa' katuoan. Moi mesa' tau te'da nakullei ratu lako Ambe', ke te'dai kupuissenni.

Jamanna Rasulu' 13:39

apa ia to tomatappa' lako Puang Isa direken tomelo.

Roma 5:2

Iamo nneloranki' mperasai kameloan penawan-Na Puang Allataala to taperasai tee too, nasaba' kamatapparanta'. Jaji la marioki' sanga den kaparannuanta' mputawa kamala'biran-Na Puang Allataala jao suruga.

Roma 7:7

Na ia ke susii joo apara la takua? Takuaraka kumua gaja' to atoranna Nabi Musa? Te'da ia! Apa nnissenmo' dosa, nasaba' kuissen to atoranna Nabi Musa. Ia kenna te'da nadiuki' lan atoranna Nabi Musa kumua, “Danggi' ngkadoangngi apanna padammu rupa tau!”, te'da kuissenni to madoang.

Roma 8:3

Ia to atoran agama te'da nakullei lla'paranki' jio mai kuasa dosa, nasaba' tangtakulle nturu' atoran agama. Apa ia to tangnakulle atoran agama mpugaukki, mangkami napugauk Puang Allataala. Nasuai to Anak mentolino. Na ia to batang kale-Na susi bang batang kale tolino biasa. Na ia tee Anak matei dikua anna ia to dosana tolino dipabalahhi lakoi batang kale-Na Anak.

Galatia 2:16

Moi nasusi joo, kiissen kumua te'da tau napupenjaji tomelo Puang Allataala, sanga mpugaukki atoran agama, apa kamatapparannara lako Puang Isa Almaseh. Susimi joo angkimatappa'mo lako Puang Isa Almaseh, dikua angkidipupenjaji tomelo, tangngia sanga mpugaukkan atoran agama. Te'da mesa' tau dipupenjaji tomelo, nasaba' mpugaukki atoran agama.

Galatia 3:21

Ia ke susii joo, sisalaraka to atoran agama na basse-Na Puang Allataala? Te'da lalo ia! Sanga ia ke dibenni atoran agama to tolino to la mpatuoi, manassa iamo mpupenjaji tomeloi ke naturu'i joo. Apa te'da nakullei to atoran agama mpugaukki susi joo,

Galatia 3:24

Jaji, ia to atoran agama mpatujuki' ratu lako ratun-Na Puang Isa Almaseh, antadipupenjaji tomelo sanga matappa'ki' lako Almaseh.

Efesus 3:12

Kamatapparanta'mora lako Almaseh sola kamangmesan penawanta'mora sola Ia, antabarani mangngolo lako Puang Allataala.

Kolose 1:27

Madoangngi Puang Allataala mpangpekitanni lako sininna umma'-Na to melona sola mala'bihna joo akkatta-Na lako kamu' bangsa tangngia to-Yahudi kumua, natorro too Almaseh lan kalemi, na iamo buttinna kumua la turu' toda kamu' mperasai kamala'biran-Na Puang Allataala jao suruga.

1 Timotius 1:1

Ee, Timotius, to kupuanak, sanga matappa'moko lako Puang Isa nasaba' pangngajahku'! Aku' Paulus ngkiringanko tee sura'. Pakkaeloran-Na Puang Allataala, Tomangpasalama'ta' kumenjaji rasulu'-Na Puang Isa Almaseh to tarannuan. Dennaa upa' nabarakka'iko nakamasei tooko Ambe' Puang Allataala sola Puangta' Puang Isa Almaseh nabenko kamasannangan.

Ibrani 10:1

Ia joo atoran agama to-Yahudi bajo-bajona bangra joo kasalamatan la ratu, jaji tangngiapa to sitonganna. Te'da nakullei joo atoran mpupenjaji meloi to tompassompan karoba lako Puang Allataala, moi narundun taun tuli ndadu'i massompa susi joo.

Ibrani 11:40

sanga naakkattai Puang Allataala kumua kita'ra to ntarimai. Iamo joo solapiki' to tau susi joo, namane' nnampa'i to barakka' te'da kakuranganna.

Ibrani 11:6

Moi mesa' tau te'da napumasannang Puang Allataala ke tangmatappa'i. Ia ke den tau madoang mangngolo lako Puang Allataala, la nakatappa'i kumua den to Puang Allataala, na la nakatappa'i too kumua melo penawan-Na to Puang Allataala lako to tonnangahhi.

Ibrani 3:6

Apa Anak to Almaseh to dipabarakkanni jaman ntulung sininna taun-Na Puang Allataala. Na kita'mo tee to taun-Na, ke da'tanki' matappa' sola da'tanki' mangrannuan lako manda Puang Isa.

Ibrani 4:16

Iamo joo tapada mbaranian kaleta' mangngolo lako Puang Allataala to mpakamoja'ki'. Ia ke tapugaukki susi joo, la taperasai to pangkamasean-Na sola kameloan penawan-Na, nasaba' te'da namela' ntulungki' tontaparalluii.

Ibrani 6:18

Ia joo dua, iamo to basse-Na sola sapah-Na te'da namembali, sanga te'da nakullei Puang Allataala mangnguraga. Susimi joo napamasumanga'ki' kita' to napasalama'mo Puang Allataala, antarannuan tarruh Puang Allataala kumua la napugaukki to apa nabasseanki'.

Ibrani 7:11

Ia tonna benni Puang Allataala to atoran agama lako to-Yahudi, naangka' tooi to bati'na Lewi menjaji imang nnajahhi tau nturu'i joo atoran. Jaji, den kasiumputanna imang na atoran agama to-Yahudi. Apa te'da nakullei to imang bati'na Lewi mpupenjaji tomelo tau. Iamo joo parallu den imang laen susi imang Melkisedek to te'da napole jio mai bati'na Lewi susi imang Harun.

Ibrani 7:20

Apa pole'pi, den sapah-Na Puang Allataala anna menjaji imang to Puang Isa. Te'da namassapah tonna diangka' to imang laen.

Ibrani 7:25

Iamo joo na te'da lalo natorroii mpasalama' tau to mangngolo lako Puang Allataala mpau sangan-Na, sanga tuo tarruhhi la mpangkadananni lako Puang Allataala.

Ibrani 8:6

Apa la'bih melo to jaman dipabarakkananni Puang Isa na ia to jamanna imang bati'na Lewi. Puang Isamo mpasijajianni to basse-Na Puang Allataala sola tolino. Na ia joo basse la'bih melo na ia to basse napasijajian Nabi Musa. La'bih melo joo basse baru, sanga la'bih melo to apa dipau lan.

Ibrani 9:9

Ia ngasanmo joo pangrapanganna to apa jaji tee too, battuananna kumua ia to karoba to dipassompan unapa lako Puang Allataala te'da nakullei ndampangan tomassompa anna te'damo napasalai penawanna.

Yakub 4:8

Mandoppi' kamu' lako Puang Allataala, nalamandoppi' too lako kalemi. Ee, kamu' tomadosa! Danggi'mo mipugauk dosa. Na kamu' tomangdua penawa, pemeloi sipa'mi.