IBIRO 13:4 - Murle

⁴ Abon azooni ɔl dook kɛɛr o rociinto. Abon ɛɛti ki ŋaa cin arɛɛzɔ, ma aziiknɔ niigi dook juruŋ calaŋ arɛɛca bodo bitaala eo aricanonɛkɛ nɔɔgɔ, eeci mã agoonek ɛɛti ŋaa cin kaal ci gɛr karabɔŋ arɛɛca niini, didilɛ apayek koca Jooi nɔɔnɔ gerzitin.

IBIRO 13:4 ပူးပေါင်းရင်းမြစ်များ

ƐƐNYCAN O LOOCU 2:21

Anyewun ni Jooi nɔɔnɔ kɛtɛɛda ooŋnya. Mazi ŋaan ɔɔŋ nɔkɔ, aara onyit cin codoi, ma arigzek ŋinito idiŋ.

ƐƐNYCAN O LOOCU 2:24

Nici zin gi o gɔɔn ooŋni ɛɛti baatin ki yaatin, ma aromɛn kibeen ŋaa onin o nɛɛn, ka kiziti niigi ɛlɛ codoi.

1 KORINTIYA 6:18

Zin giye nico edeya eleeti waaŋa. Kaala ci gɛrzɛ ogɛn alaŋ anyaak ɛlɛ gerzitin bitaala, bar mazi agɔɔn ɛɛti waaŋ, anyaak ɛlɛ onin maany gerzitin bitaala.

1 KORINTIYA 6:9

Ŋɛdɛt agayu niiga nɔkɔ ɔl o agɔɔn kaal o gɛr alaŋ arum baliin o Joowo. Má alabanu zin eleeti. Ɔl o alaŋ arum baliin o Joowo nɛɛn o agɔɔn waaŋ, ki ɔl o adiŋdiŋan joowanɛ o adilyai, ki ɔl o adoma zoocmazit, ki ɔl o mac anyek eleeti kiziti ŋaai, ki ɔl o agɔrzɛ, ki ɔl o appintik zinzeeti kaale culu, ki ɔl o abaaki, ki ɔl o akat gɔnɔgi vɔlɔŋa, been ɔl o adayi gɔnɔgi looc.

1 KORINTIYA 7:38

Ma ɛɛti ci arɔca dole baal laadun agam ka kɔrɔca e, agɔɔn niini gi ci abon. Bar zin ɛɛti calaŋ arɔca dole baal laadun agam niini ka kɔrɔca e, agɔɔn niini gi ci abon ɔrɔɔt ɛlɛ kujuk gɔn o arɔcɛ.

1 KORINTIYA 9:5

Kaganona waan ŋaati karɔcɛ dole ci atu Manyi Yesu ka waan gɔɔn kɛɛrɔnta naana kibeen nɔɔnɔ, kiyo buk agɔɔn Pitɔr ki toonnyak oogi been gɔtɔnɔgi Yesu o.

2 KORINTIYA 5:10

Karɔɔŋ naaga kanycek nɔɔnɔ katalɔ o, eeci tiŋeere naaga dook kɛɛl ŋume onin ka kapayet niini ageet. Apaket tiŋeere niini ageet eet co gɔɔn ŋaatinai kaale ogin baal gɔɔn agɔɔn niini loota ŋina e. Ma da gɔɔn agɔɔn ɛɛti kaal ci gɛr, apayek buk Jooi nɔɔnɔ zɔɔz ci gɛr. Mã agɔɔn da gɔɔn niini kaal ci abon, apayek buk Jooi nɔɔnɔ tiŋeere zɔɔz ci abon.

GALATIYA 5:19

Mazin kaala o gɛrzɛ aavtiz zinzeetine ci ɔl o deer agayi nɔkɔ. Kaal zin nicoko nɛɛn waaŋzɛt, ki kaal ceen ririny akati waaŋzɛt, been ziniz zeen, ki diŋdiŋani ci joowanɛ ci adilyai, ki tamar, ki marnɔn, ki yɔwɔn, ki madkɔn, ki bolŋac, ki zinzeeti appinzɛt, ki ŋɛrɔn ci aŋɛrɔn kizi kɔlɛ, ki ewiin ci ɛɛwɔnɛ kaal, ki baayinɛt, been buk kaal oogi ci gɛr kiyo nicigi noko. Kilotuŋ zin naana igeet ɔrɔɔt ɛlɛ kaale nicoko kiyo rak kilotuŋ iiten baale e, eeci ɔl ci agɔɔn kaal nicoko, alaŋ niigi arum baliin o Joowo.

