1 Yahya 2:27 - Alkitab Duri

²⁷ Apa ia to kamu', naparatuanmo kamu' Almaseh to Roh Allataala to torro lan penawammi. Te'da miparallu naajahhi tolaen, nasaba' Ia bang unamo nnajahhi kamu' to sininna apa. Na tongan ngasan to naajaran kamu', tangngia pangnguraga. Iamo joo, la da'tan kamu' mesa' penawa sola Almaseh, susi to naajaran kamu' Roh Allataala.

1 Yahya 2:27 ပူးပေါင်းရင်းမြစ်များ

Kada Bulawan 28:5

Ia to togaja', te'da napahangngi to maruruh mangra'tah, apa ia to tossompa Puang Allataala gaja napahang.

Matius 13:11

Nakuamo Puang Isa mebali, “Dibenmo kamu' barakka' la nnissenni to apa tangnaissen tau kumua la ratui Puang Allataala mangparenta susi Raja, apa ia to tau laen te'da nadipaissenni.

Yahya 14:16

La meta'dana' lako Ambe', naparatuan kamu' tomangpakatana, iamo to Roh Allataala, to la torro tarruhmo ssolan kamu'. Iamo la mpamanassan kamu' to pangngajaran tongan. Ia to tote'da namatappa', te'da nakullei ntarimai, nasaba' te'da nakitai na te'da too naissenni. Apa ia to kamu' miissen, sanga nasolan kamu', nalatorro lan penawammi.

Yahya 14:26

Ia to Roh Allataala, to tomangpakatana, la nasua Ambe' ratu ssullena'. Iamo la nnajahhi kamu' to sininna apa napangngingaran pole' kamu' to apa mangkamo kupauan kamu'.

Yahya 16:13

Apa ianna ratumo joo Roh Allataala, Iamo la mpamanassai to katonganan-Na Puang Allataala, na Ia toomo mpatuju kamu' nnissenni to sininna pangngajaran tongan. Te'da namangkada situru' pakkaeloran-Na, apa sininna to nasa'ding jio mai Aku' iamo napau. Na la napauan too kamu' to apa la jaji keanu'.

Yahya 4:14

Apa ia to tonniso'i to wai la kupangben, te'da lalomo nalamawakke. Sanga ia joo wai la kubenni la menjaji susi kalimbuah tangmate lan kalena na lolong messun mbenni katuoan melo te'da cappa'na.”

Yahya 6:45

Den diuki' lan sura'na nabi kumua, ‘La napaggurui Puang Allataala sininna joo tau.’ Iamo joo ia to tompesa'dingngi Ambe', la ratu lako Aku'.

1 Korintus 2:12

Te'da nabenki' Puang Allataala cara mangpikkiri' susi tolino, apa Roh Allataalara nabenki', dikua antaissen ngasanni to apa mangka nabenki'.

1 Korintus 2:13

Iamo joo, ia ke kipangpeissenanni to kadan-Na Puang Allataala lako tonnampuimo Roh Allataala, te'da kipake kapaissenan tolinoki', apa iara kipake to kada naajarankan Roh Allataala.

2 Korintus 1:21

Iamo mpamawatangki' sola ngasan antamatappa' lako Almaseh napileiki' naputau mesaki'.

Efesus 4:21

Katongananni Ia. Misa'dingmo to pangngajaran-Na. Na mangkamo kamu' diajahhi to sipa'-Na.

Kolose 2:6

Mitarimamo to Puang Isa Almaseh kumua iamo Puangmi. Iamo joo ia to panggaukanmi la situru' panggaukanna to tompupuangngi to Almaseh.

1 Tesalonika 2:13

Denpa mesa' napusaba', angkituli mangkurru sumanga' lako Puang Allataala. Iamo to kumua, ia tongkipangpeissenanni lako kamu' to kareba jio mai Puang Allataala, mipesa'dingngii mitarimai joo kareba, tangngia kumua pole jio mai tolino, apa mikatappa'i kumua pole jio mai Puang Allataala. Tongan kumua kadan-Na Puang Allataala joo kareba, to da'tan mangjama lan penawammi to tomatappa' lako Puang Isa.

1 Tesalonika 4:9

Te'damo kiparallu nnuki'i umbo la mikua mpakamoja' padammi tomatappa', sanga mangkamo kamu' naajahhi Puang Allataala.

1 Timotius 2:7

Na iamo joo naangka'na' Puang Allataala menjaji rasulu' angkudisua male lako sininna bangsa tangngia to-Yahudi la mpangpangngajaranni to kamatapparan tongan. Na tongan tee kupau, te'da kumangnguraga.

1 Petrus 1:23

La sipakamoja' kamu', nasaba' pole jio mai kadan-Na Puang Allataala, ammimenjajimo tobaru susi to dijajian pole', to te'da najaji jio mai tolino to la mate, apa dijajian jiora kamu' mai kada to tuo te'da cappa'na.

1 Yahya 2:28

Ee, tokupuanak! La da'tan kamu' mesa' penawa sola Almaseh, anna ia ke ratu pole'mi, baraniki' sioloan, te'da tamembuni sanga masiri'ki'.

1 Yahya 3:24

Ia ngasan to tonturu' parenta-Na Puang Allataala, mesa' penawami sola Puang Allataala, na Puang Allataala mesa' penawa too sola ia. Na taissen kumua Puang Allataala mesa' penawa sola kita', sanga mangkamiki' naben Roh Allataala.