Ibrani 3:5 - Alkitab Duri

⁵ Najama tarruhhi Nabi Musa to jamanna ntulung sininna taun-Na Puang Allataala susi mesa' todisua. Ia to panggaukanna Nabi Musa iamo bajo-bajona apa to undinna la napangpeissenan Puang Allataala.

Ibrani 3:5 ပူးပေါင်းရင်းမြစ်များ

Matius 24:45

Mangkadami Puang Isa nakua, “Susinna ke den kaunan melo to wa'ding dikatappa'i, iamo la naben kuasa puangna ngkapalai kaunan laenna, nabenni kande ke wattu kakumandeanmi.

Matius 25:21

Nakuamo joo puangna, ‘Gaja kassing tuu panggaukanmu! Natatta' makassing to penawammu lako aku'. La kupabarakkanniko to la'bih matonggo, sanga wa'dingko dikatappa'i moi na panggaukan biccu'ra. Malemoko mai, taperasai kamasannangan sola!’

Lukas 12:42

Mebalimi Puang Isa nakua, “Iamo kupapatui to kaunan melo to wa'ding dikatappa'i. Iamo la naben kuasa puangna ngkapalai kaunan laenna, napakandei ke wattunnami kakumandean.

Lukas 24:27

Mangkai joo too nabattuanannimi Puang Isa to apa pura diuki' lan Sura' Allataala to ntuju kalena. Napamula jio mai sura'na Nabi Musa ratu lako sura'na nabi laen.

Lukas 24:44

Ia tonna mangkamo joo, nakuamo Puang Isa lako anak gurun-Na, “Iamora tee to pura kupauan kamu' tontasola unapa, kumua sininna to pangnguki' mpauna' lan sura'na Nabi Musa, nabi laen, na Pangpujian, nang la jajinna ia.”

Yahya 5:39

Mpelajahhi kamu' issinna Sura' Allataala, nasaba' misangai kumua iamo joo mipugauk ammiampa' katuoan melo te'da cappa'na. Na moi Sura' Allataala, Aku' bang una to napau,

Jamanna Rasulu' 28:23

Mpattantumi mesa' allo sola Paulus nanii la sitammu. Ia joo allo buda tau ratu lako to nanii Paulus. Mellao melambi' ratu lako soloh allo naajahhi ngasan to tau umbo nakua menjaji taun-Na Puang Allataala lan kaparentan-Na. Napabuttii jio mai sura'na Nabi Musa na sura'na nabi laen kumua Raja Mangpasalama' to Puang Isa, to napau Puang Allataala tonna anu'.

Jamanna Rasulu' 7:37

Ia toomo mpauanni to bangsa Israel kumua, ‘La napadenan kamu' Puang Allataala mesa' nabi susi tee aku', napilei lan mai rapummi.’

Roma 3:21

Ia tee too napakitanmiki' lalan Puang Allataala, umbo nakua carana to tolino dipupenjaji tomelo. Na ia to sura'na Nabi Musa sola sura'na nabi laen mangka mpangpeissenanni tonna anu', na tangngia nasaba' nturu'ki' atoran agama.

1 Korintus 4:2

Ia to kaminang parallu lako to todisua, iamo to kumua la tatta'i mpugaukki to apa nasuanni puangna.

1 Timotius 1:12

Mangkurru sumanga'na' lako Puangta' Puang Isa Almaseh, nasaba' naangga'mo' kumua sipato'mo' naangka' menjaji rasulu'-Na. Iamo nabenna' kapakullean la mpangjamanni,

Ibrani 1:1

Ia tonna anu' buda cara tuli napake Puang Allataala ssua nabi mparatuanni kadan-Na lako tojolota'.

Ibrani 3:2

Najama tarruhhi to jaman nasuanni Puang Allataala njamai. Susi too Nabi Musa tonna anu' njama tarruhhi to jamanna ntulung taun-Na Puang Allataala.

Ibrani 3:4

Simesa'-mesa' bola nang den pandena, apa ia to Puang Allataala mpandei sininna apa.

Ibrani 8:5

Ia to jaman najama tuu lako imang, sitonganna pangpasusianra ba'tu bajo-bajonara to apa denmo jao suruga. Susi toomi ia to tenda passompan napake'deh Nabi Musa tonna anu', bajo-bajonara to Tenda Tongan. Iamo joo nakuanni Puang Allataala to Musa, “Ingaranni! Padami to la mugaraga, la mupasusi ngasanni to apa mangka dipakitanko jao buntu.”

Ibrani 9:24

Na ia to Almaseh te'da namentama tenda passompan panggaraga tolino to bajo-bajona Tenda-Na Puang Allataala jao suruga. Apa mentamai suruga namangngolo lako Puang Allataala. Jaoi tee too la mpangkadananki'.

Yosua 1:15

Mitulungngi narampai to tana la Nabenni PUANG Allataala llan kalambunanna Sa'dan Yordan, tana Kanaan to la napupadang. Ianna torro manyamanmo llan joo tana to Nabenni PUANG Allataala to misompa, mane'ra kamu' wa'ding pole pole' ntee tanami to miniimo torro manyaman inde' kadellekan Sa'dan Yordan to mangkamo naben kamu' Nabi Musa tompangjaman PUANG Allataala.”

Yosua 1:2

“Matemi Nabi Musa, tompangjaman-Na'. Iamo joo la sadiako mujoloananni to to-Israel llambanni Sa'dan Yordan, mitamaii to tana la Kuben kamu'.

Yosua 1:7

Iara ia, la matappa' tonganko mubarani. La mupugauk tongan to sininna atoran to nabenko Nabi Musa tompangjaman-Na', danggi' lalo na den tangmuingaran, dikua na sininna to apa mupugauk la melo assele'na.

Yosua 8:31

Ia joo ngenan pangkaroban diala jio mai batu te'da nadipa', napasitodo' menjaji ngenan pangkaroban, susi to napangparentan Nabi Musa lako to-Israel. Den diuki' llan Sura' Nabi Musa kumua mesa' ngenan pangkaroban dikabua' jio mai batu te'da nadipa', te'da nakannai parewa bassi. Jao joo ngenan pangkaroban nanii to-Israel mpanii passompan karoba lako PUANG Allataala to ditunu pu'puh sola karoba mangsukkuru' dipasalama'.

Yosua 8:33

Ia to to-Israel, tomatua-tua, pangngatoro' surudadu, tomangra'tah kara-kara, la ampu kampong, la tomentoratu llan kampong, ditawa duai, den to ke'deh nnoloi Buntu Gerizim, na den too to nnoloi Buntu Ebal. Na llan tangnga to imang to-Lewi, to mbulle Patti Basse-Na PUANG Allataala. Susimi joo carana to napangparentan Nabi Musa, tompangjaman PUANG Allataala tonna tee, ke la ntarimai barakka' to to-Israel.

Pengkitanna Yahya 15:3

anna makkelong mpukelong kelongna Nabi Musa, taun-Na Puang Allataala, na kelong-Na Anak Bembala' nakua, “Oo, Puang Allataala! Tomakuasaki', liwa' mala'bih na te'da susinna to panggaukan-Ta'. Rajanaki' sininna bangsa, melo na tongan to panggaukan-Ta'.