Impaaha 14:7 - Manobo Agusan

⁷ Mig-ikagi sikandin to maagbot, “Tahuda yagboy to Diyus aw sajaa, su mig-abut on to panahon no oghukuman din to kaotawan. Simbaha now sikandin no iyan mighinang to yangit dow pasak, to dagat dow to nangkapuunan to mgo wohig.”

Impaaha 14:7 ပူးပေါင်းရင်းမြစ်များ

Mateo 25:13

“Kaling,” kagi ni Jesus, “pakaalistu kow su kona now ogkatagahan dow nokoy aedawa ubin urasa to igpauli ku.”

Lucas 17:18

Nokoy no iyan man nasi migpauli to pagpasalamat to Diyus seini taga-Samaria?”

Hinang 14:15

“Hoy, nokoy man sikan oghinangon now? Ajaw now ogpadajuna su angod koy da iyu no mgo otow. Iyan ing-andini noy su meyduon madojow no ignawnangon noy iyu agun talikudan now to mgo hinang no wada pues aw atubangon now sikan buhi no Diyus. Sikandin to mighinang to yangit, to pasak, to dagat, dow to tibo namakabotang duon.

1 Pedro 4:7

Oghinapus on seini kalibutan. Kaling pabog-ata to ginhawa now aw panghogot-hogot kow agun no makaampu kow.

Impaaha 11:13

Sikan no pagbatuna kandan iyan isab pagbugkut to maagbot no tiyog, aw ogkahobhob to ikasampuyu no bahin to sikan siyudad. Pitu no libu no mgo otow to ogkamatoy to sikan. To mgo otow no ogkabilin no buhi ogpandaitan aw ogpakasaja to pagkagamhanan to Diyus no diya to yangit.

Impaaha 11:18

Sikan kona no kaotawan nu naboyu hilabi ikow, di mig-abut on to panahon no ogpahungawon nu to kaboyu nu kandan, aw oghukuman nud sikan nangkamatoy on. Ogbayosan nud on to mgo suguonon nu no ogtahud ikow, bantugan sikandan ko obos, yakip to diya kibali mgo ba-ba nu dow to duma no kaotawan nu. Seini isab to panahon no ogyagyagon nud to tibo no ogpamandodoot to kalibutan.”

Impaaha 15:4

Hintawa man to kona ogtahud yagboy ikow, Ginuu? Hintawa to kona ogsaja ikow? Su sikuna da yagboy to balaan. To tibo mgo tribu oghihimun to pagsimba ikow su impakita nud to matarong no mgo hinang nu.”

Impaaha 16:9

Di inggad natutung on sikandan to sikan hilabi no kapasu, wada dan gihapun ojowi to mgo sae dan aw wada dan sajaa to Diyus. Nasi no pigtungajawan dan sikandin no iyan migboot to sikan no mgo pagsakit kandan.

Impaaha 18:10

Ogpadiyu da sikandan no ogsayap su ogkahaedok aw ogdegmatoy no og-iling, “Adoy, wadad on. Kanugun to sikan bantugan dow gamhanan no siyudad to Babilonia, su wada da kapiniloki nahamtangan sikan to kastigu.”

Impaaha 18:17

Wada da kapiniloki pigboyong to tibo kadatu din.” Ogpadiyu isab to tibo mgo kapitan to barku dow mgo pahinanti hasta to mgo otow no meyduon katongdanan duon to sakajan hasta sikan ogpamanginabuhi pinaagi to dagat.

Impaaha 18:19

Ogmey-og sikandan, ogbudbudan dan to abug to uyu dan aw ogdegmatoy no og-iling, “Adoy, wadad on. Kanugun to sikan bantugan no siyudad. Su tongod to kadatu din, nangkasapian to mgo tag-iya to sakajan duon to dagat. Di wada da kapiniloki nagawang sikan tibo.”

Impaaha 19:5

Na, migdinog a to tingog no napuun kunu duon to trunu to Diyus no mig-iling, “Sikiyu no kaotawan to Diyus no migtahud kandin, bantugan ko obos, sajaa now to Diyus ta!”

Impaaha 4:11

“Diyus no Magboboot noy, gamhanan ka yagboy aw angajan no ogsajaon dow ogpasidonggan, su sikuna to mighinang to tibo pinaagi to pagboot nu.”

Impaaha 4:9

Ogsajaon dan to Diyus no wada kinotoban to kinabuhi no mig-ingkud duon to trunu. Ogpasidonggan dan sikandin aw ogpasalamatan. Ko ogkanta sikandan,

Impaaha 8:10

Paghiyup to sikan ikatoyu no anghil to trumpita din, meyduon maaslag no bituon no nauyug likat to yangit no angod to migyagabyab no mitsa. Duon sikan kodog to ikatoyu no bahin to mgo wohig dow mgo tubud.