EVESOS 5:6 - Murle

⁶ Má anyeku eet oma kalabawuŋ zoozowe calaŋ een didi akati kaal nicoko, eeci kaala nicigi anyek bornɛt nɔŋ o Joowo kiiyak ɔl o alaŋ azooni zɔɔz onin.

EVESOS 5:6 ပူးပေါင်းရင်းမြစ်များ

MATIYU 24:24

Eeci avu tiŋeere ɔl ci azi nɛ, Keegina Kiristo, kibeen nyakaŋanɛt ci voloŋo meelik. Agɔɔn katin niigi kaal ci atɛɛt ɔl biye, ka katamanti gɔl ci alaban ɔl o ɛŋɛra Jooi.

MATIYU 24:4

Ma abɛdɛkɛ Yesu nɔɔgɔ anek nɛ, “Egenyit juruŋ ka kɔkɔm eet ci alabanuŋ.

MARKO 13:22

Eeci katin anyak ɔl ci anyek eleeti kizi Kiristo kibeen ɔl ci anyek eleeti kizi nyakaŋanɛt. Ɔl nicigi katin agɔɔn kaal ci atɛɛt ɔl biye ka kalabtai ɔl o aŋɛra Jooi.

MARKO 13:5

Ma anek Yesu nɔɔgɔ nɛ, “Egenyit! Má anyeku eet oma kalabawuŋ.

ROM Waragɛ o Ayeedek Pɔl Ɔl o Joowo Kuture o Kazi Rom<$&ROM01-01> 1:18

Mazin bornɛt nɔŋ o Joowo ayelzai, ma akunak looc tamma. Akunak niini ɔl dook o abaca oŋɛ Joowa, ma agɔɔn kaal ci gɛr ole o deer buk. Eeci ɔl nici golowe cigeecik gɛr noko alam gɔnɔgi koogi calaŋ aga zɔɔz o Joowo een didi.

KOLOSIYA 2:18

Má anyeku eet oma kabakbayanuŋ igeet gole ci aduwakuŋ niini igeet wunozyak cigin ka idiŋdiŋanti niiga toonnyak o Joowo kiyo niini o. Eeci ɛɛti ci abil nɔkɔ adɔŋ niini ɛlɛ ɔrɔɔt, ma azɔp looc tup azɔɔz zoozok ci labak ci akati kaal o loocu.

KOLOSIYA 2:4

Kayeedekuŋ gi nico o, ka kɔkɔm eet ci aku alabanuŋ igeet daŋonte ceen vɔlɔŋ akɔm leeminɛt.

KOLOSIYA 2:8

Karicanekuŋ igeet, ebeyit eleeti juruŋ, ka kɔkɔm eet ci alabanuŋ igeet gɛnyize ci areket kɛŋ akati demziin o voloŋo aku ole o deer. Eeci demziin nici akati kɛɛranɛ o loocu, alaŋ akati Yesu Kiristo.

KOLOSIYA 3:6

Eeci kaale nicoko akunak iima bornɛt nɔŋ o Joowo been payiin onin ɔl o alaŋ azii nɔɔnɔ.

2 TƐSALONIKA 2:3

Má anyeku zin eet oma kalabawuŋ igeet, eeci iiteni o Manyi alaŋ rak aku zɛɛ ma akɔ akanai gerzitin o adikir aborni ɔl Jook, ma ayelzai ɛɛti o oŋecu adikir o apawozek nɔɔnɔ goo laadun. Kuduwayuŋ rak baale igeet kaal nicoko iiten baal ŋaan karomɛn been igeet e. Inoko ŋɛdɛt gerzitin abil tɔ, bar zin alaŋ rak ayelzai ɔrɔɔt zɛɛ ma anyeki ɛɛti o alam gerzitin nico. Mazi ooŋna tiŋeere niini nɔɔnɔ, ŋaan zin katin ayelzai niini kagaac ɔl dook. Ma aku amarnin niini Jook ɔrɔɔt. Ma anyek Loryenti katin nɔɔnɔ dɔyiz ci appe ɔrɔɔt ka kutuguwi niini kaal ci atɛɛt ɔl biye. Ma adiŋdiŋan niini ɛlɛ kujuk Jook, ma arɔɔŋ niini ɔl dook kidiŋdiŋanit nɔɔnɔ doon. Ma tiŋeere akɔ niini ceez o Joowo adikir, ma akɔ azi nɛ, “Aneeta Jook nɛɛn.” Ma alaba tiŋeere niini ɔl o abor ŋaati atuwi kaviyak o Joowo. Alaŋaan zin enice ɛɛla Jooi nɔɔgɔ, bar apayek tiŋeere niini nɔɔgɔ goo o abil been nɛɛn giye o arɛɛzi niigi kaal o gɛr ademzek nɔɔgɔ ɛɛti o oŋecu. Aku zin tiŋeere Manyi diŋdiŋonte onin, ma aku uulal nɔɔnɔ kook many zooze ci olla aduwak niini nɔɔnɔ otoga doon.

IBIRO 13:9

Má anyeku zin ɔl o gɔɔn adɛmɛz gɔnɔgi demziin ci aŋɔrɔwɔ ki demziin o ɔl baal ademezuŋ igeet ɔɔwa e kipiktawuŋ gole o tuwento. Agayu niiga lotinowa o kɛɛrit o Juz akati dayiin akɔm keŋti kina. Ma ɔl o ano lotinok niceke alaŋ niigi ajowa tirtɛn. Bar zin dɛtɛn o Joowo nɛɛn o anyuŋ igeet dɔyiz.

IBIRO 3:19

Inoko zin kicinit naaga alaŋ anyek Jooi waanice ɔl niceke kɔɔtɔ ŋaabaal arooŋek niini nɔɔgɔ e, eeci waanice alaŋ niigi atuwe.

1 PITƆR 2:8

Ma bodo Yesu buk atobɔ niini ki bɛ o titiny adir ɔl kuruyit looc kiyo aduyai waragewe o Joowo o. Adiri o, eeci abor niigi zɔɔz o Joowo. Nicini zin zɔɔz cineeŋ doon, ma anyaak niigi eleeti payiin ci gɛr Joowa.

1 JƆN 4:1

Laŋotigan o kareezuŋ, má olla agamanu zoozok ci ɔl dook, bar abon gɔɔn rak niiga aŋaamneku zɔɔz ci eeto juruŋ, karabɔŋ zɔɔz cinɛ o aku Joowa didi. Eeci ɔl ci meelik uuwak vɔlɔŋ azaantozek vitɛn nicoko dook.