2 Timotiyu 1:13 - Kagi nemula (Word of God)

¹³ Na, ilingi ko ma sa medoo tuu kagi dinineg ko diyà kenak, enù ka iya sa mepion meilingan ko diyà sa ketegudon ko. Peeles ko sa kepigtuu ko owoy sa kehidu ko danà ta nesesebaen si Hésus Kelistu.

2 Timotiyu 1:13 ပူးပေါင်းရင်းမြစ်များ

Loma 2:20

Owoy guwaen yu ma meketulù yu sa medoo etaw kulang penemdem, enù ka lagà yu gaa mistelu owoy lagà da batà egtuluen yu. Guwaen yu ma dò milantek yu owoy anan tuu sa tegudon egketiigan yu enù ka igsalig i Nemula sa uledin di diyà keniyu.

Loma 6:17

Egoh anay lagà yu neudipen diyà salà. Dodoo tigtu egpesalamat a diyà si Nemula enù ka nesambian dé sa adat yu ini egoh owoy tigtu yu ma dé egpangunut diyà sa tuu tegudon sinakem yu.

Pilipos 1:27

Na, sumalà dé sa mebaelan ku, iling ka mematay a ataw ka endà pa, ini sa isasà ku keniyu. Pelumani yu sa adat yu anì mekeiling yu diyà sa Mepion Tegudon denu si Kelistu. Enù ka apiya di pa endà pelikù a diyà keniyu, duminegdineg a daa denu keniyu amuk mesesebaen sa pedu yu metigkel owoy egkesetabang yu egtulù sa Mepion Tegudon anì kumedoo sa etaw egpigtuu.

Pilipos 4:9

Pangunuti yu dé sa langun igtulù ku sinakem yu danà sa kagi ku dinineg yu owoy sa adat ku hinaa yu. Amuk iya sa egbaelan yu, eg-ugpà diyà keniyu Nemula i sa egpetanà pedu ta.

Kolosas 1:4

Eg-oloen ké kagdi enù ka dinineg ké mebagel sa kepigtuu yu diyà si Hésus Kelistu owoy dakel ma sa kehidu yu sa langun etaw i Nemula.

1 Tésalonika 5:21

dodoo tepengi yu daa sa langun dinegen yu anì metiigan yu amuk tuu ataw ka endà. Sakem yu sa mepion,

1 Timotiyu 1:10

Iya ma sa pesuwan sa uledin di anì eg-indawen di sa medoo etaw tegebigà, owoy sa medoo maama egkeiyap egsawa duma da maama, owoy sa medoo tegehenat etaw, owoy sa medoo tegebutbut, owoy sa medoo tegetipu duma da, owoy sumalà dé sa etaw tegebael sa hinawidan sa tuu uledin.

1 Timotiyu 1:14

Dodoo nehaa ku dé sa mepion ketabang igpeuloy i Datù owoy migsubela ma dé. Huenan di, egpigtuu a dé owoy mehidu a ma danà i Hésus Kelistu.

1 Timotiyu 6:3

Na, amuk duen etaw egtulù sa sebaen ma tegudon, owoy egsigbolowen di ma sa tegudon denu si Hésus Kelistu sa Datù ta owoy sa tuu tegudon egpigtuuwen ta,

2 Timotiyu 1:1

Na, si Pabelo a egsulat ini i. Aken sa salu i Hésus Kelistu danà sa ungayà i Nemula, enù ka sinugù di aken anì egtulon a denu sa lalù endà meelut di igpasad di ibegay diyà kenita danà ta nesesebaen si Hésus Kelistu.

2 Timotiyu 1:14

Tuliki ko sa tuu tegudon igsalig diyà keniko danà sa ketabang sa Metiengaw Suguy i Nemula eg-ugpà diyà kenita.

2 Timotiyu 2:2

Owoy sa dinineg ko diyà kenak pinetuu ma sa medoo duma ta egpigtuu, saligi ko diyà sa medoo mipedu etaw anì meketulù da ma diyà sa medoo liyu etaw.

2 Timotiyu 3:14

Dodoo kuna, umani ko unuti sa netiigan ko owoy sa temù pinigtuu ko, enù ka netiigan ko kesaligan sa medoo etaw migtulù keniko.

2 Timotiyu 4:3

Iya sa igsugù ku keniko, enù ka tumebow kani sa agdaw egoh sa medoo etaw mesemek dumineg sa tuu tegudon igtulù. Umowen da polo sa medoo tegetulù kenà da egketuuwan, sa egtulù sa tegudon guwaen da dò melanih diyà sa kedineg da enù ka endà meketipay di diyà sa medaet pedu da.

Tito 1:9

Egpeelesen di ma sa kagi i Nemula pulung tuu anì milantek sa tegudon itulù di anì metepelan di ma sa medoo egsigbolow sa tegudon.

Tito 2:1

Na kuna, tului ko sa adat pulung mepion nekeunut diyà sa tuu tegudon.

Tito 2:8

owoy ilingi ko ma sa keikagi milantek endà mesigbolow di etaw. Amuk hediya, metepelan sa kuntelà ko enù ka endà duen sa medaet binaelan ta metulon di.

Hibelu 10:23

Peelesen ta ma temù sa keangat-angat ta sa igpasad i Nemula pinigtuu ta, enù ka netiigan ta kesaligan Nemula i owoy ipetuu di doo sa langun igpasad di.

Hibelu 3:6

Dodoo si Hésus Kelistu, beken egsugùsuguen i Nemula, enù ka kagdi polo sa Anak di tigtu kesaligan eg-ipat sa malayan i Nemula. Na, kita lagà sa malayan di amuk takà ki egsalig diyà si Kelistu owoy amuk egkeanggan ki eg-angat-angat sa langun igpasad di diyà kenita.

Hibelu 4:14

Na, peelesen ta sa kepigtuu ta diyà si Hésus sa Anak i Nemula, enù ka nebatun dé dutu langit dò kenà i Nemula eg-ugpà anì kagdi sa mapulù datù ta eg-antang diyà si Nemula denu kenita.

Hudas 1:3

Na, o medoo duma ku eghiduwan ku, iya sa anay penemdem ku tigtu mepion amuk sumulat a diyà keniyu denu sa kealuk i Nemula kenita. Dodoo nehalì dé sa penemdem ku ini egoh, enù ka uman pa mepion amuk muna a sumulat diyà keniyu anì pebagelen yu sa pedu yu humawid sa etaw egkelukuy sumambì sa tuu tegudon egpigtuuwen ta. Igpetiig i Nemula iya wé tegudon diyà kenita i etaw di, huenan di endà mepion di amuk mekeamut sa liyu tegudon dahiya.

Kepehaa I Hésus Kelistu 2:25

Peeles yu dé diyà sa pedu yu sa tuu tegudon egketiigan yu taman endà meuma sa kepelikù ku diyà tanà.

Kepehaa I Hésus Kelistu 3:11

Buyu a dé pelikù diyà tanà. Huenan di, peeles yu ipat sa tuu tegudon netiigan yu anì endà duen sa liyu etaw mekekuwa sa untung yu.

Kepehaa I Hésus Kelistu 3:3

Huenan di, yoko egkelipeng duu sa tuu tegudon dinineg yu pinigtuu yu egoh anay, dodoo unuti yu polo. Ekedi yu ma sa salà yu, enù ka amuk endà ekedan yu duu sa medaet adat yu, mepetow yu sa egoh ku mangay diyà keniyu. Lagà sa ketebow tegepenakaw sa kepelikù ku enù ka endà egketiigan yu duu sa ulas ku tumebow.