2 Timothy 3:16 - Bo-Ung NT

¹⁶ Pulu Yili-nga bukna molemú ungma pali Pulu Yili-nga Minéle-ni nimba sirim-na piliiku kene turing. Ung akuma-ni yambuma liipa tapunjilimú akili i-sipa mele: Ung akuma-ni oliu [Pulu Yili-nga yambuma molomulú mele] ung-bo tonjupa, [ulu-pulu-kis telemuluma ‘naa teamili.’ nimba] mani sipa, [ulu-pulu-kísima mundupu kelepu molupu konjumulú mele] ung-bo tonjupa, [Pulu Yili-ni “Teku molai.” nimba, ulu sumbi-nílima nimba kanolemú uluma temulú mele] mani silimú.

2 Timothy 3:16 ပူးပေါင်းရင်းမြစ်များ

Matthew 13:52

Yunu-ni eninindu nimba mele: “Aku lem Pulu Yili-nga ung-manimanga puluma piliiku mani siku ung-bo tonjilimele yima-ni Pulu Yili yi nuim kingele molupa yambuma nokulemáliinga ungma mani sipu ung-bo tonjilimulu kene piliiku liiku molemele yima enini i-sipa mele: Lku pulu yi te-ni yunga méle kaí lupa-lupa nosilimáliinga méle konama kene méle uima kene wasie wendu liilimú.” nirim.

Matthew 21:42

Yesos-ni [Pulu Yili-nga Juda-yambuma nukuring yima-ni yunu toku kunjingí mele piliipaliinga] eninindu nimba mele: “Pulu Yili-nga bukna sukundu molemú ung te kanuku naa piliilimiliye? [Ung akili i-sipa mele:] “Lku takuring yima-ni kanuku kis piliiku toku munduku kiliring ku-mulú kanili ekupu kelepa lku-paka-sum mele lku tepa tondulu munduli ku-mulú auli kaiéle. Auliele-ni ulu akili tirim oliu-ni kanupu aima kaí piliilimulu.” Konana 118:22-23 nimba molemú kanili.

Matthew 22:43

Yu-ni alsupa enini walsipa nimba mele: “Aku lem [Pulu Yili-nga] Minéle Depit-nga numanuna molupa kene ung te nirim kene Depit-ni piliipaliinga yi-nuim Kraisele-ndu “Auliele” nirim akili nambimuna nirim niku piliikimiliye? Depit yu-ni [yi-nuim Kraisele molumba mele] i-sipa nirim:

Matthew 26:54

Akiliinga-pe [angkellama-ni oku ele-túma-ni na ‘naa tangi.’ niku teku liilkemelanje] Pulu Yili-nga bukna na-kene wendu ombá nimba molemú mele nambi-sipa wendu olkaye?” nirim.

Matthew 26:56

Akiliinga-pe i-sipa wendu okum uluma pali Pulu Yili-ni “Ninjai!” nimba ung nimba sirimuma piliiku yambuma niku siring yi mare-ni ulu mare [na-kene] penga wendu ombá mele ui niku bukna turing molemú mele kamu wendu okum.” nirim. Kanu-kene yu lumbili andúlima pali [‘Oliu wasie ka singínje.’ niku piliiku kene] yu munduku kelku enini takara toku puring.

Mark 12:24

Yesos-ni eninindu pundu topa nimba mele: “Eni Pulu Yili-nga bukna ung molemúma kene, Pulu Yili-kene tondulu pelemú mele kene, naa piliiku lu liilimeláliinga [yambuma penga tengélendu nikimili mele piliiku sunduku gólu tokomele].

Mark 12:36

[Aku-siku nilimele yima-ni] Depit yu-ni yunu [yi kanilindu nirim mele naa piliilimilinje.] Mini Kake Tiliele Depit-nga numanuna mulurum kene Depit yu-ni [yi Kraisele molumba mele] nimba mele: “Auli [Pulu Yi Yawe-ni] nanga Auliele-ndu nimba mele: “‘Nunga ele-túma nu-ni nokani.’ nimbu, pe enini topu mania mundunjumbu akiliinga isili-ui nu [na kene wasie tapú topulu yi-nuimsele molupulu mélema nokambili] nanga ki-bokundu oku molui.” nirim.” Konana 110:1 nimba Depit-ni nirim kanili.

