1 Timotius 4:3 - Alkitab Duri

³ Mangngajahhii tuu lako tau kumua, danggi' nakebaine ba'tu kemuane to tau. Den too kande mattantumo napemalian nakande. Nasitonganna ia joo kande napaden Puang Allataala la dikande, anna ia to tomatappa'mo na nnissen toomo pangngajaran tongan mangkurru sumanga' ngkandei.

1 Timotius 4:3 ပူးပေါင်းရင်းမြစ်များ

Daniel 11:37

Ia joo raja matampo, te'da lalo naangga'i to dewata nasompa tojolona, moi to dewata nasompa baine, ba'tu dewata laen. Nasaba' nnangga'i kalena la'bih makuasa na ia to sininna dewata.

Matius 14:19

Nasuami joo tobuda cumadokko jio reu malammak. Naalami joo lima roti na dua bale, anna mentingngara de' langi' mangkurru sumanga' lako Puang Allataala. Namane' nti'pek-ti'pekki joo roti, nabenni anak gurun-Na anna tawa-tawanni joo tobuda.

Matius 15:11

Te'da na ia to dikandena ncarepai tau, apa iara to messun jio mai timu, anna mentangsipato'mo to tau ssompa Puang Allataala.”

Matius 15:36

Naalami joo pitu roti sola bale'-bale', namangkurru sumanga' lako Puang Allataala. Mangkai joo too nati'pek-ti'pekmi joo roti sola bale, nabenni anak gurun-Na, anna tawa-tawanni joo tobuda.

Lukas 24:30

Ia tonna cumadokko la kumande sola, nnalami roti Puang Isa, namangkurru sumanga' lako Puang Allataala, namane' nti'pek-ti'pekki joo roti natawanni.

Yahya 6:23

Apa ia joo wattu denmi ba'tu pira-pira lopi ratu jio mai kota Tiberias nakenden sikandoppi' to nanii mangka ngkurru sumanga' roti Puang Isa nakande tobuda.

Jamanna Rasulu' 27:35

Mangkanna mangkada susi joo, nnalami roti to Paulus, namangkurru sumanga' lako Puang Allataala jio olona sola ngasanni, namane' nti'pek-ti'pekki nakandei.

Roma 14:17

Ia ke Puang Allataala ngkuasai to katuoanna tau, tangngia dikandena ba'tu diiso'na to parallu, apa iara to kasikalinoan pole' Puang Allataala, mpugauk pakkaeloran-Na, na kamasannangan to nabenni Roh Allataala.

Roma 14:3

Ia to sininna kande wa'ding nakande, danggi' nakita majiongngi to tomattantu bang nakande. Na ia to tomattantu bang nakande, danggi' napasalai to padanna tomatappa' to sininna kande wa'ding nakande, nasaba' natarima toomi Puang Allataala.

Roma 14:6

Nasaba' ia to mpahangngi kumua den allo la'bih melo na ia to allo laenna, napugaukki susi joo anna pakala'bih Puang Allataala. Na ia to tote'da apa tangnakande, napugaukki susi joo anna pakala'bih Puang, nasaba' mangkurru sumanga' lakoi Puang Allataala. Ia to tomattantu kandena napugauk too susi joo.

1 Korintus 6:13

Den too tomangkada kumua, ia to kinande nandena ba'tang, na ia to ba'tang dipasadian nande. Apa pada la nalanynyasanni Puang Allataala. Ia to batang kale te'da nadipaden la manggauk sala, apa dipadenri la ssompa Puang, na Iamora ngkuasaii to batang kale.

1 Korintus 7:28

Apa tangngia dosa ke kebaine kamu'. Na ia ke den ana'dara kemuane, tangngia too ia dosa. Ia mandara ia to kumua, ia to tokebalimo nnoloi buda parri'. Na ia ke elohku', kukua kenna te'da nakanna kamu' kamaparrisan.

1 Korintus 8:8

Sitonganna te'da natongan kumua natarimaki' Puang Allataala sanga kande, na te'da too natongan kumua tangnatarimaki' Puang Allataala sanga kande. Nasaba' takandei ba'tu tangtakandei joo juku', te'dara apa tapusaro ba'tu tapurugi.

Kolose 2:16

Iamo joo danggi' naden tau mpasala kamu', sanga te'da mituru' pemali kumande ba'tu nniso', ba'tu atoran allo lompona agama, pangramean bulan mane' ollong ba'tu Allo Katorroan.

Kolose 3:17

Moi apa mipugauk ba'tu mipau, ia to panggaukanmi la situru' panggaukanna umma'-Na Puang Isa. Mangkurru sumanga' kamu' lako Ambe' Puang Allataala, nasaba' apa to napugauk Puang Isa lako kalemi.

1 Timotius 2:4

Madoangngi Puang anna dipasalama' ngasan to tau sola nnissen pangngajaran tongan, kumua

1 Timotius 4:4

Melo ngasan to napaden Puang Allataala, na moi mesa' te'da to diharangan dikande, ke mangkurru sumanga'ki' ntarimai.

1 Timotius 5:14

Iamo joo kukabudai ke ia to baine malolle'pa nakemuane pole', keanak, na nnurusu' repokkona, anna ia to ewalinta' te'damo lalan nanii mpau gaja' tomatappa'.

Ibrani 13:4

La mikasiri' sola ngasan to kasibalian, na ia to tosibali danggi' naangah tolaen nasolan mamma', sanga ia to tomanggauk sala la nasessai Puang Allataala.

Ibrani 13:9

Danggi' mieloranni to mangrupa-rupa pangngajaran to sisala Kareba Kasalamatan mpatuju sala kamu'. Iara to kameloan penawan-Na Puang Allataala to la mpamawatang penawanta', tangngiara kande. Ia joo atoran kande te'da lalomo bua'na lako tonturu'i.