Ibrani 5:9 - Alkitab Duri

⁹ Susimi joo nadipupenjaji Tomangpasalama' te'da caccana ba'tu kakuranganna to mben katuoan melo te'da cappa'na lako tomengkaturu' lako Ia.

Ibrani 5:9 ပူးပေါင်းရင်းမြစ်များ

Daniel 9:24

Napattantumo Puang Allataala pitungpulo manglokkon pitung taun la nanii mpasalama' bangsamu sola kota mala'bih kota Yerusalem na anggei dosa na nta'dei kasalan. Sininna dosa la diaddampangan na dipugauk tarruh to katonganan te'da anggena. La jaji tongan to pengkita sola apa to mangka napau jolo nabi tonna anu' na ia to Bola Puang Allataala la dicerak pole'.

Matius 17:5

Ia tonna mangkada unapa Petrus, ratumi to saleu' macorrang mbombonnii sola ngasan na den gamara nasa'ding lan mai nakua, “Iamo tee to Anak kupakamoja' to mpamasannangna'. Pesa'dingngii!”

Lukas 13:32

Napebalimi Puang Isa nakua, “Malemo kamu' mpauanni Raja Herodes, tokalasi, kumua, ‘Ia tee allo na masawa la nnula'ina' setang na mpamalagah toona' tomasaki. Apa ianna allo mangpentallunnamo la mmangkaina' jaman-Ku'.’

Yahya 19:30

Nacuccu'i Puang Isa joo anggoro', namane' mangkada nakua, “Mangkami!” Namane' cukku, naka'tu sunga'-Na.

Jamanna Rasulu' 3:15

Mangka mipangpebunoan, nasitonganna Iamo garonto'na katuoanna sininna tau. Apa napatuo pole'mi Puang Allataala jio mai kamatean, na kiissen kumua tongan joo, nasaba' kikita kami'.

Jamanna Rasulu' 4:12

Puang Isa mandara mpasalama' tau. Sanga sininna to narande tana nasambo langi' te'da tau laen to naben kuasa Puang Allataala la mangpasalama'.”

Jamanna Rasulu' 5:32

Kami'mo tee to mangka ngkitai kipangpeissenanni lako kamu' sola Roh Allataala, to nasua lako to tonturu' parenta-Na.”

Roma 1:5

Nabenna' barakka' Puang Allataala menjaji rasulu' nasaba' Puang Isa Almaseh, angkuwa'ding la mpatuju sininna bangsa kumua namatappa' sola menturu' lako Almaseh.

Roma 10:16

Apa te'da na ia ngasan tau ntarimai joo Kareba Kasalamatan. Nakua Nabi Yesaya, “Oo Puang! Ci'di'ra tau ngkatappa'ii to kareba kipangpeissenan!”

Roma 15:18

Baranina' mpaui umbo nakua Almaseh ntulungna' mangkada sola mangjama, anna ia to bangsa tangngia to-Yahudi menturu' lako Puang Allataala.

Roma 2:8

Apa ia to tompangnginawan mesa bang kalena, na te'da namadoang mpugauk pakkaeloran-Na Puang Allataala, na nturu'ra kagajatan, liwa' nakaba'cinna Puang Allataala.

Roma 6:17

Apa kurru sumanga' lako Puang Allataala, nasaba' jolona napukaunan kamu' kuasa dosa, apa ia tee too tatta' kamu' nturu' pangngajaran tongan to mangka diben kamu'.

2 Korintus 10:5

tomatampo, na tohhalangngi tau nnissen Puang Allataala. Na ia joo kuasan-Na kipake too mpabalik pangtangngaranna tau, anna menturu' lako Almaseh.

Filipi 2:12

Ee, tomala'bihku' sola ngasan to kupakamoja'! Susi tongkutorropa lan tangnga-tangngami, la'bih-la'bih tee too moi mambelana' jio mai kalemi, la tatta' kamu' nturu'i to pangngajahku'. Mangkamo kamu' napasalama' Puang Allataala. Jaji, la mipengkulle-kullei tuo susi sipato'na umma'-Na Puang Allataala, iamo to ssompa Puang mimalaja' mpugauk kasalan.

2 Tesalonika 1:8

na den too api manglaka-laka. La ratu pole'i to Puang Isa na ssessai to tote'da nakasiri' Puang Allataala sola tocia' ntarimai to karebanna Puangta' Puang Isa.

2 Tesalonika 2:16

Napakamoja'ki' Puangta' Puang Isa Almaseh sola Ambe'ta' Puang Allataala. Napamasumanga' tarruh to penawanta', naben tooki' kasabbarasan ntajanni to melona, nasaba' kameloan penawan-Na.

