Loma 8:38 - Kagi nemula (Word of God)

^38-39 Netiigan ta dé endà duen sa mekekedan kenita diyà sa dakel kehidu i Nemula. Enù ka iling ka nehagtay ki pelà ataw ka mematay ki, tapay doo endà mekedan sa kehidu di kenita. Sumalà dé sa egsugùsuguen i Nemula diyà langit ataw ka sa medoo épê egkegaga diyà tanà, endà doo megaga da duu kumedan sa kehidu i Nemula kenita. Endà ma mekedan sa kehidu di kenita danà sa nekeuma diyà kenita ini egoh di, ataw ka danà sa mebaelan ta kani. Sumalà dé sa épê tunung, iling ka sa épê tunung diyà langit, ataw ka sa épê tunung kedu dalem tanà, ataw ka sumalà dé sa binaelan i Nemula, endà dé megaga da duu kumedan sa kehidu i Nemula kenita sa igpehaa di danà i Hésus Kelistu sa Datù ta.

Loma 8:38 ပူးပေါင်းရင်းမြစ်များ

Huwan 10:28

Begayan ku kagda sa lalù endà meelut di anì endà dé mepigtamayan da. Endà ma dé duen etaw mekelampas kenagda diyà kenak.

Loma 14:7

Huenan di, pepionen ta sa langun egbaelan ta enù ka iya sa ukit ta eg-adat si Nemula. Enù ka iling ka nehagtay ki pelà ataw ka nematay ki dé, duen doo sa egsabà kenita si Nemula.

Loma 14:8

Amuk nehagtay ki pelà, baelan ta sa uyot i Datù; dodoo amuk nematay ki dé, iya ma sa uyot di denu kenita. Huenan di, iling ka nehagtay ki pelà ataw ka mematay ki, si Datù doo sa egsabà kenita.

Loma 4:21

enù ka tigtu netiigan di megaga i Nemula egpetuu sa igpasad di diyà kenagdi.

Loma 6:23

Amuk duen etaw eg-unut diyà sa uyot di tegebael salà, iya sa untung mesakem di sa kepatay taman melugay. Dodoo ini polo sa ipeuloy i Nemula sa lalù endà meelut di danà di nesesebaen ki si Hésus Kelistu sa Datù ta.

1 Kolintu 15:24

Agulé, meuma siedò hudihudi agdaw, atuwan i Kelistu dé sa langun kuntelà di, sumalà dé sa épê egkegaga owoy épê tunung. Agulé ibegay di sa kedatuan di diyà si Nemula, sa Emà di.

2 Kolintu 11:14

Dodoo endà egkegaipan ké duu iya wé binaelan da, enù ka apiya si Satanas, egpegaling ma doo egsugùsuguen i Nemula kedu diyà langit.

2 Kolintu 4:13

Na, duen sa kagi etaw diyà sa kagi i Nemula igpesulat, guwaen di, “Migpigtuu a diyà si Nemula, huenan di tumulon a diyà etaw.” Hediya ma kami i, egpigtuu ké ma dé, huenan di egtulonen ké ma sa pesuwan ké egpigtuu.

Épéso 1:21

Huenan di, si Kelistu sa Datù miglowon diyà langun. Endà duen neketepeng kenagdi diyà sa langun datù diyà langit owoy diyà tanà ma, enù ka uman pa mapulù sa gelal di diyà sa langun gelal ini egoh di taman melugay.

Kolosas 1:16

Enù ka danà i Kelistu, binaelan i Nemula sa langun taman diyà langit owoy diyà tanà, iling ka sa eghauwen ta ataw ka sa endà mehaa ta duu, lapeg sa medoo épê egkegaga dutu langit dò owoy sa medoo datù épê dakel egkegaga endà hauwen ta duu. Binaelan i Nemula langun iya wé danà i Kelistu anì kagdi sa meolò etaw.

Kolosas 2:15

Inatuwan i Nemula ma sa langun épê tunung endà mehaa etaw, owoy igpehaa di ma diyà kenita sa egoh di mig-atu kenagda danà i Kelistu nematay diyà sa kayu igbugsud.

2 Timotiyu 1:12

owoy iya ma sa pesuwan di egkepelihay a ini egoh di. Dodoo endà egkemalaan a, enù ka netiigan ku sa etaw egpigtuuwen ku owoy netuuwan a ma diyà sa egkegaga di egtulik sa igsalig di diyà kenak taman endà tumebow iya wé agdaw di pelikù.

Hibelu 11:13

Na, migpigtuu siedò medoo etaw egoh anay, dodoo anan da nematay egoh da endà pa mighaa sa ketuu sa igpasad i Nemula diyà kenagda. Gasama iya, tapay da doo endà egsabuh egpigtuu, enù ka netiigan da apiya di pa melugay, meuma doo kani sa agdaw egoh da humaa sa tanà igpasad i Nemula eg-angat-angatan da. Huenan di, tinandaan da beken siini tanà sa tigtu menuwa eg-ugpaan da taman melugay.

1 Pidelu 3:22

Migpelikù dé dutu langit dò, owoy migpenuu denu kuwanan i Nemula. Kagdi sa kaunutan sa langun eg-ugpà diyà langit, sa medoo egsugùsuguen i Nemula owoy sa langun épê egkegaga.