Jan 14:26 - DAWAN BÎLA AISKA

²⁶ Sakuna Spirit Holikira Aisa mita yang nini ra luki blîkbia ba lika, man nani ra hilp mai munaia bara maisam nihkaia dukiara, bara witinka mita diara sut mai smalkbia, bara dîa dîa mai wîri ba sut kupiam kraukbia.

Jan 14:26 ပူးပေါင်းရင်းမြစ်များ

Lawana Nani 51:11

Man mamwan wina ai lulkpara; Spiritkam Holikira ba sin, yang wina sâkpara.

Aiseya 54:13

Bara luhpiam nani sut ba, Dawan mita ai bîla ba smalkbia; bara witin nani sut pâwanka tara pali bribia.

Aiseya 63:10

Sakuna witin nani Dawan mapara babura nani takan, Dawan holikira lâka ba witin nani mita kupia baikaia daukan; baha mita witin baha nani ba waihla takan bara witin nani ra aiklaban.

Matiu 1:18

Jisas Kraist aisubanka tânka ba naku sa: ai yaptika Meri ba Josep wal marit takaia lâ daukan kan; bara kau wal briras kan piua, Meri ba Spirit Holikira karnika mita kwihra tiwan.

Matiu 1:20

Naha luki kan ba ra, Dawan insalka kum yaprisauhkan ra latan taki, naku win: “Josep, Debit kiamka sma ba, man Meri ba mayam briaia si bripara, ai luhpia bribia ba lika Spirit Holikira karnika wina sa bamna.

Matiu 28:19

Bamna man nani nisan sut uplika nani ra was, bara yang disaipilki nani dauki banhs; tahbi dauki banhs, Aisa ba nina ra, Luhpia ba nina ra, bara Spirit Holikira ba nina ra sin.

Matiu 3:11

Kasak pali mai wisna: yang lika lî ni baman tahbi mai daukisna, saurkam nani wina kupiam laki Gâd ra balaia; sakuna yang ninira wala kum aula ba lika Spirit Holikira ni bara pauta ni sin tahbi mai daukbia. Witin ba yang purkira kau karnika brisa, ban tara bamna, witin ai sûska nani twilkaia sin yang aitani apia sna.

Mark 12:36

Kan Debit pali Spirit Holikira ingnika mita, naku win: ‘Dawan mita yang Dawanki ra win: Man mihti aihkika ra iws, yang mita waihlam nani minam munhtara mangkamna ba kat.’

Mark 13:11

Bara man nani wihta nani mihta ra mai brih wabia ba ra, dîa aisaia sma ba dukiara lika lukpara. Man nani lika Gâd mita baha piua ra dîa aisaia maikbia ba kat aisas, kan Spirit Holikira sika aisabia, man nani lika apia.

Luk 1:15

Luhpiam waitna ba lika Dawan mawanra tara pali kabia. Witin wain dibia apia, laya saura sâtka kumi sin apia, bara witin kau aisubi takras piua ba wina, Spirit Holikira ni aibanhwan kabia.

Luk 1:35

Pana insal ba bila: —Spirit Holikira ba man puramra balbia, bara Gâd Laih Purara ba karnika kasbrika baku mamdiskbia. Baha mita, man wina tukta holikira aisubi takaia ba lika Gâd Luhpia mâkan kabia.

Luk 1:41

Baku mika, Elisabet Meri ai lakula nan daukan ba ra, ai biara ra ai luhpia ba pulan, witin sin Spirit Holikira ni aibanhwan.

Luk 1:67

Ai aisika Sakaraya ba Spirit Holikira ni aibanhwan, bara Gâd diara aisaia yan ba, naku aisin:

Luk 11:13

Man nani upla saura, ban sakuna luhpiam nani ra diara pain nani yaia nu sma, ¡kau pali Aisikam kasbrika purara ba Spirit Holikira yabia, baha nani witin ra makabia ba ra!

Luk 2:25

Baha piua nani ra, Jerusalem ra waitna kum iwi kata ai nina ba Simian. Witin lika waitna kasakkira, Dawan ra sin ai pura suni mayuni kan, Israel luhpia nani pri sâkbia ba sin bîla kaiki kata. Spirit Holikira ba witin wal kan,

Luk 24:49

Bara kaiks, yang bui man nani puramra blikamna Aisiki dîa pramis munan ba; ban sakuna, Jerusalem tawanka na ra takasks ani piua ra pura wina karnika brima ba kat.

Luk 3:22

bara Spirit Holikira ba latan kaikan butku baku witin purara bal iwan, bara bîla baikra kum kasbrika pura ba wina takan, naku win: —Man ba yang Luhpi laitwankira sma, bâk mai saki mai briri.

