1 Timothy 3:8 - Bo-Ung NT

⁸ Krais-nga yambu-talapeliinga kongun tinjili yi mulungíma enini kepe aku-siku mele molku konjangi: Yambuma-ni enini kanuku kaí piliiku eninga ungma liiku ai-siku, ‘enini oliunga kongun tinjili yima mulúngi lem kapula.’ ningí uluma teku kene kongun tingíndu mimi-siku piliiku táka-niku tingí yima molku; numanuna ung lupa-lupama piliiku kerina ung lupa-lupama niku naa teku, yambu marendu ung lupa-lupama niku marendu alowa teku ung lupa-lupama niku naa teku; no-tondulu pulele noku kelep naa toku, ‘[Krais-nga] yambumanga kongun tenjipu kene ku-moni pulele liimbu.’ ningí yima naa molangi.

1 Timothy 3:8 ပူးပေါင်းရင်းမြစ်များ

Romans 3:13

“Eninga kerima yambu-ónu-kolea kusi ukulemele we lelemú mele angiliimú; kerima-ni ung pulele gólu toku mindi nilimele.” Konana 5:9 “Wambiyemanga kerina kupuná pelemú mele eninga kerimanga aku-sipa yambuma teku kis-silimele ungma pelemú.” Konana 140:3

Philippians 1:1

Na Poll kene Timoti olsu, Krais Yesos-nga kongun kendemande tinjili yisele-ni Eni Pulu Yili-nga yambu kake tílima kolea-auli Pillipai molemelema pepá ili topu sikembulu. Eni ung piliili yambuma kene, eninga tápu-yima kene, Krais-nga yambumanga kongun tinjili yima kene, eni pali pepá ili topu sikembulu.

1 Timothy 3:12

Krais-nga yambu-talapeliinga kongun tenjimba yili yu ambu tilueliinga yili mindi mulupili. Yunga ambu kangambulama nokupa konjupa, yunga kangambulama yunga ungma táka-niku piliiku liiku, liiku ai siku mulungí mele mani sipa kunjupili.

1 Timothy 3:2

Akiliinga, Krais-nga yambumanga tápu-yili molumba yili yu yi aima sumbi-nili yi te molupa, yambuma-ni kanuku kis piliingí ulu te yu-kene naa pili yili mulupili. Tápu-yi molumba yili yu ambu tilueliinga yili mindi mulupili. Yu molupa konjupa, ulu kaíma mindi numanu kimbu-sipa, kimbu ki kangi numanu mélema waka kolupa temba mele mimi-sipa nokupa, yambuma-ni yu kanuku kaí piliiku yunga ungma liiku ai singí ulu kaíma mindi tepa, yunga lkuna ungí yambuma ‘Sukundu wai.’ nimba nokupa konjupa, [Pulu Yili-nga ungma] yambuma aima mimi-siku piliingí mele sumbi-sipa ung-bo tonjumba mele mimi-sipa piliipa, aku-sipa yili mulupili.

1 Timothy 3:3

No nomba kelep naa topa, yambuma-kene arerembi kolupa ele naa tepa, yambuma-kene táka-nimba molupa, ung-muranale numanu sipa temba yi te naa molupa, ku-moni olandupa numanu naa munjupili.

1 Timothy 5:23

[Akiliinga-pe ‘Sumbi-sipu molambu.’ nikunu] bo-no mendepulu nollu mele penga aku-sikunu naa ti. Nu kuru taki-taki topa nunga oluna kapula naa telemáliinga ‘Kuru pora nimba kangi tondulu pupili.’ nikunu no-waen kolte nui.)

Titus 1:7

Krais-nga yambu-talapemanga tápu-yima-ni Pulu Yili-nga kongunale nokolemeláliinga yambuma-ni kanuku kis piliingí ulu te enini-kene naa pili yima molangi. ‘Oliu aima piliipa kungnjuli pelemú yima.’ niku yambuma tondulu munduku nokuku, nondupa arerembi kolku, no-tondulu nungíndu ‘Pulele nombú kene kelep tombu.’ niku naa piliiku walu-siku noku, yambuma-kene ele teku, ku-moni kene mélema kene yama panjiku ‘Kongun akiliinga ku-moni pulele wa-mele liimulú.’ niku, aku-siku molku kis-singí yima ‘Tápu-yima naa molangi.’ nikunu makó naa tui.

Titus 2:3

Aku-sikuko ámbu-ambúma mani sikunu kene nikunu mele: “Pulu Yili-nga ungma táka-niku piliiku yu-ni kanupa kaí piliilimú uluma teku molku, yambumanga ung-bulkundu naa ninjiku, ‘No-tonduluma-ni enini naa ambulupili.’ niku molku, [ambuma kene eninga kangambulama kene] ulu-kaí tingíma mani sangi.” ni.

James 3:10

Keri tiluna [Pulu Yili mola yambu te] kape nimba bi paka tonjulemú ung kaíma kene nimba kis-silimú ung kísima kene wendu olemú. Nanga angmene, aku-sipa ulele ulu kaí te mólu.

1 Peter 5:2

“Pulu Yili-nga sipsip eni nokolemelema mimi-siku tápu-teku nokai.” niker. [Pulu Yili-ni] kongun ili ‘Eni teangi.’ nimba sirim akili ‘ ‘Teai.’ nikem akiliinga teamili.’ niku numanu kis panjiku we naa teai. Numanu waengu nipili teai. [Pulu Yili-ni ‘Teai.’ nirim] kongun akili ‘Ku-moni liimulú.’ niku naa teai. ‘Yambuma aima liipu tapunjupu nokamili.’ niku aima numanu siku teai.