John 10:35

Pulu Yili-nga bukna ung molemále-ni gólu naa tolemú, ung nilimúma pepa mindi pulimú kanili. Pe Pulu Yili-ni yunga ung piliiring yambumandu “pulu yima.” nirim lem

John 3:20

Yambu ulu-pulu-kísima telemelema-ni pa tiliele kanuku kis piliiku kene, ‘Pa tíliele-ni nanga uluma tepa mokeringa lenjemba.’ niku pa tílina wendu naa olemele.

Acts 1:16

“Angmene, Mini Kake Tiliele-ni [yi nuim king] Depit-nga kerina penga wendu ombá mele nirim yunu-ni bukna turum akili mele yu aima sika aku-sipa wendu ombálendu nirim. Akili aima sika wendu urum. Ung kanili Judas-ni Yesos yunu ele-tu yima liipa simba Depit-ni uinga nirim ung kaniliinga pulele talku wendu urum.

Acts 18:25

Auliele-ni yambuma molku kunjingíndu tingí kupulanumele akisinjirim akili uinga yunu ung-bo tonjuku mani siring piliipaliinga, Auli Yesos-nga temanele yambuma sumbi-sipa ung-bo tonjupa, aima tondulu mundupa nirim, akiliinga-pe yunu No-Liinjili Jon-ni yambuma no liinjimbandu ung-mani sirim akili mindi piliipaliinga mani sipa ung-bo tunjurum.

Acts 20:20

‘Eni temani kaiéle topu simbundu mundupu naa kelambu.’ nimbuliinga, eni liipu tapunjumba temani-kaiéle mundu-mong naa tenjipu topu silsiliipu andupu, máku turingmanga kepe eninga lkumanga kepe eni ungma pali mani sipu ung-bo tunjurundu kanili eni kanuku piliilimili.

Acts 20:27

Na-ni eni piliiku molangi Pulu Yili-ni “Tembu.” nimba, nimba panjurum mele uluma pali ‘Mundupu naa kelambu.’ nimbu mundu-mong naa tenjipu sumbi-sipu eni nimbu sirindu kanili.

Acts 28:25

Poll-ni enini ung te ‘Aima piliangi!’ nimba eninindu ung te kam-kamu nimba mele: “‘Eninga anda-kolepalima piliangi.’ nimba Mini Kake Tiliele-ni yi Asayandu “Ninjui!” nimba, ung nimba sirim ungele piliipa eni yandu nimba sirimele sika nirim. [Mini Kake Tiliele-ni Asayandu nirim akili i-sipa mele:] “Nu yambu molemele ilinga pukunu i-siku ni-pui: “Pulu Yili-ni nimba mele: “Eni kum leku ungma piliingí akiliinga-pe ung-pulele naa piliingí; mélema nem-nemi niku kanungí akiliinga-pe mélale kanuku bi naa singí. Eninga numanuma kamu pipi silimele; kumele-ni piliingíndu enembu kolemele; ‘Méle te mongale-ni naa kanomulú.’ niku mong kumbulimeláliinga aku-siku tingí. Aku-siku naa telkemelanje mongale-ni sika kanuku, kumele-ni sika piliiku, numanale-ni sika ung-pulele piliikuliinga, numanu topele toku na moliuna olkemelanje na-ni enini [kuru turum-ma] tepu kaí telka.” nikem.” ni.” Asaya 6:9-10 nirim-na [piliipaliinga Asaya-ni aku-sipa nirim]. Mini Kake Tiliele-ni Asayanga kerina nirim mele eni Juda-yambumanga anda-kolepalima-ni ui aku-siku tiring mele eni sika ekupu aku-siku telemeláliinga eni ung ili piliai: Pulu Yili-ni yambuma tepa liipa, enini mindili nolkemela kupulanum-na wendu liipa, yunu-kene wasie molku kunjingí kupulanum-na liipa monjumba mele ‘Juda-yambu ulsukundu molemele yambu-lupama piliangi.’ nimba Pulu Yili-ni oliu [Juda-]yi mare [yambu-lupama] muluringna liipa mundurum. Yambu kanuma-ni ung kanili sika piliiku liingí.” nirim. Poll-ni aku-sipa nirim kene Juda-yambuma enini tombulku nilsiliiku numanu pulele liiku mundulsiliiku puring.

Romans 15:4

Ui [Pulu Yili-nga] bukna bi turing ung akuma-ni pali oliu ung-bo tonjupa mani simbandu molemú. ‘Oliunga numanu tondulu pupili enembu naa kolupu Krais ambulupu kene ‘Pulu Yili-ni oliu tepa liimba enale sika ombá.’ nimbu tondulu mundupu piliipu nokupu molamili.’ nimba Pulu Yili-ni ‘Ung akuma piliangi akiliinga bukna tangi.’ nirim-na turing molemú.

