तितस 2:13 - मध्‍य पुरविया थारू

¹³ अकर सङे-सङे, अपनासब आसा करल बात पुरा हैबला दिनके रस्‍ता ताकैचियै, उ दिन अपनासबके महान परमेस्‍वर आ मुक्‍ती दैबला येसु खिरिस्‍ट आपन महिमामे परकट हेतै।

तितस 2:13 ပူးပေါင်းရင်းမြစ်များ

मतीके लिखल सुसमाचार 16:27

कथिलेत जब मानबके बेटा आपन पिताके महिमामे स्‍वरगदुतसबके सङे एतै तब ओइ बखत सब लोकसबके आपन-आपन काज अनुसारके इनाम देतौ।

मतीके लिखल सुसमाचार 25:31

येसु कहल्‍कै, “जहिया मानबके बेटा पुरे स्‍वरगदुतसङे आपन महिमामे एतै, तहिया उ आपन महिमाके सिंहासनमे बैठतै।

मतीके लिखल सुसमाचार 26:64

येसु ओकरा कहल्‍कै, “से बात अहि कैहदेलियै। तैयो हम तोरासबके कहैचियौ, एक दिन तुसब मानबके बेटाके सक्‍तीसाली परमेस्‍वरके देहना हाथ कातमे बैठल आ अकाससे बादलमे आबैत देखबिही!”

मरकुस 14:62

तब येसु कहल्‍कै, “हँ, हम चियै। एक दिन अहाँ मानबके बेटाके महान परमेस्‍वरके देहना हाथ कातमे बैठल आ अकाससे बादलके सङे आइबरहल देखबिही!”

मरकुस 8:38

अइ पापी आ दुस्‍ट पुस्‍तामे जे हमर आ हमर बचनसे लाज मान्‍तै त मानबके बेटा आपन पिताके महिमामे पबितर स्‍वरगदुतसबसङे आबैतखिना ओकरसे लाज मान्‍तै।”

परेरित 24:15

हम्‍हु उसब जखा परमेस्‍वरमे धरमी आ अधरमी दुनु मरलाके बाद फेनो जिबित हेतै तैमे आसा राखैचियै।

रोमी 15:13

तुसब आसा दैबला परमेस्‍वरमे बिस्‍बास करनेचिही। ओह्‍या तोरासबके आनन्‍द आ सान्‍तीसे भैरदेबे। तहिनङे पबितर आत्‍माके सक्‍तिसे तोरासबके आसा बैढते जाय।

रोमी 5:5

अहै आसाके कारन हमसब निरास नै हेबै कथिलेत परमेस्‍वर अपनासबके पबितर आत्‍मा देने छै आ पबितर आत्‍मासे परमेस्‍वर अपनासबके हिरदयमे आपन परेम भरनेछै।

रोमी 8:18

हमर बिचारमे अइ जिबनमे अपनासबके भोगल दुख अपनासबमे पछा परकट हैबला महिमासे तुलना करतै त, अखुनके दुख त ओइके अगा किछो नै चियै।

१ कोरन्‍थी 1:7

अपनासबके परभु येसु खिरिस्‍ट फेनसे एतै कैहके बाट ताकैतखिना तोरासबमे कोनो आत्‍मिक बरदानके कमी नै हेतौ।

२ कोरन्‍थी 4:4

सैतान, जे अइ सन्‍सारके देबता चियै से महिमीत सुसमाचारके इजोतके नै देखे कैहके खिरिस्‍टमे बिस्‍बास नै करैबला लोकसबके बुझैबला सक्‍तीके आन्‍हर बन्‍यादेनेछै।

२ कोरन्‍थी 4:6

“अन्‍हारमे इजोत चम्‍के” कहैबला परमेस्‍वरे हमरासबके हिरदयमे इजोत चमकाइनेछै। अहैलेल परमेस्‍वरके महिमा महान चियै कैहके हमसब जानैचियै। साँचोके उ महिमामय ग्‍यानके इजोत खिरिस्‍टके चेहरामेछै।

कलस्‍सी 1:23

साँचोके तुसब आपन बिस्‍बासमे अस्‍थिर आ बलगर भ्‍याके सुनल सुसमाचारके आसासे पछा नै हट। एह्‍या सुसमाचार चियै, जे सन्‍सारके सब लोकसबके परचार करलगेलछै। हम पावल सेहो एह्‍या सुसमाचार सुनाइले परमेस्‍वरके सेबक भेलचियै।

कलस्‍सी 1:27

यि महान रहसके बात गैर-यहुदीयो लोकसब बुझे कैहके परमेस्‍वरके योजना चियै। यि रहसके बात एह्‍या चियै, खिरिस्‍ट तोरासबमे बास करैछौ, जे गौरबके आसा चियौ।

कलस्‍सी 1:5

तोरासबके खातिर स्‍वरगमे सुरक्‍छित साथ राखल आसाके कारन एहेन बिस्‍बास आ परेम करैचिही। यि असाके बिसयमे तुसब पहिनेसे सतके बचन अरथात सुसमाचार सुन्‍नेचिही।

कलस्‍सी 3:4

तोरासबके साँचोके जिबन त खिरिस्‍टे चियौ। जखैन उ परगट हेतौ तखैन तुसब ओकरे महिमामे परगट हेब्‍ही।

