1 Korintus 8:7 - Alkitab Duri

⁷ Apa moi nasusi joo te'da na ia ngasan tomatappa' nnissenni kumua te'da dewata kepenawa. Denpa tomatappa' mpatuju lakopa dewata penawanna, sanga ia tonna jolona dewatara nasompa. Iamo joo ratu lako too allo, nasanga kumua ia to juku' mangka dipassompan lako dewata, kandena dewata. Jaji, ianna kandei joo juku', nasanga kumua madosai, nasaba' sitawa-tawai to penawanna kumua wa'dingraka dikande joo juku' mangka dipassompan lako dewata ba'tu te'daraka.

1 Korintus 8:7 ပူးပေါင်းရင်းမြစ်များ

Roma 14:14

Kukanassai, nasaba' memmesa' penawamo' sola Puang Isa, kumua sitonganna te'da ia kande harang, apa ia takua kita' lan penawanta' harang, tantu harang lako kaleta'.

Jamanna Rasulu' 15:20

Apa paralluki' ngkiringanni sura' mpakainga'i, dikua danggi' nakande kande diharangan, susinna moda', rara na kande mangka dipassompan lako dewata, iarika danggi' namanggauk sala.

Roma 15:14

Ee, tokupusile'to! Kukanassai kumua buda kameloanmi, na miissen melo to pangngajaran-Na Puang ammiwa'ding nnajahhi tau laen.

1 Korintus 8:1

Ia omo la kupau tee too to juku' dipassompan lako dewata. Tonganna to nasanga tau kumua macca ngasanmiki'! Apa ia joo kamaccan mpupemmatampo tau, na ia to pangpakamoja' mangpamasumanga' tau.

1 Korintus 8:4

Ia to juku' mangka dipassompan lako dewata, wa'dingraka dikande ba'tu te'daraka? Taissen kumua te'da ia dewata kepenawa, sanga mesa'ra Puang Allataala na te'da laenna,

1 Korintus 10:25

Wa'ding mikande to sininna juku' dibaluk jio pasa'. Danggi'mo milamparessa opi jolo' kumua mangkaraka dipassompan lako dewata iarika te'da. Ia to penawammi danggi' nasitawa-tawa ngkandei joo juku'.

1 Tesalonika 5:14

Ee, tomala'bihku' sola ngasan! Meta'da tookan ammipangkadai rampa'i to tomakuttu mangjama. Pamasumanga'i to tomalaja'. Tulungngi to toparallu ditulung. Sabbara' kamu' lako sininna tau.