Romans 7:22 - Bo-Ung NT

²² Sika nanga numanuna sukundu Pulu Yili-nga ung-manima kanupu kaí piliipu ‘Aima teambuka!’ nimbu piliiliu,

Romans 7:22 ပူးပေါင်းရင်းမြစ်များ

John 4:34

Yesos-ni nimba mele: “Nanga langiele i-sipa mele: Na ‘kongun teani pui.’ nimba liipa mundurum yili-ni numanu silimú uluma tepu, yunga kongunale tepu pora simbu. Akili nanga langiele.

Romans 2:29

Yambu te numanuna sukundu ulu te telemú akili mindi sika Juda-yambale molemú. Kangi te kopsiku wendu liilimele akiliinga pulele numanuna sukundu Pulu Yili-nga yambale nimba makó pelemú. ‘Kangi te i-siku kopsiku wendu liangi.’ nilimú ung-manele-ni yununu ulu te naa telemú. Pulu Yili-nga Minéle-ni numanuna sukundu telemú akili-ni yambu kanili liipa tapunjilimú. Yambu akili, we-yambuma-ni kanuku kaí piliiku kape niku bi paka naa tonjilimele, Pulu Yili-ni yu kanupa kaí piliipa kape nimba yunga bili paka tonjulemú.

Romans 8:7

Yambu te ui-we-numanu-kísele numanu kimbu-sipa molemú yambale-ni Pulu Yili-nga ung-manima naa piliipa liipa telemáliinga yunu Pulu Yili-kene ele-túli molemú. Yambu kanili Pulu Yili-nga ung-manima kapula piliipa liipa temba kupulanumele aima naa lelemúko.

2 Corinthians 4:16

Aku [teliu ulele-ni eni aku-sipa tepa liilimú, na kene eni kene oliu aku-sipa ulu kaíma wendu ombá mele] piliipu kene [bunima na-kene wendu olemú kene] ‘Apa, enembu tokum. Kongunale kelambunje!’ nimbu numanuna buni pípili naa moliu. Sika nanga kangiele kolemú akiliinga-pe taki-taki mini numanusele kona pupa mindi pelemú.

Ephesians 3:16

Na-ni [‘Lapale-kene ung niambu.’ nimbu yu molemúna koporungu langupu kene] yu-kene ung nimbu mawa tepu kene nimbu mele: ‘Yunga méle aima kaí nosilimáliinga ‘Eninga numanuma tondulu pupili.’ nimba yunga tondulale eni sipili.’ nimbu mawa teker. Tondulu akili yunga Minéle [eni-kene molupa kene eni tondulu] silimú kanili.

Colossians 3:9

Ui-we-numanuma kene numanu akuma-ni piliiku tiring uluma kene munduku kelku, ‘Yambu konama molamili.’ niku Krais liiringeliinga eni yambu konama tepa mimi tirim Pulu Yili-ni eni numanu kona te liipa panjunjurum, yandupa-yandupa ‘yu molemú mele eni olandupa-olandupa piliiku kene aku-siku molangi.’ nimba aku telemáliinga anju-yandu gólu naa tai.

Hebrews 8:10

Isrele-ni kalupa liirim yambuma-kene kelepu tembu mele penga ung kona te nimbu panjipu mi lembu, akili i-sipa mele: [‘Enini teku mulungí kene na-ni enini kanupu kaí piliimbu.’ nirindu mele ‘numanale-ni piliiku kaí teangi.’ nimbu] [I-siku teai! I-siku naa teai!” nimbu] nanga ung-manima eninga numanuna pípili panjinjipu, ‘Nanga ung-manima numanu monjuku ‘piliipu teamili.’ niku molangi.’ nimbu na-ni ung-mani kanuma buk-mele eninga numanuna bi tombu. Na mindi enini piliiku popu tungí Pulu Yili molumbu, enini na-ni nokumbu yambuma mulungí.

1 Peter 3:4

[‘Oliu ambu kaíma kanuku niangi.’ niku kene] méle aima kaí, kis naa lembama-ni eninga numanuna sukundu au sai. Méle akuma eni numanu kaí pepa, numanu tiluna pupili táka-niku mulungí ulele. Ulu akili kanupa kene Pulu Yili-ni ‘Méle aima kaí olandupale.’ nimba kanolemú.