२ थेसलोनिकी 2:16

आब अपनासबके परभु येसु खिरिस्‍ट आ अपनासबके परमेस्‍वर पिता अपनासबके परेम करल्‍कै। उ आपन अनुगरहसे अनन्‍त उत्‍साह आ असल आस देल्‍कै।

२ थेसलोनिकी 2:8

उ ब्‍यबस्‍था भङ करैबला लोक परकट हेतै। जकरा परभु येसु आपन मुहके एक साँसमे नास करतै। परभु येसुके आपन आगमनके चमकके तेजसे ओकरा नास करतै।

१ तिमोथी 1:1

हमरा मुक्‍ती दैबला परमेस्‍वर आ आसा दैबला येसु खिरिस्‍टके आग्‍या अनुसार नियुक्‍त भेल हम पावल, येसु खिरिस्‍टके परेरित यि चिठी

२ तिमोथी 1:2

हम आपन पिरिय बेटा तिमोथीके यि चिठी लिखैचियै। परमेस्‍वर पिता आ आपनसबके परभु येसु खिरिस्‍ट तोरा अनुगरह, किरपा आ सान्‍ती देबे।

२ तिमोथी 4:1

परमेस्‍वर आ खिरिस्‍ट येसुके अगा, जे आपन राज अस्‍थापना करैले एतै आ उ जियल आ मरल सबके नियाय करतै, तै बातके धियानमे राइखके हम तोरा करा आग्‍या दैत कहैचियौ कि

२ तिमोथी 4:8

आब त परमेस्‍वर हमर खातिर धारमिकताके मुकुट राखनेछै। जे पुरस्‍कार धारमिकताके नियाय करैबला परभु ओइ दिन हमरा देतै, उ हमरा मातरे नै महज जेसब तन-मनसे ओकर आबैबला बाट ताकैछै ओइसबके लग्‍यादेतै।

तितस 1:2

उ बिस्‍बास आ ग्‍यान अनन्‍त जिबन पाबैके आसमे अरल छै, यि जिबन कहियो झुठ नै बोलैबला परमेस्‍वर सन्‍सार सिरिस्‍टी हैसे पहिने अपनासबके दैले परतिग्‍या करने छेलै।

तितस 1:4

तितस, हमे तोरा यि चिठी लिखैचियौ। साँचोके तु हमर आपने बेटा जखा चिही कथिलेकी तोहर आ हमर बिस्‍बास एके चियौ। परमेस्‍वर पिता आ अपनासबके मुक्‍तीदैबला येसु खिरिस्‍ट तोरा अनुगरह आ सान्‍ती देबे।

तितस 3:4

महज जब अपनासबके मुक्‍ती दैबला परमेस्‍वरके दया आ परेम आपनसबमे परकट भेलै,

हिबरु 9:28

ओहिनङे बहुतो लोकके पाप छमाके लेल खिरिस्‍ट एकेबेर बली भेलै। उ दोसर बेर एतै त, ओइ बखत पाप छमाके लेल नै एतै, महज ओकरासबके मुक्‍तीके लेल एतै जेसब ओकर बाट ताकैत असियाल रहतै।

१ पतरुस 1:3

परमेस्‍वर आ अपनासबके परभु येसु खिरिस्‍टके पिताके महिमा हेबे। ओकर महान दयासे हमसब लया जलम पाबनेचियै। उ लया जलम येसु खिरिस्‍टके पुनरुथानसे हमसब पाबनेचियै। ओहैसे अपनासबके जिबित आसा यि चियै कि,

१ पतरुस 1:7

नास हैबला सोनाके आइगमे खाइरके सुध करल जखा तोरासबके बिस्‍बास ओहौसे मुल्‍यबान छौ। अहै खातिर तोरासबके बिस्‍बास सच ठहरे आ येसु खिरिस्‍ट परगट हैबला दिनमे परसन्‍सा, महिमा आ आदरके योग्‍य बने।

२ पतरुस 1:1

हम सिमोन पतरुस, येसु खिरिस्‍टके दास आ परेरितके तरफसे अपनासबके परमेस्‍वर आ मुक्‍ती दैबला येसु खिरिस्‍टके धारमिकतासे अपनेसब जखा अनमोल बिस्‍बास पाबैबलासबके लेल यि चिठी लिखरहल चियै।

२ पतरुस 3:18

महज अपनासबके परभु आ मुक्‍ती दैबला येसु खिरिस्‍टके अनुगरह आ ग्‍यानमे बरहैत जो। ओकर महिमा अखैन आ सबदिन हेबे। आमेन।

१ युहन्‍ना 4:14

हमसब यि देख्‍ने चियै आ साक्‍छी दैचियै कि, परमेस्‍वर पिता सन्‍सारके मुक्‍ती दैबला हैकेलेल आपन बेटाके पठाइने छै।

यहुदा 1:21

आपनके परमेस्‍वरके परेममे राख आ अनन्‍त जिबनके लेल अपनासबके परभु येसु खिरिस्‍टके किरपाके परतिक्‍छा कर।

परकास 1:7

देख, उ बादलमे आइबरहलछै आ हरेक लोक ओकरा देख्‍तै, उहोसब देख्‍तै जेसब ओकरा भालासे भोक्‍ने छेलै। सन्‍सारके सब जातीके लोक ओकर कारन बिलाप करतै। पक्‍का ओहिने हेतै। आमेन!