Ibrani 2:10 - Alkitab Duri

¹⁰ Mangkamo napaden, naampai tarruh tooi Puang Allataala to sininna apa. Naakkattai anna buda tau nasolan Puang Isa lako kamala'biran. Iamo joo napattantui kumua sipato' to Puang Isa mperasai parri' ratu lako mate-Na anna menjaji Tomangpasalama' te'da caccana ba'tu kakuranganna, nawa'ding mpasalama' tau.

Ibrani 2:10 ပူးပေါင်းရင်းမြစ်များ

Kada Bulawan 16:4

Sininna to Napugauk Puang Allataala, pada den tujunna, na ia to dipatujuan togaja', iamo to la dilanynya'i.

Lukas 13:32

Napebalimi Puang Isa nakua, “Malemo kamu' mpauanni Raja Herodes, tokalasi, kumua, ‘Ia tee allo na masawa la nnula'ina' setang na mpamalagah toona' tomasaki. Apa ianna allo mangpentallunnamo la mmangkaina' jaman-Ku'.’

Lukas 2:14

“Pakala'bih Puang Allataala to makuasa jao suruga! Sikalino to tolino to napumasannang!”

Lukas 24:26

Tanglamperasairaka kamaparrisan jolo' to Raja Mangpasalama', namane' ntarima kamala'biran-Na?”

Lukas 24:46

Nakuanni kumua, “Den diuki' lan Sura' Allataala kumua ia to Raja Mangpasalama' la maparri', na la tuo pole' jio mai kamatean, ke allo mangpentallun.

Yahya 11:52

Nate'da na to-Yahudi manda la nasulle, apa la napasirempun too napangmesai to taun-Na Puang Allataala to sisarak-sarakmo.

Yahya 19:30

Nacuccu'i Puang Isa joo anggoro', namane' mangkada nakua, “Mangkami!” Namane' cukku, naka'tu sunga'-Na.

Jamanna Rasulu' 3:15

Mangka mipangpebunoan, nasitonganna Iamo garonto'na katuoanna sininna tau. Apa napatuo pole'mi Puang Allataala jio mai kamatean, na kiissen kumua tongan joo, nasaba' kikita kami'.

Jamanna Rasulu' 5:31

Napamatande napajioi sa'de kanan-Na, namenjaji Raja Mangpasalama', dikua anna den wattunna to bangsa Israel namengkatoba' jio mai dosana na didampangan.

Roma 11:36

Sininna issinna lino panggaragan-Na ngasan Puang Allataala na apan-Na ngasan too, nadipatuju ngasan lako kale-Na. Iamo joo, sipato'ki' mpakala'bih tarruhhi to Puang Allataala te'da cappa'na! Amin.

Roma 9:23

dikua anna mpangpepajanan kamala'biran-Na to napatuju lako kita' tonakamasei. Na mangkamiki' napasadia la ntarimai joo kamala'biran.

1 Korintus 2:7

Apa ia joo kipau, kapaissenan pole jio mai Puang Allataala. Ia joo kapaissenan te'da naissenni tolino, apa napasadiamo Puang Allataala joo kapaissenan tonna te'dapa nadipaden tee lino, antapumala'bihhi.

1 Korintus 8:6

Apa ia ke kita', mesa'ra Puang Allataala. Iamo to Ambe' Puang Allataala to mpadenni to sininna apa, na ia to katuoanta' tapatuju lako kale-Na. Mesa' toora Puang, iamo joo Puang Isa Almaseh. Sininna apa dipaden nasaba' Ia. Ia too mpusaba'i antatuo.

2 Korintus 3:18

Na ia tee too tapupangngarrangmo to kamala'biran-Na Puang, te'damiki' susi to nasamboi kaen to lindota'. Iamo joo samasai-sainna ia to sipa'ta' la susi sipa'-Na Puang, na saendek-endekkena to kamala'biranta' nabenki' Roh Allataala.

2 Korintus 4:17

Ia tee kamaparrisan kiperasai cingga'tu'ra namaringngan too, nalampadenankan kamasannangan te'da susinna na te'da cappa'na.

2 Korintus 5:18

Puang Allataalara to mpugauk ngasanni joo. Nakalino pole'miki' Puang Allataala nasaba' Almaseh, namane' mbenki' jaman kumua na ia to tolaen tapupenjaji todai tonakalino Puang Allataala.

2 Korintus 6:18

La mupuambe'na', na iko la kupuanak. Susimi tee kadan-Na Puang to makuasa.”

Galatia 3:26

Napuanak ngasanmo kamu' Puang Allataala, sanga matappa'mo kamu' lako Puang Isa Almaseh.

