Sofonías 3:19 - DAWAN BÎLA AISKA

¹⁹ Baha piua mai taibi bri nani sut ba mapara buamni. Sîpki prutwi nani ba tâ baikamni, bara aimawahki nani ba sin asla kukamni; tasba aiska ra witin nani ai nina ra yamni kulki mayuni aisaia daukamni bahki kulkan kan lâka ba wina.

Sofonías 3:19 ပူးပေါင်းရင်းမြစ်များ

Aiseya 26:11

Dawan, man upla nani klala yabaia ridi sma, sakuna witin nani baha kaikaia brin daukras; man upla nani ra latwan kaikisma ba ra, witin nani lawaska kakikra takisa. ¡Man kupiam baiwanka pata klauhi mita, angki tikaia pan si!

Aiseya 33:1

¡Sasauhkra, man ra saura pali kabia, man ra lika mai sauhkras; pât ra dadingkra man ra lika pât mai dingkras! Sut sauhkma ba ra, man ra sin mai sauhkan kabia, sut pât ra lakma bara man ra sin pât ra mai lakan kabia.

Aiseya 60:14

Taibi mai muni kan luhpia nani ba, man mamwanra bawikira balbia, lamwaska kiki nani kata ba sut sin, bal minam ra ai lula kriki ai pura sunbia bara mai wibia: ‘Man ba Dawan Tawanka ba’, ‘Gâd Saionka, Israel ra Holikira ba.’

Aiseya 60:18

Saura munaia daukanka ba man nani tasbayam ra kli walan kabia apia, sauhki tikan lâka, lâ krikanka nani sin walbia apia, sakuna kanra mika walbia, man tawankam kutbanka nina ba ‘Swaki Sakan Tawanka’, man getkam nani ba ‘Mayunra Getka nani’ mâkan kabia.

Aiseya 61:7

Baku yang upliki nani pât wahwaia kan, aima wâl praiska kulkan kan bara saura win, baha mita ai kuntrika ra ai dukia kukan nani, aima wâl praiska bribia bara ban kaia ra lilia bri kabia.

Aiseya 62:7

man nani ris yapara, Jerusalem ba kli mâkbia ba kat bara yarka tasba aiska ba mita mayunbia.”

Jirimaya 30:16

Sakuna ya aiska mai sauhkbia ba aiska sauhkan kabia, waihlam nani ba sut priski brih wan kabia; dukiam nani mihtam dakbi brin ba sin mihta kli dakbi briaia daukamna, dukia na impliki brin nani ba dukia sin implikaia kabia.

Jirimaya 30:19

Witin nani lilia lawana tâ bri aiwanbia lilia kikanka ba sin. Kau wiria takbia apia, witin nani kau ailal daukamna. Bahki kulki kabia apia, kan yang mita witin nani ba yamni kulkamna.

Jirimaya 31:8

Kli daukamna lalma kuntrika wina balaia bara asla mai daukamna tasba tnata ba kat. Baha nani aikuki balram kabia blain bara skahwa nani ba, mairin kwihra nani babaikra, pat ai luhpia brin nani ba sin; ¡upla ailal kli balan kabia!

Jirimaya 33:9

Jerusalem ba yang liliaki tawanka takbia, nisan nani sut nakra ra pain kaikbia prana kabia tasba ra. Nisan nani walbia upla nani aisi kabia, yamniki nani sut Jerusalem uplika nani ra yabi kamna ba ra, yu yamni nani kli yamna ba ra, witin nani sibrin dauki tatatwi kabia.”

Jirimaya 46:28

Yang Dawan, kasak aisisni: duki dadaukra, Jekob uplika nani, si bripara, kan yang lika man nani wal sna. Baha nisanka nani tilara mai yakabri ba sut sauhkamni. Man lika mai sauhkamna apia; klala briaia sma klalka ni baman maikamna, wapni mai daukaia dukiara.”

Isikiel 16:27

‘Baha ningkara mihti bukri klala maikaia dukiara; yang sip apia mai daukri bara filisteo nani tawanka mihta ra mai mangkri, misbara mai kaiki ba ra ai kupia sin sauhki kan ba daukankam yamni apia dukiara.

Isikiel 16:57

baha piua saurkam ba kau param takras kata; sakuna nanara filisteo bara Edom tawanka nani, lamara tawanka nani sut ba saura mai wisa; ¡tasba aiska bahki mai kulkisa!

Isikiel 34:16

Sîp tiwan nani ba plikamna, yabal tnaya ra wan nani ba bri balamna, mina kriwan nani ba kwala blakamna, swapni takan nani ba main kaikamna, batana bara karna nani ba main kaikamna. Yang mita main kaikamna nahki ba baku.

Isikiel 39:13

Upla sut ba diara dauki kabia naha nani bikaia, bara kulkanka kum kabia witin nani mapara. Baha yua ra yang pranakira param takamna. Yang, Dawan, kasak aisisna.

Isikiel 39:26

Yang kli asla daukamni, nisan tringsar tila wina bara waihla kuntrika nani ba wina sin; baku mika lamni lâka ra iwbia, klauna ai tasbaya ra, upla kum sin sirang ikbia apia. Baku marikamna holiki lâka ba, bara nisan ailal nani sin kaikaia sip kabia. Israel wina nani ba bahki kulkan lâka wauhbia, yang wal kasak apia kan bamna.

Miqueas 7:10

Yang waihli baha ba kaikbia bara ai swira lukbia; witin bui yang ra ai wi kata ba: “¿Dawan Gâdkam ba anira sa?” Sakuna yang naikra ni witin nani ba kaikamna, nahki yabal ra, slaubla wan mina ni taibi ba baku taiban kabia ba ra.

Sofonías 3:15

Dawan pât ra mai lakaia mampara aisin ba kli swin, bara waihlam nani ba kangbi sakan. tilamra sa; Dawan, Israel kingka, man nani bara diara saura kumi sin sîa yama apia.

Sakaraya 8:23

Bara baha yua ra, Ju apia nisanka nani ba tila wina, upla matawalsip bal Ju uplika kum prâka ra alki bara wibia: ‘¡Yang nani sin man wal wan ai daukisa, kan yang nani walri, Dawan ba man nani wal sa!’ ”

Kli Smalkanka 26:19

Witin mita man wina nisan kum purara mai daukbia, mamyunra sin brima. Nisan wala nani purara sturkam ba tara kabia bara kulkanka sin maikbia, bara witin mai win ba baku kama, tawan kum yamni munan Dawan Gâdkam dukiara.”

Hibru Nani 12:13

yabal wapni ba pliki bas. Baku mika ani mina skahwa takan ba rawbia, bara kli warha takbia apia.

Param Marikanka 20:9

Witin nani tasba bîla yahpika ra bal ulan, bara Gâd uplika nani kiampka ba, bara witin latwan kaiki tawanka ba sin kir kutbi brin. Sakuna Gâd mita kasbrika purara ba wina pauta klauhan blikan, bara baha nani sut angki âpu daukan.

Wihta Nani 1:7

Bara Adonisédec aisin: “Yang bui pat king nani 70 mihta bara mina wihtka nani ba klaki dakbri sa, bara yabri witin nani tibilki munhtara plun yuyaka nani wahbi pi kan. Sakuna nanara yang wala nani ra dîa munri ba baku, Dawan sin yang ra ai daukan.” Bara witin nani bui witin ba Jerusalem ra brih wan, bahara witin pruan.