Roman 2:4 - DAWAN BÎLA AISKA

⁴ Apia kaka, ¿man lika Gâd yamnika manis ba, bara wihka takaski lâka ba sin bahki kulkisma, bara damra sin walras pali sma, Gâd yamnika lâka ba lika kupiam lakaia dukiara sa?

Roman 2:4 ပူးပေါင်းရင်းမြစ်များ

Lawana Nani 10:11

Watawikira ba lukisa, Gâd ba âuya tiwisa, ai mawan pura prakisa bara sip diara kaikras sa.

Lawana Nani 104:24

¡Dawan, man nahki diara nani ailal daukram sa! Baha nani sut daukram ba, sins lâka wal; ¡tasba ba man paskram dukia nani baman banhki sa!

Lawana Nani 31:19

¡Nahki tara sa, kupiam yamnika lâka ba baha nani man ra luki tniwi nani ba! Main kaiki apahki brisma diara manakira baku, upla nani sut mawanra man bui witin nani ba, pramna kulkanka baku diara yui yabisma.

Lawana Nani 78:38

Sakuna Gâd ai kupia swapni bri kan, watawi daukan saurka ba ban swih tikan bara sauhki tikras kata; aima ailal ai kupia sauhkanka ba kli swin, bara ai lawanka tara ba mita yaban bri waras kata.

Lawana Nani 86:15

Sakuna, man Dawan, latwankam swapni brisma ba wihka bîla kaikisma, lamtwanka lâka bara kasakkam lâka ba wal.

Lawana Nani 86:5

Dawan, man yamni sma, wan pâtka nani swih tikisma; man ra ai pura suni nani ba sut ra, latwan kaikisma.

Impakan Sturka 34:6

Moses mawanku lui, ai bîla baikra tara buki win: —¡Dawan ba! ¡Dawan ba! ¡Gâd kupia swapni umpira kaiki ba, ai kupia alki takaski, latwan kaikaia lâka tara bara kasakka lâka sin bri ba!

Smasmalkra 8:11

kan alki klala yaras ai saurka daukan ba mana, naha tâka mita upla kupia ra tuskisa saura daukaia baman.

Aiseya 30:18

Sakuna Dawan lika man nani bîlam kaikisa, man nani dukiamra ai kupia swapni brisa; witin bîlam kaiki latwan mai kaiki ba mamrikisa, kan Dawan Gâd ba kasakkira sa. ¡Lilia pali sa baha nani witin kat ai lukanka mangki bri ba!

Jirimaya 7:10

baha ningkara naha tempelka yang ra baman maiyunaia aikan na ra aula, yang maiwanra bal buaia. Bara man nani lukisma nahara man nani pain kabia bara diara takbia apia; man nani lukisma yang kau sip kupi alki briras sna dukia nani ba ban dauki kaia.

Isikiel 11:19

Yang bui kupia karna walpa baku ba sakamni, bara kupia raya kum yabamni bara spirit raya kum sin yabamni.

Isikiel 16:63

Man kupiam kraukma, bara swiram lâka tara pali damra walma; bara bawan lâka sin baku man kli bîlam kwâkma apia; yang saurkam swih tikamna, diara nani daukram ba sut wina. Yang, Dawan, kasak aisisna.’ ”

Oseas 3:5

Baha yua nani ningkara, Israel luhpia nani ba kli tawi bal, ai Dawan Gâdka ra plikbia, bara ai kingka Debit ra sin. Baha piua nani aimaki lui kabia ba ra, witin nani bui Dawan ra ai kupia krauki tara kulkbia, diara nani yabi ba dukiara sin.

Jona 4:2

Bara Dawan ra ai pura suni, naku win: —Kaiks, Dawan, naha naku takaia ba yang pat aisari kan kau waitla ra katna ba ra. Baha mita sika Tarsis ra aihni plapaia lukatna ba, kan yang kaikisna man kupiam lukra ba swapni sa, upla ra kupiam baiki si kli pat umpira kaikisma, upla ra latwan pali kaikisma ba mita rausauhkaia pâli si, kli pat kupiam lakisma.

Kulki Kaikanka 14:18

Pat pali kupiam sauhkpara bara kupiam takaski bris; kupiam pihni lâka ba kau tara sa, watawika lâka mapara buan lâka sin pâtkas ra swiras sma sakuna, man uplikam nani saura dauki ba ban klala yabisma, aisika bara yaptika nani watawika ba, luhpia nani ra, mulika nani ra, snawika kat.