EVESOS 5:5

Abon agayu gi ceen didi ce. Mã een ɛɛti waaŋnyai, karabɔŋ appe ziniz, alaŋ anyak niini ŋintin baliinte o Joowo kibeen Kiristo. Didilɛ ma ziniz appinzɛt atobɔ kibeen diŋdiŋani ci adiŋdiŋani ɛɛti kaal o arɔɔŋ nɔɔnɔ ziniz.

1 TƐSALONIKA 4:6

Má adomanu zoocmazit ŋaane culu, eeci abor Jooi gi nico ɔrɔɔt. Kuduktayuŋ rak baale igeet zoozok nicoko. Apirnanɛ Jooi waanma ɔl o agɔɔn oŋɛ nicoko ɔrɔɔt ɛlɛ.

1 TIMOZI 3:12

Abona zin tiritoiti ci bor o Joowo anyak ŋaa codoi ṯɔr nɔkɔ. Ma abon abal niini dɔl ogin ki kɔrɔk onin dook juruŋ.

1 TIMOZI 3:2

Abon zin alaani ci bor o Joowo een eet ci abaak baayiz calaŋ aŋɔmɔti ɔl nɔɔnɔ gɛrzɛ. Abon anyak niini ŋaa codoi ṯɔr nɔkɔ. Abon agɛny niini, ma azooni ɛlɛ kaale o gɛr dook. Abon een eet ci eezeto. Abon een eet ci akat gɔl. Abon een eet ci aga waragɛ o Joowo juruŋ, ma anim kedemezek ɔl.

1 TIMOZI 3:4

Abon een eet ci abal kɔrɔk onin juruŋ, ma azii dɔlya oginɛ nɔɔnɔ juruŋ.

1 TIMOZI 4:3

Ademzek niigi ɔl gi ci anek nɛ, “Gɛrzɛ rociin, ma buk gɛrzɛ dayiin ogɛn ŋaati kadayi.” Bar zin kaga naaga ɛɛnyca Jooi dayiin nicoko ka kadayit ŋaati rak anyekɛ ɔl o tuwento o agaac zɔɔz ween didi nɔɔnɔ zany.

1 TIMOZI 5:14

Ma zin ecan abon ŋaai o bɔyɛ een nyamɛka arik bodo ka kanyayit niigi dɔl cigeec, ma azooni ceezi cigeec ka calaŋ anyek ɔl o amarninet ageet bor o Joowo gɔl ci azoozet gɛrzɛ.

TITOS 1:6

Tugu zin ebaal rak karicanekin e. Ɛɛti ci ka kizi mayan bore o tuwento, abon een niini eet ci gɔɔn agɔɔn kaal ci abon. Ma abon anyak niini ŋaa codoi ṯɔr nɔkɔ. Abon buk dɔlya ciginɛ o atuwe, ma alaŋ agawek ɔl nɔɔgɔ zinzeeti zeen giye calaŋ aziikni niigi ɔl ci adikir.

IBIRO 12:16

Bodo buk abon niiga agenyu ka kɔkɔm eet codoi ŋaatunooŋ ci adoma zoocmaz, karabɔŋ apɛz zoozok o Joowo kiyo baale ɛɛti o kazi Esɔ e. Baale Esɔ niini abuu, ma bar acɛlbɛzan niini waanice kaal ogin baal abuuzetu e, ma ataalek gɔtɔni ween tutur dayiine ci miliny tɛr.

WUNOZYAK 22:15

Ma ɔl o abaak kuture nice alaŋ een ɔl ci gɛr been nɛɛn. Akɔm ŋaatineeŋ tamar, ki waaŋ, ki monyɛnɛt, ma alaŋ adiŋdiŋan niigi joowanɛ o adilyai, ma akɔm vɔlɔŋ.