Jan 1:33

Baha kat sin yang lika witin ba ya sapa kau kaikras katna; sakuna witinka lî ni tahbi daukaia ai blikan ba mita ai wisata: ‘Ani waitnika purara Spirit Holikira ba bal iwi takaskan kaikma ba, baha mita sika Spirit Holikira ni tahbi dauki ba.’

Jan 12:16

Tâ pali ra, disaipil nani naha diara nani tânka briras kan, sakuna Jisas pruan ba mita lika tânka brin, naha sut ba witin ra takaia kan ba, bara sin witin dukiara dîa ulban ba baku kat sin takan sa.

Jan 14:16

Yang Aisa ra makabamna, witin bui man nani hilpkam bara maisam nihkaia dukiara wala kumi maikbia, baha sika kasak tânka Spiritka ba, witin ba man nani wal kabia ban kaia ra.

Jan 14:25

“Naha diara sut na man nani ra mai wisna, kau man nani aikuki sna bamna.

Jan 15:26

“Sakuna witinka hilp mai munaia bara maisam nihkaia wisi balbia ba, kasak tânka Spiritka yang mita Aisa wina blikamna ba, witin lika yang dukira witnis aisabia.

Jan 16:7

Sakuna kasak pali mai wisni: yang waia sna ba lika, man nani mampa ra kau pain sa. Kan yang waras kamna kaka, Spirit Holikira ba man nani wal kaia balbia apia, hilp mai munaia bara maisam nihkaia; sakuna wamna kaka lika, yang mita witin ba blikamna.

Jan 2:22

Jisas raiti wina buan piua, ai disaipil nani naha dukiara ai kupia krauki banhwan naha dukiara aisan ba, bamna Jisas bîla nani ra kasak lukan bara Ulbanka nani ra sin.

Jan 20:22

Jisas mita disaipil nani sut ra ai wingka puhbi, naku win: —Man nani Spirit Holikira ba bris.

Jan 6:45

Prapit nani wauhkataya ra naku wisa: ‘Gâd mita upla sut ra smalkbia.’ Baku bamna, Aisa ra wali uplika nani ba, witin ba wina lan taki yang ra aula.

Jan 7:39

Naha tânka na wal, Jisas wiaia want kan, ya witin ra kasak lukbia ba Spirit ba bribia. Baha piua ra Spirit ba kau balras kan, Jisas kau ai prana daukras kan bamna.

Apastil Nani Sturka 1:2

ban kasbrika purara uli wan ba kat. Ai apastilka nani wahbi saki Spirit Holikira bâk smalkan, dîa pali sika witin nani daukaia kan ba.

Apastil Nani Sturka 1:4

Witin kau apastil nani wal aikuki asla iwi kan piua ra, baha nani ra naku win: —Man nani Jerusalem wina taki anira wapara. Aisa mita ai Spiritka yaia pramis aisin dukiara yang mai wisatna ba, bîla kaiki bas.

Apastil Nani Sturka 1:8

Sakuna man nani puramra Spirit Holikira balbia ba ra karnika brima, bara yang dukira witnis nani kama Jerusalem ra, Judia tawanka aiska ra, Sameria ra, ban wan tasba wala ra kau laihura ba kat sin.

Apastil Nani Sturka 11:16

Bara yang kupi krawan Dawan naku aisin ba dukiara: ‘Kasak pali Jan lika lî ni upla tahbi daukan, sakuna man nani lika Spirit Holikira ni mai tahbi mai daukan kabia.’

Apastil Nani Sturka 13:2

Yu kum naha uplika nani Gâd ra luki plun piras kira Dawan ra mayunan kan ba ra, Spirit Holikira naku win: “Man nani Bernabé bara Saulo wal ba saki aik, baha warkka daukaia yang bui witin nani paiwri ba.”

Apastil Nani Sturka 13:4

Bernabé Saulo wal ba Spirit Holikira mita blikan bamna, witin nani Cilicia ra iwi wih, baha wina duri tara kum ra aimaki Chipre kî dakura ra wan.

Apastil Nani Sturka 15:28

Bamna Spirit Holikira aitani lukan bara yang nani sin, man nani puramra wirhika wala sunaia apia, naha kupia kraukanka nani na baman lika:

Apastil Nani Sturka 15:8

Bara Gâd, witinka upla kupia pain kaiki ba bui naha diara na wan marikan sa, nahki Ju apia nani ra sin want ba, bara Spirit Holikira baha nani ra yaban, sim yawan ra wankan ba baku.

