Jirimaya 9:11 - DAWAN BÎLA AISKA

¹¹ “Jerusalem ba walpa nani ni pura paskanka tara kum daukamna, yul wail sâtka nani watla takbia; Juda tawanka tara nani ba upla iwras tasbaya kum daukamna.”

Jirimaya 9:11 ပူးပေါင်းရင်းမြစ်များ

Nihimaya 4:2

ai pânika nani wali kan, Sameria wina aiklaklabrika nani sin wali kan witin aisin: “¿Ju nani ba dîa lukisa sanglang bla tauki ba? ¿Dîa witin nani lukisa swika kli sakripais dauki kabia? ¿Apia kaka witin nani lukisa ki yu kumi ra warkka ba sut daukaia? ¿Dîa witin nani lukisa ki diara aman paski swin ba wina walpa pain nani sakaia?”

Lawana Nani 107:43

Ani uplika sins bri ba, naha wal ai dara wali kaia sa bara Dawan latwanka lâka ba tânka briaia.

Lawana Nani 44:19

Ban sakuna, man mita minam ni wan taibram, pât nani briaia pliska nani ra wan swiram, ¡tihmia tara ni sin yang nani puri bikram!

Lawana Nani 79:1

¡Man Gâd, diara nani bri katma sut idan nani dakbi brin! Tempelkam holi ba tâski dauki banhwan bara Jerusalem sut sauhki tikan.

Aiseya 13:22

King watla nani ra, daiwan pruan papira daiwra nani dimi yul swi kabia, ai lilia briaika watla nani ra yul talika daiwra nani man kabia; ai piua nani alkaia pat baila takisa, ai yua nani ba kau yari daukan kabia apia.”

Aiseya 25:2

Tawan tara nani ba walpa kiaubi paskan nani baku dauki swiram, tawan karnakira nani ba sauhki swiram; waihla nani watla tara nani ba sut slingbram, baha nani kli sin paskan kabia apia ban kaia ra.

Aiseya 34:13

Kingka watla nani ra kiaya pâwbia, wahia kiaikira dusa nani sin pâwbia ai kan kahbaika pliska nani ra; bara yul wail nani iwaika watla kabia, bara daiwan pâlras tara nani luhpia watla latka kabia.

Aiseya 44:26

Sakuna yang duki dadaukra aisan ba, yabri daukisa bara bâk saki briri uplika ba lukanka nani ba pain baman takbia. Yang param sakisna, Jerusalem ba kli upla iwan kabia, bara Juda tawanka nani ra sin. Yang daukamni, kli bukan kabia slingwanka nani ba wina.

Jirimaya 1:15

Yang, Dawan, man nani ra kasak mai wisna, yahbra tani king tasbaya nani ba sut paiwrika balbia, kingka nani sin balbia bara baha kingka nani ba Jerusalem getka pali ba kat ai iwaika nani ba bapbia tawan kutbanka ba kir, Juda tawanka tara nani ba sin kir kutbi bribia.

Jirimaya 10:22

¡Damra wals! ¡Maisa pakanka kum blikan aula! Laih yahbra tani wina bin tara kum aula Juda tawanka tara nani ba upla iwras tasbaya, yul talia nani watla daukaia.

Jirimaya 16:10

“Naha bîla nani na man bui witin nani ra wima ba ra, upla nani ba pana man ra mamkabi walbia: ‘¿Dîa muni Dawan baha saurka tara ba yang nani maipara daukaia baku adar yaban? ¿Dîa saurka yang nani Dawanki Gâdki mapara dauki banhri ki?’

Jirimaya 25:11

Naha kuntrika aiska na sauhki tikan slingban bâra kabia. Piua ba 70 mani kabia naha nisanka nani bani ba Babilon kingka munhtara kabia.

Jirimaya 25:18

Bara Jerusalem ra yabri din Juda tawanka tara nani ra ba ra, king nani ra, wihta tara nani ra sin yabri diaia witin nani sauhki tikaia, bara baku sauhka ban swiaia, upla nani ra sirang iki sibrin dingki kaia, watawika lâka daukan patrangka naiwa kat baku ban sa.

Jirimaya 26:18

“Ezequías, Juda kingka kan ba yua nani ra Miqueas, Moreset wina ba Dawan nina ra aisi Juda uplika nani sut ra win: ‘Dawan, karnika sut bri ba, aisisa: Saion ba insla kum tasba baiki swin ba baku daukan kabia, Jerusalem ba slingwi aipaswanka ra takaskbia, tempel kiuhsika ba sin inma saura baman pâwi kabia.’

Jirimaya 26:9

¿Nahki man sibrin âpu aisisma bara Dawan nina ra wisma naha tempelka na Siló baku takbia, naha tawanka na sin slingban kabia, upla sin âpu swin kabia?” Bara upla sut tempel ra aipaswan Jirimaya ra kir kutban.

