Matiu 5:5 - DAWAN BÎLA AISKA

⁵ “Lilia pali sa kupia bawikira nani ba, Gâd bui witin nani tasba yabaia pramis munan ba bribia bamna.

Matiu 5:5 ပူးပေါင်းရင်းမြစ်များ

Lawana Nani 149:4

Dawan lika ai uplika nani dukiara ban yamni lukisa; witin bawikira nani ra pura luaia lâka ba yabisa.

Lawana Nani 22:26

Taiban ra uplika nani sma ba plun pis, man nani aibanhwisma ba kat; man nani bui Dawan plikisma ba, witin ra mayuns, bara mani ailal raya kama.

Lawana Nani 25:13

yamnika nani baha uplika kan kir yabisa, bara ai kiamka nani ra naha tasba dukia bribia yabisa.

Lawana Nani 25:9

Witin bawikira nani ra ai yabalka ra tapahkisa; ¡baha nani kasakka lâka ba smalkisa!

Lawana Nani 37:11

Sakuna praut âpu nani ba lika tasba na ai dukia brih iwi kabia, diara ailal briaia bara ai âuyapah pali kabia.

Lawana Nani 37:22

Dawan mita yamni muni uplika nani ba, tasbaya na brih iwbia, sakuna baha nani witin mita saura win nani ba sauhki tikan kabia.

Lawana Nani 37:29

Kasakkira nani ba lika tasbaya ba bri iwbia, ban kaia ra sin baha tasbaya ra iwi kabia.

Lawana Nani 37:34

Man Dawan kat luki bîla wali bas, witin mita purara mai bukbia, bara tasbaya ba man dukiam pihni bri iwaia maikbia. ¡Namkra nani ni kaikma watawikira nani sauhki tikanka ba!

Lawana Nani 37:9

Saura dadaukra nani ba klaki dakban kabia; sakuna Dawan bîla kaiki uplika nani ba, witin nani sika tasba na brih iwbia.

Lawana Nani 69:32

Sari bri nani naha kaiki, witin nani lilia takbia, bara Dawan ra pliki nani ba, ai kupia, ai spiritka nani ba purara bukan kabia;

Aiseya 11:4

Kasakka lâka ni swapni nani ba lâka daukbia, kuntri ra umpira nani bâra ba kan sunbia. Bîla nani witin aisi ba dus kum baku praut karna aisi nani ba ra klala yabi kabia. Ai bîla aisinka nani ba dus kum baku baha ni saura prautkira nani ba klala yabia, witin ai bîla aisi ba ni watawikira ba ikbia.

Aiseya 29:19

Bâra mika bawikira nani ba ailal lilia lâka ra Dawan ra kasak lukbia, upla nani kau umpira pali ba sin Israel Gâdka Holikira ba wal lilia bribia.

Aiseya 60:21

“Bara man uplikam nani ba sut, kasakkira nani baman kabia, tasba na ai dukia bribia ban kaia ra; yang mita mangkri ba urhwi takisa, yang mihti warkka nani pali ba, yang maiyunaia dukiara.

Aiseya 61:1

Dawan Spiritka ba yang purira sa, kan Dawan mita bâk ai sakan bamna; upla umpira nani ra sturi yamni ba smalkaia ai blikan, kupia sari uplika nani lilia daukaia, silak ra mangkan nani ba ra pri takaia ba smalkaia, silak ra mangkan kan nani ra pri lâka;

Sofonías 2:3

Bawikira nani sut tasba aiska ra, Dawan lâka bîla wali dauki nani sma ba, man nani sut Dawan ra pliks. Bawikira lâka ra, wapni lâka ra diara nani dauks, baku kra yukuwaika sâkma, Dawan lawanka yua ra.

Kulki Kaikanka 12:3

Kasak aisabia kaka, Moses ba waitna bawikira pali kan, tasba aiska ra waitna nani iwi ba sut tilara.

Matiu 11:29

Twilkaika puramra sunisna ba man nani bris, bara yang wina lan taks, kan yang lika praut âpu, kupi sin bawikira sna; baku lika man nani riskam brima.

Matiu 21:5

“Man nani Saion tawanka ra wis: ‘Kaiks, Kingkam ba man ra aula, bawikira pali, biriku kum purara uli, biriku luhpia sin, baha ba wark daiwra luhpia kum.’ ”

Roman 4:13

Bamna Gâd mita Ebraham bara ai kiamka nani ra sin pramis munan naha tasbaya na ai dukia pali kabia; naha pramiska na Gâd mita daukras kata, Ebraham lâ bîla wali daukan ba tâka mita, sakuna kasak lukan ba mita, Gâd mita kasakkira kulkan ba tâka mita sika.

Galesha 5:23

bawaia lâka, bara wan wîna alki takaskaia lâka. Nahmuna dukia nani ba mapara lâ kumi sin sip buras.

Epesus 4:2

Man nani ba praut âpu bara bawikira bas; wihka sin bîla kaiki kama, pana pana walkam ra latwan lâka ba mariki kama.

Kolosi 3:12

Gâd lika man nani ra latwan mai kaikisa, baha mita witin bâk mai sakan, ai uplika mai briaia. Baku ba mita, naha sât prâka na dims: umpira kaikan lâka, latwan kaikan lâka, bawaia lâka, praut âpu lâka bara wihka bîla kaikaia lâka ba sin.

1 Timoti 6:11

Sakuna man, Gâd uplika sma ba, naha dukia nani sut wina sîa bri plaps. Kasakka lâka ba nina blîks, Gâd ra luki kaia lâka ba, kasak lukan lâka, latwan lâka, ban bapi buaia lâka, bara wan kupia swapni bri kaia lâka ba sin.

2 Timoti 2:25

bara witin mapara nani ba ra, kupia swapni brih wapni daukbia. Baku ban kra Gâd mita baha nani ra yaka ai kupia lakbia, bara kasak tânka ba kakaira taki banhbia.

Taitus 3:2

Upla kumi nina ra sin saura aisi kabiara, sakuna kupia kumi lâka bri nani kabia bara upla wal asla uplika nani kabia, bara ai kupia swapnika ba upla sut ra latan mariki nani kabia.

Jems 1:21

Baku bamna, tâski lâka, saurka lâka ailal ba sut swi si, bara bawan lâka ra sturi painkira kupiam ra mangkan ba alki bris. Kan baha sturka yamni ba lika, swaki mai sakaia karnika brisa.

Jems 3:13

Man nani tilamra upla sinskira bara diara tânka kakaira kum bâra sa kaka, latan marikbia witin wapni tauki ba lâka ni, ai sinska mita bawikira lâka yabi ba ni.

1 Pita 3:15

kuna kupiam nani ra Kraist ra Dawan kulki bas. Piu sut ridi bas, man nani diara bîla kaikanka brisma ba, ya ya mita tânka ba mamkabi walbia kaka, klir pali saki wiaia; sakuna baha ba bawikira bara kulkan lâka dauki bas.

1 Pita 3:4

Sakuna baku daukaia watlika ra, pramna ba kupiam bilara kaia sa; baha painka ba sip tiwras sa, bara baha lika wan spiritka praut âpu bara sâpkira ba sika, baha ba Gâd mawanra kau tara pali sa.