1 Corinthians 5:5 - Bo-Ung NT

⁵ [Aku-sipu máku topu molomulú] kene ne tepa kis-silimú yili ‘[Kurumanga nuim] Seten-ni yu nukupili.’ niku yu Seten liiku sangi. [Ya ma-koleana] Seten-ni ne yili yunga kangiele tepa kis-simba mindili nombá kene [yu numanu topele tombanje. Pe] Auliele omba yambumanga kot piliimba enaliinga ‘Yili-nga minéle kolea-kísina naa pupa mindili naa nombá, yu-kene wasie molupa konjumba.’ niku yili yu-kene aku-siku teai.

1 Corinthians 5:5 ပူးပေါင်းရင်းမြစ်များ

Matthew 4:10

Kanu-kene Yesos-ni yundu nimba mele: “Seten, nu anju pa! Pulu Yili-nga bukele-ni nimba mele: ‘Pulu Yili eninga Auliele mindi niku popu toku bi paka tonjuku, yunga kongunuma mindi tenjiku molai.’ Ung-Manima 6:13 nimba molemú kanili.” nirim.

Luke 22:31

[Aku-sipa nimba kene, Yesos-ni yu lumbili anduli yi Pita-ndu nimba mele:] “Saimon, pília! [Kurumanga nuim] Seten-ni Pulu Yili-ndu mawa tepa kene nimba mele: “Eni teku kis-singínje manda lepu kundi topu kanambu.” nirim kene Pulu Yili-ni “Kapula.” nirim.

1 Corinthians 1:8

Oliunga Auli Yesos Krais ombá enale wendu ombá kene ‘[Pulu Yili-ni] “Teku kis-siringeliinga mong liangi.” nimbá ulu te eni-kene naa pípili.’ nimba yu-ni ‘Eni taki-taki tondulu munduku molangi.’ nilimú mele penga kepe nimbá.

1 Corinthians 11:32

‘Ya ma-koleana yambuma teku kis-silimelaliinga Pulu Yili-ni enini kolea-kísina liipa mundumba kene oliu wasie aku-sipa naa tipili.’ nimba Auliele-ni oliu ulu telemuluma kanupa kis piliipa kene oliu mani simbandu ulu-bunima silimú.

1 Corinthians 5:13

[Krais-nga yambu-talapena] ulsukundu molemele yambuma Pulu Yili-ni yunu kanupa apurumba. [Akiliinga-pe eni Pulu Yili-nga bukna ung te molemú mele piliangi niambu. Ung kanili i-sipa mele:] ‘Eni-kene tiluna tapú-topa molemú yambu te-ni uluma tepa kis-sipa mindi tepa mulúm lem yambu kis kanili toku makuruku ulsu mundai.’ Ung-Manima 17:7, 19:21, 21:21, 22:21,24, 24:7 nilimú, [aku mele piliiku teangi.]

2 Corinthians 10:6

[Eni Korin-yambuma kepe,] ‘Eni wema-ni [numanu topele toku] na-ni “Teai.” niker ungele piliiku liiku teku mulungí kene kanupuliinga nanga ungma ‘naa piliimulú.’ niku liiku su singí yambuma [ombu] mindili nangi simbu.’ nimbu nokupu moliu.

2 Corinthians 12:7

Pulu Yili-ni na mulú-koleana memba pupa na méle aima kaíma liipa ora sirim kanurundeliinga [na aima kara pulka akiliinga-pe Pulu Yili-ni] Na ‘kara naa pambu.’ nimba nanga kangikundu mindili nombu molumbu méle te sirim. Méle akili [kurumanga nuim] Seten-nga kendemande te-ni ‘Na mindili nambu.’ nimba taki-taki mindili silimú. [Pulu Yili-ni] ‘ ‘Na-nanu yi-auliele moliu.’ nimbu naa piliambu.’ nimba kene na-kene ‘aku-sipa buni wendu upili.’ nirim.

2 Corinthians 13:10

‘Auliele-ni ‘Na yunga kongunale tenjani.’ nimba eni tondulu munduku mulungí nambale na sirim namba akili-ni eni molemelena ombu kene na-ni eni tondulu mundupu mani naa sambu.’ nimbu na kolea suluna molupu kene pepá ili eni topu sipu [‘olandupa-olandupa sumbi-siku molangi].’ niker. Auliele-ni ‘Eni molku kis-singí kongunale teani.’ nimba na nambale naa sirim kanili.

Philippians 1:6

Na-ni piliipu kene, ‘Pulu Yili-ni eninga numanuna kongun pulu monjupa tirim kongun kaiéle telsiliipa pupa mindi molupa, Krais Yesos yandu omba oliu liimba enaliinga kongun kanili tepa pora simba.’ nimbu tondulu mundupu piliiliu.

1 Timothy 1:20

Aku tiring yambumanga yi Ameniyas kene Alleksenda kene elsele aku-sikulu tiringleliinga ‘[kurumanga nuim] Seten mulurumna pangli.’ nimbu liipu mundurundu. ‘Aku-siku molkulu kis-sikulu kene Pulu Yili ung-taka tonjukulu yunga bili teku kis naa singlí mele piliangili.’ nimbu aku-sipu tirindu.

2 Timothy 1:18

Kot-enale wendu ombá kene Auliele-ni yu kondu kolupa tepa kunjupili. Na kolea-auli Epesas mulurundu kene kepe yu-ni na wale pulele liipa tapunjurum mele [Timoti] nu piliillu kanili.

1 John 5:16

Krais-nga yambu te-ni Krais-nga yambu te ulu-pulu-kis te temba kanupa kene, ulu-pulu-kis temba akiliinga yu kolumba ulu te naa pimu lem nimba ulu-pulu-kis temba mele kanomba yambale-ni angin kaniliinga Pulu Yili mawa tinjipili. Aku-sipa temba kene Pulu Yili-ni yu ‘alsupa kona mulupili.’ nimbá. We ulu-pulu-kísimandu niker. Yambu te-ni ulu-pulu-kis te tembaliinga yu kolumba ulu-pulu te aima sika pelemú, yambu te-ni ulu-pulu-kis kanili temba kene ‘Yambu kaniliinga Pulu Yili mawa tenjangi.’ nimbu naa niker.