Kolosi 1:13 - DAWAN BÎLA AISKA

¹³ Gâd mita tihmia karnika wina dakbi wan saki, ai Luhpia latwankira king aimaki ba pliska ra wan mangkan,

Kolosi 1:13 ပူးပေါင်းရင်းမြစ်များ

Aiseya 42:1

“Nâra kaiks yang duki dadaukra ba, yang bui witin ba alki brisna, bâk sakri ba, witin ra yang sulki ba âiyapah sa. Spiritki ba yang bui witin ai purara mangkri; witin mita kasakka lâka ba nisan nani ra bri balaia.

Aiseya 53:12

Baha mita Gâd bui witin ra pliska kum yabia upla tara nani tilara, karnikira nani ba aikuki tilara pura lubia, kan witin pruaia ai wîna ba yan, watawikira nani tilara kulkan kata, kan kasak pali sika upla manis upla saura ba witin twilkan upla saura nani tâwan ai pura sunan.

Aiseya 60:2

Kaiks tihmia tara ba, tasba aiska ra kabia, bara nisan nani purara sin tihmia tara kabia; sakuna man puramra lika, Dawan wina yu baiwanka ingnika balbia, bara ai prana ba man puramra bal mai kaikbia.

Sakaraya 9:9

¡Liliam pali bas, Saion tawanka! ¡Âmyapah kira aiwans, Jerusalem tawanka! Kingkam man nani ra aula; kasakkira, pura lalura, sakuna bawikira, biriku kum ra uli aula, biriku kum, biriku luhpia ra uli aula.

Matiu 17:5

Kau Pita aisi kan ba ra, kasbrika ingni kum witin nani ra madiskan; bara kasbrika ba wina bîla baikra kum aisin, naku walata: “Naha sika Luhpi laitwankira. Witin sika yang bâk saki briri ba. Man nani bui witin ra wals.”

Matiu 25:34

Bara King ba ai aihkika ra nani ba ra wibia: ‘Bal, man nani, Aisiki mita yamni mai munan nani sma ba; king tasbaya na man nani dukiam wisi Gâd tasba paskan wina ridi dauki ban bri ba, bri banhs.

Matiu 3:17

Bara kasbrika purara ba wina bîla baikra kum walan, naku aisata: “Naha sika Luhpi laitwankira; witin sika bâk saki briri ba.”

Luk 13:24

—Man nani trai muni, dur bîla sirpi bâk mahka dims; kan yang mai wisni, upla manis dimaia want kabia, sakuna sip dimbia apia.

Luk 22:53

Yang yu bani man nani wal tempel ra katna piua ra, wiria sin ai kangbras kapram; sakuna naha na man nani awarkam sika, tihmia mita pura lui ba.

Jan 17:24

“Aisa, man mita sika baha nani aikram ba, bamna want sna baha nani sut yang bâra kamna pliska ra kabia, bara baku mika man prana aikram ba kaiki kabia; kan man mita latwan ai kaikram kau tasba na âpu kan piua ba wina.

Jan 3:35

Aisa ba ai Luhpia ra latwan kaikisa, bara witin mihta ra diara sut mangkan sa.

Jan 5:24

“Kasak pali mai wisna: Yang aisisna ba ra ya aman walisa, ai blikan ba ra sin kasak lukisa kaka, witin raya ban kaia lâka ba brisa, pât ra sin lulkan kabia apia; kuna pruan wina taki pat raya kaia ra luan sa.

Apastil Nani Sturka 26:18

Man baha uplika nani nakra nani ba ilingkma, bara witin nani tihmia ra kau wapbia apia, sakuna ingni ra yarka wapbia. Bara sin Sitan mihta ra ban kabia apia, sakuna Gâd nina blîkbia; yang ra sin kasak lukbia, bara ai saurka nani sut ba swih tikan kabia, bara naika piua ra ai pliska bri kabia Gâd mita holikira sakan nani ba aikuki.’