Jirimaya 34:22

Witin nani ba blikaisna naha tawanka na mapara bal aiklabaia, tawanka na bribia bara pauta ni angkbia. Juda tawanka wala nani ba sin upla iwras tasbaya daukamna. Yang, Dawan, baha kasak aisisna.”

Jirimaya 4:27

Dawan aisisa: “Tasbaya aiska ba pâsa krawi lui palki baku daukamna, sakuna sut pali lika sauhki tikamna apia.

Jirimaya 44:2

“Dawan karnika sut bri ba, Israel Gâdka ba, aisisa: ‘Man nani kaikram sika yang daukri ba Jerusalem purara, Juda bara tawan wala nani purara sin bal nahki sauhki tikan ba. Nanara baha nani sut slingwan sa, baha tawanka nani ra nanara upla iwras

Jirimaya 49:33

Hasor ra kli upla iwbia apia, suksuk tara nani watla takbia. Upla kli bahara takaskbia apia, bahak sin wapi lui kabia apia.”

Jirimaya 50:3

Yahbra wina nisan kum witin mapara kitwi aula bara kuntrika ba diara âpu bîla man daukbia. Upla nani, daiwan nani, diara kumi sin bahara takaski kabia apia, sakuna sut plapi laihura wabia.”

Jirimaya 51:37

Bara utla slingwan almuk upla dimras baman bâra kabia, suksuk tara nani watla takbia, lasa nani upla nani sut ra sirang iki tasbaya, upla sip bâra iwras tasbaya takbia.

Jirimaya 8:22

¿Galaad ra sîka kum pan âpu sa ki? ¿Upla raki uplika kum bâra âpu kabia ki? ¿Dîa muni witin bui yang upliki nani ba rakras sa?

Inanka Nani 1:4

¡Nahki sari pali sa, Saion ra waia yabalka nani ba! ¡Upla kumi sin âpu sa liliaka nani ra balaia! Tawan getka nani sut ba bîla baman swin sa, prîs nani ba inisa, tiara nani ba sari takisa, bara Jerusalem pât wahwanka ba tahpla pali sa.

Inanka Nani 2:2

Dawan mita Jekob watla nani sut sauhki tikan sa, umpira kaikras kira; ai lawanka nani wal Juda pranakira kan kahbaika pliska nani sut sauhki tikan sa; ai wihtka tara nani bara kingka nani sin tasba kat batakan sa, swira lâka ra.

Inanka Nani 3:47

sibrin lâka, mini pruki kauhaia dukia nani, sauhki tikanka bara aisawi luanka, ¡baha sika yang nani maipara balan!

Libait Lâka 26:32

“Tawankam tara nani ba sauhkamna, man nani waihlam nani bal bahara insla irbia bara tâ iwan takbia.

Miqueas 1:6

Baha mita, Dawan naha aisisa: “Sameria tawanka tara ba yang daukamni, tawan almuk nani slingwi luan baku; wain mâ mangkaia tasbaya kum ridi ba baku swimna; tawan bilara walpa nani ba sut il bîla ra lulkamna bara tawanka ba, utla playka nani baman swin kabia.

Miqueas 3:12

Baku bamna, man nani saurkam tâka mita, Jerusalem tawanka Saion ilka ra ba, insla daukaia tasbaya takbia, tawan slingwan bara aisawan tara kum kabia. Dawan ra pura sunaia watla ilka ra, inma kiaya pali man pâwi kabia.

Miqueas 6:16

Man nani king Omrí lâka nani kat, baku sin Ahab kiamka warkka saura nani lâka kat nina bliki saura daukram. Witin nani dîa daukan baku man sin daukram. Bahamna man nani ba upla sâtka sut nakra ra diara saura mai kaikaia mai daukamna, bara bahki mai kulki lamwaska kiki kabia; upliki nani swira lâka kaia ba sut, man nani puramra kauhbia.”

Kli Smalkanka 29:23

kuntri aiska ba kaikbia tasbayam ba sulpa, sâl, tasba baman ami tiwbia. Baha tasbaya ra diara mangkaia sip apia kabia, diara ai mâ sin sâkbia apia; twi sin pâwbia apia, Sodoma, Gomora, Adma bâra Seboím ra Dawan ai kupia baiwanka prautka ra sauhki tikan ba baku kabia.

Param Marikanka 18:2

Bara ai bîla baikra tara ni wini kan: “¡Pat kauhan, pat kauhan Babilon tara ba! Nanara witin na dibil nani bara pirit saura nani watla takan sa; pirit saura tâski nani watla daiwan wail tâski misbarkira nani watla takan.