2 Tesalonica 1:12 - Manobo Agusan

¹² Sikan to ig-ampu noy agun mapasidonggan now si Jesus no Ginuu aw ogkapasidonggan kow isab tongod kandin. Ogkatuman sikan tibo tongod to kadojow dow kayuuy to Diyus ita dow ni Jesu-Cristo no Ginuu ta.

2 Tesalonica 1:12 ပူးပေါင်းရင်းမြစ်များ

Juan 17:10

To tibo mgo sakup ku aw to ikow no mgo sakup, tibo ki tag-sakup, aw napasidonggan a pinaagi to pagsalig dan kanay.

Roma 1:7

Kaling pigsuyatan ku sikiyu no mgo taga-Roma no hinigugma to Diyus dow inabin din. Og-ampu a no ipakita iyu to kadojow dow kayuuy to Diyus no Amoy dow ni Jesu-Cristo no Ginuu ta aw palinawon to ginhawa now.

1 Corinto 1:4

Kanunoy a ogpasalamat to Diyus to kadojow dow kayuuy din iyu tongod to pagkabogkot now duon ki Cristo Jesus.

2 Corinto 13:4

Tinood iyan no mayotoy to yawa ni Cristo no iyansang sikandin duon to krus, di tongod to gahom to Diyus, buhi yagboy sikandin. Ogkaangod koy to sikan su mayotoy koy isab no angod kandin, di tongod to gahom to Diyus mey isab kinabuhi dow katongod noy to pagdumaya iyu.

2 Corinto 8:9

Su namaanan now to diya pagtabang iyu ni Jesu-Cristo no Ginuu ta. Inggad datu sikandin hilabi diya to yangit, pig-ojowan din sikan tibo tongod iyu aw kahinang no otow agun no pinaagi to sikan, ogpakaangkon kow to kadojawan no oghangtod.

Filipos 3:9

agun isab no mabogkot a duon kandin. Na, nadawat ad to Diyus kona no tongod to pagtuman ku to sikan mgo balaod to tinuuhan noy, di tongod nasi to pagtuu dow pagsalig ku ki Cristo. Su to pagtuu ta iyan paagi no og-isipon ki to Diyus no wadad sae.

2 Tesalonica 1:10

no iyan da ogpakakita to mgo sakup din. Ko mupauli sikandin duon to sikan no aedow, ogpasidonggan sikandin to tibo no migtuu kandin aw ogsajaon tongod to nangkahinang din duon kandan. Yakip kow isab su migtuu kow man to sikan Madojow no Nawnangonon no ingnangon noy iyu.

Tito 2:11

Impakita on to Diyus to kadojow dow kayuuy din agun ogkayuwas to tibo kaotawan.

1 Pedro 4:14

Ko pasikawan kow su sakup kow ni Cristo, igkadojow now su ogpakiyaya sikan no duon on iyu sikan gamhanan no Ispiritu Santu.

Impaaha 1:4

Siak si Juan migpasuyat iyu no pitu no ka grupu to mgo magtutuu diya to yain-yain no mgo yunsud no sakup to prubinsya to Asia. Og-ampu a no ipakita iyu to kadojow dow kayuuy to Diyus no Amoy dow ni Jesu-Cristo hasta to Ispiritu Santu no duon to atubangan to trunu to Diyus, aw palinawon to ginhawa now. To Diyus duon on tahan to diya una dow kuntoon aw diya to umaabut no panahon. Si Jesu-Cristo, ogkasaligan yagboy to mgo kagi din. Sikandin to una no pigbanhaw no konad ogkamatoy. Sikandin isab to oghari to tibo mgo panguyu to nasyun kani to babow to kalibutan. Sajaon ta si Jesu-Cristo su pighigugma ki din aw yuwasa ki to mgo sae ta pinaagi to pagpaawas to yangosa din.