Efesus 2:7

Napugaukki susi joo dikua anna pangpekitanni lako tolino to tuo lan wattu la dioloi lako kumua tangdikulle mpikkiri'i to pangpakamoja'-Na sola kameloan penawan-Na lako kita', nasaba' ia to napugauk Puang Isa Almaseh.

Efesus 3:10

Napugaukki Puang Allataala susi joo la mpapajanni to mangrupa-rupa kamaccan-Na sola kapaissenan-Na Puang Allataala lako mangrupa-rupa tomakuasa ba'tu tomangparenta jao langi' ke nakitai to tomatappa' menjaji susi mesa' kale.

Kolose 3:4

Apa ianna ratu pole'mo to Almaseh, to mben kamu' katuoan baru, iamora joo wattu napajan too to kamala'biran-Na Almaseh ammimala'bih sola.

2 Timotius 2:10

Namawatang bangna' ntarima ngasanni, nasaba' kaparalluanna to tau mangkamo napilei Puang Allataala, dikua nalolongan kasalamatan jio mai Puang Isa Almaseh, sola kamala'biran te'da cappa'na.

Ibrani 12:2

La tapugaukmi tapatuju lakoi Puang Isa to penawanta', to mpadenni to kamatapparanta', napupenjajiki' masaranian. Gaja mesirisan joo kamatean jao kaju sitamben. Apa moi nasusi joo te'da nasipattekanni, sanga ia manda naingaran to kamasannangan la naperasai undinna. Na ia tee too cumadokkomi jio kananna cadokkoan mala'bih-Na Puang Allataala namangparenta sola.

Ibrani 6:20

Najoloanmiki' Puang Isa lako ntuu joo, na menjaji Imang Lompota' te'da cappa'na, susi imang Melkisedek.

Ibrani 7:26

Jaji, iamo Imang Lompo taparallui to Puang Isa. Tomelo Ia, te'da sala-Na ba'tu kakurangan-Na. Todipatorro leko' jio mai tomadosa, na dipaendek de' la'bih majaona na ia to langi'.

Ibrani 7:28

Situru' atoranna Nabi Musa ia to tolino biasa diangka' menjaji Imang Lompo moi naden caccana ba'tu kakuranganna. Apa ia to sapah-Na Puang Allataala, to dipau undi na ia to atoranna Nabi Musa, nnangka'i joo Anak to te'da caccana ba'tu te'da kakuranganna menjaji Imang Lompo. Ia joo Anak mangkamo napupenjaji Tomangpasalama' te'da cappa'na.

1 Petrus 1:12

Napauanni Puang Allataala tuu lako nabi, kumua ia joo apa napau jolo te'da nadipatuju lako kalena apa lakora kamu'. Na ia joo apa napau jolo tonna anu' mangka misa'ding tee too, sanga den tau mpangpeissenanni lako kamu' mpake kuasan-Na Roh Allataala to pole jao mai suruga. Na moi malaeka' madoang too mpelalanni joo apa dipau jolo.

1 Petrus 5:1

Kupakainga'i to pekaamberan jamaa lan tangnga-tangngami. Kupauan kamu' tee sanga mesa' todana' pekaamberan jamaa susi kamu', na mangkamo kukita to kamaparrisan-Na Almaseh, na la kuperasai too to kamala'biran-Na Almaseh to la napangpekitan Puang Allataala lako sininna tau keanu'. Kupakainga' tongan kamu',

1 Petrus 5:10

Ia tommimangkamo maparri' cingga'tu', la naben kamu' Puang Allataala to sininna apa miparallui, la napamawatang too kamu', ammisamatappa'-tappa'na, sanga liwa' pangpakamoja'-Na Puang Allataala, to mangkamo mpilei kamu' la mperasai to kamala'biran-Na to te'da cappa'na. Susimi joo sanga da'tan kamu' memmesa' penawa sola Almaseh.

Pengkitanna Yahya 4:11

“Oo, Puangki' Puang Allataala to kisompa! Kita' manda to sipato' ntarima passompa, kamala'biran na kuasa. Nasaba' Kita'mo mpaden ngasanni to sininna apa, na den ngasanmo, natuo, nasaba' pakkaeloran-Ta'.”

Pengkitanna Yahya 7:9

Mangkai joo too ngkita omo' tau liwa' buda, tangdipura dibilang. Ia tuu lako tau pole jio mai simesa'-mesa' rapu tau, tondok, basa na bangsa. Mangpakean malando mabusa ngasan na ntoe palapa palem, mennolo lako Anak Bembala' sola cadokkoan mala'bih lan tangnga.