Romans 3:2

Ama, Pulu Yili-ni Juda-yambuma ola-kilia naa liipa tapunjulimúye? Aima sika ola-kilia liipa tapunjilimú. Ung kumbinale i-sipa mele: Pulu Yili-ni yunga ungma ‘Juda-yambuma-ni nokangi.’ nimba sirim.

Romans 4:23

‘Pulu Yili-ni yunu ‘yi sumbi-nili te’ nimba kanurum.’ ung kanili ‘Eprayam yunga mindi.’ niku ung kanili bukna naa tunjuring.

1 Corinthians 12:7

[Krais-nga yambuma pali] ‘Anju-yandu liiku tapunjangi.’ nimba Minéle-ni oliu tonduluma lupa-lupa moke tepa silimú. We naa silimú.

Galatians 3:8

Penga wendu ombá mele Pulu Yili-nga bukna ui mulurum. Penga Juda-yambu naa molku yambu-lupama-ni ‘Sika’ niku tondulu munduku piliingéliinga Pulu Yili-ni enini kanupa kene ‘Eninga ulu-pulu-kísima mundupu kelepu, ‘numanu sumbi nimba pípili molemele yambuma’ nimbu kanombu.’ nimbá mele Pulu Yili-ni ui Eprayam-ndu temani-kaiéle pemba mele topa sipa kene nimba mele: ‘ “Nu-ni kalku liini yi te-ni tembaliinga ma-koleana yambuma pali membu pemba kene molku kunjingí.” nirim.’ Ui-Pulu-Pulu 12:3, (18:18), 22:18, 26:4 nimba molemú.

2 Timothy 2:25

yu uluma tepa ung nimba silimú mele kanuku kis piliiku yu toku mania munjungí tingí yambuma teku kis-silimele mele nimba para simbandu táka-nimba mani sipili. Yu-ni aku temba kene Pulu Yili-ni yambu kanuma liipa tapunjupa, numanu topele toku, telemele mele piliiku kis piliiku munduku kelku ung-sikama tondulu munduku piliingí kupulanumele akisinjimbanje.

2 Timothy 4:2

[Krais-nga] ungma yambuma nikunu si. Nikunu sini kene yambuma ung piliingí kene mola naa piliingí kene kepe taki-taki ungma niku sikunu munduku naa kelkunu, ‘Eninga ulu telemelema ‘Tepu kis-silimulu.’ niku piliiku numanu topele tangi.’ nikunu mani sikunu, ulu-pulu-kis telemelema naa teangi ung-mura siku mani sikunu, ‘Enini Pulu Yili-ni kanupa kaí piliilimú uluma teku numanu tondulu pupili molangi.’ nikunu mani si. Enini mani sinindu taki-taki andiki tekunu táka-niku mimi-siku mani si.

Hebrews 11:1

[“Pulu Yili ‘Sika’ nimbu tondulu mundupu piliilimulu.”] niker tondulu mundupa pilíílieliinga ung-pulu akili i-sipa mele: Pulu Yili-ni oliu “Simbu.” nimba, nimba panjurum mélema ‘Aima sika liimulú.’ nimbu tondulu mundupu piliipu nokupu molemulu. Mélema mongale-ni naa kanolemulu akiliinga-pe ‘Méle akuma aima sika lelemú.’ nimbu tondulu mundupu piliilimulu.

Hebrews 3:7

Pe ekupu [oliu Pulu Yili-nga yambuma molemul]áliinga Mini Kake Tiliele-ni nilimú mele piliamili. Yu-ni nimba mele: “Pulu Yili-ni ekupu nikem ungele ekupu pilííngi lem

Hebrews 4:12

[Nirim mele sika aku-sipa wendu urum piliipuliinga] ‘Pulu Yili-ni nirim ungele we naa molemú. Yunga ungele kona molupa uluma tepa tondulu pulimú.’ nimbu piliilimulu. Ung kanili nánga aima molemú, ele tili lu-koya ekendu-ekendu nánga molemú akili mandupa, yu aima olandupa. Ele tili lu-koyale-ni ombeliele kene kikimele kene sumbi-sipa topa suru tolemú mele Pulu Yili-nga ungele-ni aku-sipa minéle kene numanale kene topa suru tolemú. Akiliinga, oliu numanu liipu mundulimulu mele kene, numanale-ni piliipu ‘Temulú.’ nimbu piliilimulu mele kene, pali piliipa apurulimú.