Daniel 7:20 - Alkitab Duri

²⁰ Madoang toona' nnissenni battuananna to sangpulo tanduk jao ulunna sola to tanduk biccu' mane' ollong arannai tirebu'i to tanduk denmo jolona napollo. Ia to tanduk biccu' den matanna na ia to timunna mpau kada matampo. La'bih mejangngaran ia na ia to tanduk laenna.

Daniel 7:20 ပူးပေါင်းရင်းမြစ်များ

Daniel 7:11

Kukita tarruhhi, sanga ia joo tanduk biccu' matampo bang unapi mangkada, namane' dipatei to olok-olok mangpennappa', na ia to kalena dipembuangan tama api naarannai ma'bong.

Daniel 7:19

Madoangna' nnissenni apa battuananna joo olok-olok mangpennappa', to te'da nasusi olok-olok laenna, to liwa' melajatan. Ia to isinna bassi, na ia to kanukunna tambaga, nagaru'tukki bang naamma'i to apa nakande, nalullu' bangngi to sesanna.

Daniel 7:21

Na kukitai joo tanduk biccu' mangrari nnewa umma'-Na Allataala na ci'di'mora nataloi.

Daniel 7:23

Iamo tee battuananna pengkitangku' to napauanna' joo tau, ‘Ia to olok-olok mangpennappa' iamo kaparentan mangpennappa' to la ollong lan lino, to te'da nasusi to tallu kaparentan jolona. Ia joo kaparentan la nnancuru' lino naamma'i nalullu' tooi to sesanna.

Daniel 7:7

Mangkai joo too, kukita omi lan tindoku', den omo olok-olok mangpennappa', gaja watang naliwa' melajatan. Ia to isinna bassi na gaja tonggo. Nagaru'tukki bang naamma'i to apa nakande, na ia to sesanna nalullu'. Silaenan ia na ia to olok-olok jolona, sangpulo toopa ia tandukkuna.

Daniel 7:8

Ia tongkukita unapi to tandukkuna, tuo omi mesa' to tanduk biccu' jio paralla'na, na tirebu'i to tallu tanduk jolona anna sipolloran. Na ia joo tanduk mane' tuo kemata susi mata tau na ia to timunna mpau kada matampo.

Pengkitanna Yahya 12:3

Ta'pa dikita pole' omi to tanda mejangngaran jao langi'. Den mesa' naga malea liwa' tonggo, ulunna pitu na sangpulo tandukkuna. Ia tuu lako ulunna pada mpake mahkota.