Apastil Nani Sturka 16:6

Spirit Holikira adar yaras kata Asia ra sturi yamni ba smalkaia. Bamna witin nani Frigia bara Galesha tasbaika bâk impaki,

Apastil Nani Sturka 2:33

Baku bamna, Gâd mita ai mihta aihkika ba ni witin ba purara pali bukan, bara Spirit Holikira witin ra yan, Aisa mita pramis munan kan ba. Bahamna, diara nani sut man nani walisma na bara kaikisma na sin, witin wina atia sa.

Apastil Nani Sturka 2:4

Kumi bani ba Spirit Holikira ni aibanhwan, bara mahka bîla sât wala nani ra aisin, Spirit mita yan aisan ba kat.

Apastil Nani Sturka 20:28

Baku bamna, man nani pali dukiamra aihwaki bas, kristian daknika ba dukiara sin, witinka nani dukiara sika Spirit Holikira mita mai mangkan, Gâd sertska uplika nani ba main kaikaia, baha witin ai tâlia ni atkan sa.

Apastil Nani Sturka 20:35

Piua bani pain mai smalkri, baku wark taki uplika, diara âpu nani ra hilp munaia. Bara Dawan Jisas dîa aisin ba dukiara sin wan kupia krauki kaia, witin naku wisata ba: “Pain pali sa, upla ra diara yaia ba kau yamni sa, briaia ba wal.”

Apastil Nani Sturka 28:25

Witin nani ai tilara aikuki sip lukanka kumi sakras kan bamna, mahka taki aidruban. Bara Pal bila: —Spirit Holikira ba prapit Aiseya bâk pain aisin wan damika nani ra.

Apastil Nani Sturka 5:3

Bara Pita bui Ananías ra win: —¿Dîa muni swiram Sitan mita man kupiam alkan Spirit Holikira ra kunin munaia, bara tasba atkram lalahka ba wina bakriki briaia?

Apastil Nani Sturka 7:51

“Sakuna —Stiben lika ban aisi wi kan— man nani lika piua bani kupiam karna brisma. Man nani kiamam nani bara kupiam sin brisma, sim baha nani Gâd kakaira apia uplika nani ba baku, piua bani Spirit Holikira mapara. Man nani lika damikam nani wal baku pali sma.

Apastil Nani Sturka 7:55

Sakuna Stiben, Spirit Holikira ni banhwan kan, kasbrika purara kaikan, bara Gâd prana ba kaikan, Jisas sin kaikan ai aisa mihta aihkika tani ra bûi kan.

Roman 14:17

Bamna Gâd King aimaki ba lâka lika piaia, diaia wal tânka apia sa, sakuna baha lika wan rayaka wapni briaia lâka sa, bara kupia kumi lâka bara lilia lâka Spirit Holikira bâk yawan bri ba tânka sika.

Roman 15:13

Bamna Gâd bui man nani ra bîla kaikaia lâka maiki ba, lilia bara kupia kumi lâka ni mai banhkbia, kan man nani sika witin ra kasak lukisma ba, bara bîla kaikanka sin uya maikbia Spirit Holikira karnika ba mita.

Roman 15:16

Jisas Kraist dukia dadaukra baku Ju apia uplika nani tilara wark daukaia. Baha warkka ba lika Gâd sturka yamni swaki wan saki ba aisi smalkaia, Ju apia uplika nani ba Gâd ra prisant kumi baku yaka pain briaia dukiara, Spirit Holikira mita holi sakan bamna.

Roman 5:5

Bara naha wihka bîla kaikaia lâka na mita, swira wan paskras sa, kan Gâd mita Spirit Holikira wankan ba bâk ai latwanka lâka ba wan kupia ra banhkan.

1 Korint 12:3

Baha mita, nanara want sna kaiki kama, ani uplika naku wibia kaka: “¡Jisas ba lahtuban kabia!”, witin ba Gâd Spiritka karnika mita aisaras sa. Bara upla kumi sin sip wiras: “¡Jisas ba Dawan!”, witin ba Spirit Holikira karnika mita aisisa kaka lika.

1 Korint 6:19

¿Kaikras sma ki, man nani wînam tara ba Gâd mita Spirit Holikira maikan ba tempelka sa, bara Spirit Holikira ba man nani ra iwisa? Man nani lika man nani dawanka nani apia sma,

2 Korint 6:6

Yang nani rayaki klin ba wal sin latan marikisna, diara kasak ba tânka kaikaia lâka ra, wan kupia takaskaia lâka bara umpira kaikan lâka ra, Spirit Holikira yang nani tani ra ba mita, wan latwanka lâka kunin âpu kira ba mita sin,

Epesus 1:13

Bara man nani sin, diara kasak sturka ba walram, bara swaki mai sakan lâka smalkanka ba, bara Kraist ra kasak lukram ba ra sin, witinka ra asla mai prakan bara sîl sin mai mangkan Gâd dukia nani kaia ba mata, witin pramis aisin Spiritka Holikira ba mita.