Roman 14:17

Bamna Gâd King aimaki ba lâka lika piaia, diaia wal tânka apia sa, sakuna baha lika wan rayaka wapni briaia lâka sa, bara kupia kumi lâka bara lilia lâka Spirit Holikira bâk yawan bri ba tânka sika.

2 Korint 11:14

Naha na lika diara aihkakira apia sa, kan Sitan pali sin ingni insal baku takisa,

2 Korint 4:4

Witin nani sip kasak lukras sa, kan naha tasba gâdka ba mita sinska nakra ba blain daukan; Kraist pranakira smalkanka ingnika ba kaikbia sîa, witinka lika Gâd talia pali ba.

Epesus 1:6

Baha mita yawan piua bani Gâd ra mayunisa ai latwanka tara ba dukiara, baha sim latwanka ni yamni wan munan sa, yawan ai Luhpia latwan pali wal asla sa bamna.

Epesus 4:18

bara witin nani kupia lukra ba tihmia takan sa. Gâd wina raya kaia lâka aula ba, witin nani briras sa, kan sins aitani briras ba mita kupia sin karna pali sa.

Epesus 5:5

Man nani pat kaikisma, sunu uplika marit takras kira ban ai maya brisa, diara tâski pali daukisa, gridikira pali sa kaka (baha lika aidul ra mayunaia tânka wal baku sa), baha ba sip sa Kraist bara Gâd wal king aimaki ba tasbaya ra dimaia.

Epesus 5:8

Pas piua man nani lika tihmia ra iwi katma, kuna nanara Dawan uplika takram ba mita, ingni ra iwi banhwisma. Bahamna man nani ingni uplika nani baku bas,

Epesus 6:12

Kan yawan aiklabi ba lika upla aihwa, wîna tara bara dusa nani sin bri ba sâtka mapara apia sa, sakuna pirit saura nani ai karnika bri ba mapara; kasbrika purara bara tasba ra sin karnika bri ba, bara wihta kaia karnika alki ba, naha tasbaya tihmika ra ba mapara sin karnika alki ba.

1 Tesalonaika 2:12

Mai smalkri, man nani lika Gâd uplika nani watauki ba baku kama; witinka mai paiwi ba, ai kingka lâka bara ai prana ba sin witin ai dukia sa.

Hibru Nani 2:14

Utla uplika kum luhpia nani ba, sim wîna bara sim tâlia brisa; baku sin, Jisas ba upla wîna bara tâlia sin bri kan, bara baku lika witin sip kaia kan ai pruanka ba ni dibil upla ikaia karnika bri kata ba, sauhki tikaia.

1 Pita 2:9

Sakuna man nani sika kiamka kumi bâk saki brin ba, king prîska nani ba, nisan holikira kum, Gâd uplika nani pali. Bara baha ba baku sa, man nani bui Gâd warkka aihkakira nani ba saki aisama dukiara, witinka mita man nani tihmu tila wina saki, ai ingnika aihka painkira ra dimma wisi mai paiwan ba.

2 Pita 1:11

Baku lika, wan Dawan Sasakra, Jisas Kraist ban kaia ra king aimaki ba pliska ra dimaia nani sut ba, man nani ra param sakan kabia.

1 Jan 2:8

Ban sakuna, dîa ulbisna ba ban kra lâ raya baku takisa, bara baha ba diara kasak sa Kraist ra bara man nani mampa ra sin, kan tihmia ba mahka lui auya, bara kasak ingni ba pat ingwisa.

1 Jan 3:14

Bamna yawan lika prura wina raya kaia ra pat luan sa, bara baha ba yawan pain kaikisa, wan muihni nani ra latwan kaiki bamna. Ani uplika ai muihni ra latwan kaikras ba, witin lika pruan ban sa.

1 Jan 3:8

Sakuna ya saurka lâka baman dauki taukisa kaka, witin lika dibil wina ba mita, kan dibil lika tâ pali yua wina saura dadaukra sa. Bamna Gâd Luhpia balan ba lika, dibil warkka ba sut âpu daukaia dukiara.