परेरित 21:3 - मध्‍य पुरविया थारू

³ जाइते जाइते साइपरस देखा परलै आ ओकर दछिन कातसे सिरिया परदेस हैत हमसब टुरोस सहरमे एलियै। ओतै जहादसे मालसमान उतारल्‍कै आ हम्‍हुसब उतरलियै।

परेरित 21:3 ပူးပေါင်းရင်းမြစ်များ

मतीके लिखल सुसमाचार 11:21

“धिक्‍कार तोरा खोराजिनके बासिसब! आ धिक्‍कार तोरा बेथसेदाके बासीसब! कथिलेत तोरासबके बिचमे करलाहा अजगुतके कामसब टुरोस आ सिदोन सहरमे करनेरहतीयै त ओतेका लोकसब आपन-आपन पाप माइनके बोराके बस्‍तर लग्‍याके छौरमे बैठके पस्‍चाताप करतियै।

मतीके लिखल सुसमाचार 4:24

अहिनङे ओकर कामके चरचा पुरे सिरिया परदेसमे फैलगेलै। हरेक परकारके रोग-बिमारसे सत्‍याल, भुत लागल, मिरगी लागल आ लकबा मारल लोकसबके येसु लग आनल्‍कै आ येसु ओइसबके निक करल्‍कै।

लुका 10:13

“धिक्‍कार तोरा खोराजिनके बासिसब! आ धिक्‍कार तोरा बेथसेदाके बासिसब! कथिलेत तोरासबके बिचमे करलाहा अच्‍चमके कामसब टुरोस आ सिदोन सहरमे करनेरहतीयै त ओतेका लोकसब आपन-आपन पाप माइनके बोराके पहिरन लगाके छौरमे बैठके पस्‍चाताव करतियै।

लुका 2:2

नाम दरता करे परतै से हुकुम पहिन्‍का बेर छेलै। ओइ बखत कुरेनियस सिरिया इलाकाके बडा-हाकिम रहै।

परेरित 11:19

स्‍तिफनस मारल गेलाके बाद परभु येसुमे बिस्‍बास करैबलासब उपर जब सताबट बरहे लाग्‍लै तब चारुदिसन छिरियागेलै आ कोइ फोनिके इलाकामे पुग्‍लै त कोइ साइपरस टपु त कोइ एन्‍टिओखिया सहर तक पहुचलै। महज सुरु-सुरुमे उसब यहुदीसबके बिचमे मातरे सुसमाचार परचार करैछेलै।

परेरित 12:20

हेरोद टुरोस आ सिदोनके लोकसबमे खिस्‍याल रहै। तब ओइसबसङे मिलके हेरोदसे भेटैले गेलै। रजाके मुख कारिन्‍दा बलस्‍तसके आपन पक्‍छमे कैरके ओकर सहायतासे रजा लग मेल करैले परस्‍ताब राखल्‍कै। कथिलेत ओइसबके देसमे सब खाइबला चिज हेरोदके देससे आबैछेलै।

परेरित 13:4

बरनाबास आ साउलके पबितर आत्‍मा पठेलाके कारन उसब एन्‍टिओखियासे सिकुलिया सहरमे गेलै। ओतेसे उसब समुन्‍दरके यातरा पार कैरके साइपरस टपुमे गेलै।

परेरित 15:23

उ चारु गोराके हाथे एहे चिठी पठाइल्‍कै: एन्‍टिओखिया, सिरिया आ किलिकियामे रहैबला, परभुमे बिस्‍बास करैबला औरो जातके साथीसङिसब, यि चिठी दुवारा हमरासबके परेरितसब आ धरमगुरुसबसे अभिबादन छै।

परेरित 15:39

ओहै बातमे पावल आ बरनाबासके अतहेक मनमोटाब भेलै कि बादमे उसब अलग-अलग भ्‍यागेलै। बरनाबास मरकुसके साथमे ल्‍याके साइपरस टपु दिसन गेलै।

परेरित 15:41

उसब सिरिया आ किलिकिया परदेसमे घुइम-घुइमके ओतेका बिस्‍बासीसबके बिस्‍बासमे मजगुत बनाइत गेलै।

परेरित 18:18

बहौत दिनतक पावल कोरिन्‍थके परभुमे बिस्‍बास करैबला बिस्‍बासीसब सङे रहलै। तकरबाद उ पिरिस्‍किला आ अकिलास सङे समुन्‍दरके रस्‍ता हैत सिरिया इलाका दिसन जाइले लाग्‍लै। कुछ समय पैहनिये कौबला करलाके कारन पावल किङकिरिया सहरमे पानी जहाद चरहैसे पैहने आपन केस कटाइल्‍कै।

परेरित 21:16

कैसरियाके कुछ बिस्‍बासीसब सेहो हमरासबकेसङे एलै। उसब हमरासबके साइपरसके एक गोरा पुरान चेला मनासोनके घरमे ल्‍यागेलै।

परेरित 21:2

पटारासे फोनिके इलाकामे जाइबला एकटा पानी जहाद भेटल आ ओहैमे चहैरके हमसब गेलियै।

परेरित 21:7

टुरोससे लगातार समुन्‍दर घुम-फिर कैरके हमसब टोलेमाइस सहरमे एलियै। ओते बिस्‍बासी भाइ-बहिनसबके गोरलगी कैरके ओकरासबसङे एक दिन ओते रहलियै।

परेरित 27:4

ओतेसे फेनो हमसब पानी जहादमे चललियै आ हबा उलटाकातसे बहैके कारन हमसब साइपरस टपुके सहारा लैत गेलियै।

परेरित 4:36

जनङ साइपरस देसके लेबी खानदानके योसेफ, जकरा परेरितसब बरनाबास कैहके नाम राखनेरहै (जकर अरथ उत्‍साह दैबला लोक हैछै)।