2 Timotius 2:10

Namawatang bangna' ntarima ngasanni, nasaba' kaparalluanna to tau mangkamo napilei Puang Allataala, dikua nalolongan kasalamatan jio mai Puang Isa Almaseh, sola kamala'biran te'da cappa'na.

Ibrani 1:14

Ia to malaeka' mpangjaman Puang Allataala to nasua ntulungngi to tolantarima kasalamatan.

Ibrani 11:40

sanga naakkattai Puang Allataala kumua kita'ra to ntarimai. Iamo joo solapiki' to tau susi joo, namane' nnampa'i to barakka' te'da kakuranganna.

Ibrani 11:8

Naturu'i Nabi Ibrahim to apa nasuanni Puang Allataala, sanga matappa'i. Nasuai Puang Allataala male lako tondok mambela to la nabenni napumanah. Malemi Nabi Ibrahim, moi na te'da naissenni umbo nanii mangnguju.

Ibrani 12:2

La tapugaukmi tapatuju lakoi Puang Isa to penawanta', to mpadenni to kamatapparanta', napupenjajiki' masaranian. Gaja mesirisan joo kamatean jao kaju sitamben. Apa moi nasusi joo te'da nasipattekanni, sanga ia manda naingaran to kamasannangan la naperasai undinna. Na ia tee too cumadokkomi jio kananna cadokkoan mala'bih-Na Puang Allataala namangparenta sola.

Ibrani 2:10

Mangkamo napaden, naampai tarruh tooi Puang Allataala to sininna apa. Naakkattai anna buda tau nasolan Puang Isa lako kamala'biran. Iamo joo napattantui kumua sipato' to Puang Isa mperasai parri' ratu lako mate-Na anna menjaji Tomangpasalama' te'da caccana ba'tu kakuranganna, nawa'ding mpasalama' tau.

Ibrani 2:3

Apa pole'pi kita', ia ke te'da taingaran meloi joo Kareba Kasalamatan, tantu te'da talala'pah jio mai pangsessa. Sanga la'bih melo joo Kareba Kasalamatan na ia joo atoran naparatu malaeka' tonna anu'. Puang Isa Ia to bungah mpangpeissenanni, na mangkamiki' napauan tuu lako tobungah ssa'dingngi, antaissenni kumua tongan.

Ibrani 9:12

Ia tonna mentama Tenda-Na Puang Allataala to Almaseh, tarruhhi tama Ngenan Kaminang Macero mangngolo lako Puang Allataala. Ia joo wattu te'da nambawa rara beke bulolo' ba'tu rara anak sapin la dipassompan, apa rara kale-Na to la napassompan. Pissen bangri joo, te'da naparallu didadu', sanga ia joo rara-Na napake lla'bak tarruhki' te'da cappa'na.

Ibrani 9:15

Napasijajianni Almaseh to basse baru, dikua na ia to kamatean-Na la lla'bak tau jio mai kasalanna to napugauk tonna atoran basse jolo, na ia to tomangkamo napilei Puang Allataala la nnampa' barakka' te'da cappa'na to mangka nabasseanni.

Ibrani 9:28

Susi toomi Almaseh pissenri mpassompan kalena la ndampangan buda tau. Na ia ke ratu pole'mi, te'damo naratu la mpangben sunga'-Na nasaba' dosana tau, apa la mbenmira kasalamatan lako tontajan karatuan-Na pole'.

1 Petrus 1:22

Mangkamo mipemeloi to sipa'mi, sanga nturu'mo kamu' pangngajaran tongan jio mai Puang Allataala na danggi' mianggai'-gai' bangri mpakamoja' padammi tomatappa'. Iamo joo la sipakamoja' tongan kamu'.

1 Yahya 5:20

Taissenmo kumua mangkamo mentolino to Anak Allataala na mangka toomo mbenki' kapaissenan, antawa'ding nnissenni indara to Puang tongan. Mesa' penawamiki' sola Puang Allataala tongan, sanga mesa' penawamiki' sola Anak Allataala, Puang Isa Almaseh. Iamo Puang Allataala tongan, to mpangben katuoan melo te'da cappa'na.

Yudas 1:21

La miissen kumua napakamoja' kamu' Puang Allataala. Iamo joo majaga kamu', danggi' mipatorroi joo pangpakamoja'-Na. La ntajan kamu' kamamasean to la naben kamu' Puangta' Puang Isa Almaseh. Ia to la naben kamu', iamo katuoan melo te'da cappa'na.