Daniel 5:7 - Alkitab Duri

⁷ Napematonggoi gamaranna na ditambai to tomangbaca-baca, tomacca mbattuananni apa jaji jao langi' sola topakita-kita anna disolan mangngolo lako raja. Nakua raja lako to tomacca, “Inda-inda to tau macca mbacai tee pangnguki' jio rinding, la napauanna' to battuananna, nadipapakei pakean karajaan jio mai kaen makudara' sola rara' bulawan, nadiben kakuasan mangpentallun jio mai kakuasanku' lan tee karajaanku'.”

Daniel 5:7 ပူးပေါင်းရင်းမြစ်များ

Ester 3:1

Ba'tu pirang-pirang taun mangkanna joo, napaendekmi Raja Ahasweros pangka'na to mesa' tau disanga Haman menjaji wakkele' raja. Ia tee Haman, anakkana Hamedata jio mai bati'na Agag.

Kada Bulawan 1:9

nasaba' ia to pangpangngajahna la sampemelo-meloinna sipa'mu, butung to dipasongko'iko bunga me'lok ba'tu rara' llan kollongmu mpamaloloko.

Daniel 1:20

Tuli mekutana raja lako tee kallolo appa', ke denni passalan to la mparallui pangtimbangan sola pangtangngaran mandalan. Arannai naissen raja kumua manglokkon pessangpulo la'bih melo to pangngampa'na joo Daniel sola soba'na na ia to pangngampa'na topaissen-issen na tomangbaca-baca lan sininna kaparentanna.

Daniel 1:4

Iamo to kallolo te'da caccana, melo rupanna, mandalan pangtangngaranna, macca na buda kapaissenanna dikua anna sipato' mangjama lan istana raja. Massua toomi raja, anna ajahhi Aspenas pangnguki' sola basana to-Babel.

Daniel 2:2

Iamo joo natambai ngasanni to topaissen-issen, tomangbaca-baca, sando sola tomacca mbattuananni apa jaji jao langi', la mbattuananni joo tindona. Ia tonna sike'deranmo to tomacca jio olona raja,

Daniel 2:27

Mebalii Daniel nakua, “Tabe' puang, te'da tau ngkullei mpauanki' to apa susi joo, moi tomacca, tomangbaca-baca, topaissen-issen ba'tu topakita-kita.

Daniel 2:48

Mangkai joo too, napaendekmi raja to pangka'na Daniel naben tooi buda paraseng to kaminang maballo. Daniel menjaji tomakuasa lan sininna propinsi Babel, na ngkapalai toopa sininna tomacca lan istana.

Daniel 4:14

Napeandongngi gamaranna nakua, “Ta'bangngi joo barana' sola petangkei tooi. Rondo'i nasisamboran to daunna nasipolloran to buanna! Ake'mo namalai to olok-olok mentiongan jiong garonto'na joo barana' na simentiasan to manuk-manuk jio mai tangkena.

Daniel 5:11

Nasaba' lan tee kaparentanta' den mesa' tau to gaja nabarakka'i roh dewata. Ia tonna ba'tu piran, tonna mangparenta Raja Nebukadnezar ambe'ta', ia joo tau dibarakka'i pangpikkirisan melo sola kamaccan, na kapaissenanna susi kapaissenan dewata. Naangka'i Raja Nebukadnezar joo tau ngkapalai sininna topaissen-issen, tomangbaca-baca, tomacca mbattuananni apa jaji jao langi' sola topakita-kita.

Daniel 5:15

Mangka ngasanmo disolan sininna to tomacca na tomangbaca-baca mangngolo lako aku', apa te'da lalo nnissenni mbattuanannii joo pangnguki' jio rinding.

Daniel 5:16

Mane' kuissenna kumua maccako mbattuanannii sola mapahangko ke denni passalan, iamo joo na ia ke maccako mbacai joo pangnguki' jio rinding sola mpauanna' battuananna, la dipapakeiko pakean karajaan jio mai kaen makudara' sola rara' bulawan, na la kuben tooko kakuasan mangpentallun jio mai kakuasanku' lan tee kaparentanku'.”

Daniel 5:29

Nata'pa mpangparentanni Raja Belsyazar lako pangjamana anna dipapakei baju lando makudara' to Daniel sola rara' bulawan. Naangka' tooi to Daniel menjaji tomakuasa mangpentallun jio mai raja lan kaparentanna.