Sofonías 1:13 - DAWAN BÎLA AISKA

¹³ Baha mita sika, ai dukia kukanka nani ba wal brih wabia, ai watla nani ba sin slingban kabia. Ai watla nani lika mâkbia, sakuna bahara iwbia apia; wain nasla nani sin daukbia apia, bara sin dibia apia.”

Sofonías 1:13 ပူးပေါင်းရင်းမြစ်များ

Aiseya 6:11

Bara yang bui witin ra makabi walri: “¿Ahkia kat kabia, Gâd?” Witin pana yang ra ai win: “Tawan tara nani ba bîla man, upla iwaika sin âpu takbia ba kat utla bilara upla âpu kabia; bara tasba ba sin upla iwras tasbaya baku bîla man takbia ba kat.

Jirimaya 15:13

Israel, man saura nani daukram ba tâwan, diara nani brisma ba pâtkam nani ba sin waihlam nani ra yabaisna, diara sut man kuntrikam ra brisma ba, mana aibapras bal brih waia daukamna.

Jirimaya 17:3

tasba langnika il nani purara. Saura nani daukram ba tâwan yuyakam nani kukan kan nani brisna ba witin nani bal implikaia daukamna, kiuhsi nani ra aidul dukia nani ba bribia tasbaya aiska ra bâra ba sut.

Jirimaya 4:20

Diara sauhki tiki ban auya sturka ba walaisna; kuntri aiska ba sauhki tikan sa. Yang kiamki nani ba sin pat pali sauhki tikan kabia, yang waitla papakni nani kata ba sin slingban kabia.

Jirimaya 4:7

Layan ba ai watla wina pat takan, nisan nani sauhki tiki ba pat yabal ra aula; ai tasbaya wina taki aula man kuntrikam ba sauhki tikaia, tawanka tara nani ba slingbi, pura paski bîla man swiaia.

Jirimaya 5:17

Namsla dâkisma patam mâ ba witin nani pibia, luhpiam waitna nani luhpiam mairin nani ba sin pih âpu daukbia. Sîpkam nani ba, bîpkam nani ba, wain nasla nani, kwah damni dusa nani brisma ba pibia. Aiklabaia dukia nani bri ba ni tawankam karna nani kutbanka ba bahara kasak lukisma ba sut sauhki tikbia.”

Jirimaya 9:11

“Jerusalem ba walpa nani ni pura paskanka tara kum daukamna, yul wail sâtka nani watla takbia; Juda tawanka tara nani ba upla iwras tasbaya kum daukamna.”

Jirimaya 9:19

Laih Jerusalem latwan saura bri ini ba walisa: ¡Alai, nahki muni yawan naku wan slingbi wan sauhkanka na ra diman! ¡Saura wan kulkan pâtka yawan wahwisa! Yawan wan kuntrika swih waia sa, wan watla nani sut slingwan sa.

Inanka Nani 5:2

Duki nani sut upla sât wala nani mihta ra tawan sa, waitla nani sut ba tasba wala uplika nani baman bal brin sa.

Isikiel 22:31

Baku bamna, yang klalki witin nani purara bri balri, bara yang sauhki tikri kupi baiwanka ba wal, yabrika ai daukanka dukiara aisabia. Yang, Dawan, kasak aisisna.’ ”

Isikiel 7:19

Ai silbarka nani ba, yabal nani ra batakbia, bara gul nani ba bahki kulkbia. Dawan lawanka ba wina ai gulka bara silbarka sin sip swaki sâkbia apia.

Isikiel 7:21

Yabrika tringsar nani balbia bara mai implikbia, upla kau saurakira tasba ra bâra ba balbia bara mai dakbia, bara diara tâski baku kulkbia.

Isikiel 7:24

Yang mita yabrika upla tahplu nani balbia bara tawan watla nani dawanka takbia. Karnira prautka lâka nani ba danh daukamni; yabrika pliskam holikira nani ba tâski daukan kabia.

Emus 5:11

Man nani mita upla umpira nani ba bahki kulki lawaska kikisma, bara lal mana tara kulkisma, plawar ni mai aibapaia dukiara, man nani ban iwi kama apia, baha wamtla nani walpa ni mâki brisma ba ra; wain nasla nani dauki mangkram pain pâwisa, sakuna baha wainka laya wina sin dima apia.

Miqueas 3:12

Baku bamna, man nani saurkam tâka mita, Jerusalem tawanka Saion ilka ra ba, insla daukaia tasbaya takbia, tawan slingwan bara aisawan tara kum kabia. Dawan ra pura sunaia watla ilka ra, inma kiaya pali man pâwi kabia.

Miqueas 6:15

Saumuk mangki kama, sakuna mâ krikma apia; oliv mâ nani sin taibi kama, sakuna baha batanka laya ba, man nani dukiam kabia apia; wain mâ ba sin taibi kama, sakuna laya ba man nani dima apia.

Sofonías 1:9

Baku sin baha nani dur purak pâli dimi nani ba, bara baha nani kunin aisi implikan dukia nani ni, ai dawanka watla banhki nani ba sin, klala yabamna baha yua ra.”

Kli Smalkanka 28:30

Mayam briaia aisama sakuna waitna wala wal ai maya takbia. Utla paskma sakuna dimma apia, wain nasla mangkma kuna man wainkam mâ wina dih lilia takma apia.

Kli Smalkanka 28:39

Wain nasla nani bri main kaiki kama, sakuna laya dima apia, wainka mâ wina sin wahma apia, kan liwa nani mita pih âpu daukbia.

Kli Smalkanka 28:51

Daiwram luhpia nani sut pibia bara tasbayam wina patam mâ sâkma ba sin, sut prui tiwbia ba kat; plun saumukka, wain, batana, bîpkam, sîpkam luhpia sin swibia apia, bara plun bla pruma.