Epesus 1:17

Makabisni wan Dawan Jisas Kraist Gâdka ra, Aisa pranakira ba, witin mita sins lâka spiritka maikbia, bara sip kama witin param takan ba tânka pain kaikaia, bara witin ra sin kau kakaira kaia.

Epesus 4:30

Gâd Spiritka Holikira ba sarka paskpara, kan man nani aihka saki mai muni baha sim Spiritka Holikira ni, Gâd dukia kaia wisi sîl mai mangkan sa, aiska mai swaki sakan kaia yua witin maikbia ba kat.

1 Tesalonaika 4:8

Baku bamna, ya naha smalkanka nani bahki kulkisa kaka, upla kum ra lika bahki kulkras sa, sakuna Gâd ra sika, witinka pali ai Spiritka Holikira wankan ba.

2 Timoti 1:14

Spirit Holikira yawan ra ai watla brih iwi ba hilpka ni, Gâd mita lâ yamni nani mihtam ra mangkan ba pain main kaiks.

Taitus 3:5

witin swaki wan sakan. Baha ba lika yawan mita diara pain nani kra daukan tâwan lika apia, sakuna umpira wan kaikan ba mita. Sikbi wan sakan bâk witin mita swaki wan sakan, bara baha tânka ba lika, yawan na kli aisubi takan, bara Spirit Holikira mita rayaka raya wankan ba bâk sin.

Hibru Nani 10:15

Bara Spirit Holikira sin baha dukiara witnis aisisa. Pas pali witin wisa:

Hibru Nani 2:4

Bara Gâd sin baha dukiara witnis aisin sa, sain nani dauki, diara aihkakira nani ni bara sain aihkakira ailal daukan ba mita sin. Witin mita sin Spirit Holikira prisantka nani ba yawan ra sât sât yuan sa, witin ai kupia lâka ba kat.

Hibru Nani 3:7

Baku bamna, Spirit Holikira mita Ulbanka ra aisi ba baku: “Naiwa, Gâd bîla baikra ba man nani walma kaka,

Hibru Nani 9:8

Naha dukia wina Spirit Holikira param pali smalkisa, tint watla kutbanka pas ba kau ban bûi kan sakuna, Dawan wal prawaia yabalka pali ba lika kau kwâkras kan.

1 Pita 1:12

Sakuna Gâd mita baha prapitka nani ra latan marikan ai warkka ba; witin nani ai dukia lika apia kan, sakuna yawan wan dukia kan ba. Bamna nanara, naha sim dukia sika man nani ra maisam pakan ba. Sturi yamni bîla twatwilkra nani, witinka nani Spirit Holikira kasbrika pura wina blikan ba karnika ni aisan ba mita, naha kasakka sturka nani mai win sa. Naha dukia nani lika insal nani pali sin tânka ba kaikan daukisa.

2 Pita 1:21

Kan prapit nani lika, aima kumi sin upla lâka kat ai kupia wina diara saki aisaras kan. Sakuna, witin nani lika upla nani kan, bara Spirit Holikira mita tâ bri kan ba mita, Gâd wina diara brih aisi kata.

1 Jan 2:20

Sakuna Kraist mita man nani ra Spirit Holikira maikan sa, bara baha mita man nani sut diara tânka kaikaia lâka brisma.

1 Jan 2:27

Sakuna man nani lika Spirit Holikira Jisas Kraist wina maikan ba brisma; baha mita upla wala mita mai smalkaia apia sa, kan Spirit Holikira ba diara nani sut mai smalkisa, bara dîa witin mita smalki ba kunin apia, rait pali sa. Baku bamna, Spirit Holikira mai smalkan ba kat, Kraist wal asla ban bas.

1 Jan 5:7

Witnis nani ba yumhpa sa:

Judas 1:20

Sakuna muihki laitwankira nani, man nani lika kasak lukankam lâka holi ba kat ban bûi bas. Spirit Holikira karnika ra puram suni bas.

Param Marikanka 2:11

¡Ya ai kiama bri ba, Spirit mita serts nani ra wi ba, pain walbia! Ya ya sip muni pura lubia ba, prura wala ba mita saura kumi sin munbia apia.’