Roman 10:12

Bamna Ju nani wihki Ju apia uplika nani ba wal lika sât aihka apia sa; kan Dawan ba lika upla sut Dawanka sa, bamna ani uplika nani witin ai nina mâki wini ba sut ra yabisa.

Roman 11:22

Bamna kaiks, nahki Gâd ba painkira pali sa, sakuna lâ sin karna brisa. Witin mita kauhan nani ba wal lâ karna bri kan, sakuna man wal lika uya pain sa. Sakuna man ai latwanka lâka ba nina blikaia sma; baku apia kaka, man sin klaki mai sakan kabia.

Roman 11:33

¡Nahki Gâd yuyaka lâka ba, ai sinska lâka ba, bara diara tânka kaikaia lâka bri ba tihu pali sa! Witin ai lâka ba tânka yawan mita sip tânka briras, bara ai yabalka nani tânka ba sin sip kaikras sa.

Roman 3:25

Gâd mita Kraist ba saurka mana sakripais kum baku mangkan witin pruanka bâk, bara naha na ai karnika brisa kasak lukan lâka ba mita. Naha na baku takan, kan marikaia want sa, nahki Gâd kasakkira sa bara ai kupia alki takaski kan, patitara saura yan saurka ba ban swin tiwan ba mita.

Roman 6:1

Bamna, ¿yawan dîa wiaia sa ki? ¿Saurka ba ban dauki kaia sa, bara Gâd mita ai kupia yamni lâka ba kau wan marikbia?

Roman 6:15

¿Baku ba mita, dîa? ¿Yawan lâ mununhtara apia sa, sakuna Gâd kupia yamnika mununhtara ba mita saura yaia sa ki? ¡Sip apia pali!

2 Korint 8:2

Witin nani trabil manis brin ba mita tânka ba pliki pain kaikan sa, bara baha nani lilia pali sa. Witin nani umpira pali sa, sakuna ai prisantka ai kupia aiska ni diara hilp munan yuyakira kan baku.

Epesus 1:18

Gâd ra makabisna man nani sinskam ba ilingbia, baku mika tânka bri kama dîa dukia bîla kaikaia wisi mai paiwan ba, bara Gâd ai uplika nani ra diara yaia pramis munan ba nahki yuyakira bara pranakira sa,

Epesus 1:7

Gâd latwan pali wan kaiki ai Luhpia ai tâlia laiki, pruan ba tâlia ra pri wan sakan sa, bara yawan saura daukan pâtka ba swin tiwan sa.

Epesus 2:4

Sakuna Gâd lika umpira kaikan lâka tara pali brisa, baha mita witin yawan ra uya latwan wan kaikan,

Epesus 2:7

Naha daukan ba ni wan marikisa, witin naika piua ra latwan tara wan kaiki kabia ba, bara yawan ra ai kupia pihni lâka ba lika Kraist Jisas ba mita baman.

Epesus 3:16

Aisa ra puri sunisna ai prana kukanka ba wina, Gâd ai Spiritka ba ni man nani ra karnikam bara dîa daukaia karnika sin maikbia,

Epesus 3:8

Gâd uplika sirpi nani sut tilara, yang na kau sirpi pali sna; sakuna Gâd mita ban adar aikan, Kraist yuyaka sip kulki sakras ba, Ju apia uplika nani ra smalkaia.

Pilipai 4:19

Baku bamna, man nani dîa dîa âpu sma ba sut, Gâdki mita maikbia, ai yuyaka pranakira Kraist Jisas ra bri ba praiska kat.

Kolosi 1:27

Witin nani ra Gâd mita baha yuyaka pranakira ba marikaia want kan, naha yukukanka lâka na sika Ju apia nani ra praki brisa. Bara baha yukukanka ba sika Kraist, man nani ra takaski ba, bara naika briaia bîla kaiki ba tânka kum sa.

Kolosi 2:2

Aiklabisni baha nani sut ai kupia nani ra tâ baikanka bribia, aikuki asla latwan lâka ra kabia, bara diara tânka kaikaia kasak ba bribia, bara Gâd tânka yukukan ra ba bribia, baha sika Kraist witinka pali ba;

1 Timoti 1:16

Baha mita sika Gâd bui yang ra umpira ai kaikan ba, Jisas Kraist yang ra ai marikbia wisi ai kupia alki takaski lâka aiska ba daukan. Naku sika yang na, witin ra kasak luki raya ban kaia briaia uplika nani ba dukiara, tâinka ni baha nani ra marikri, yang daukri baku dauki banhbia dukiara.

1 Timoti 6:17

Naha tasba ra yuya ailal bri nani ba ra smalki wis, witin nani kwalhwi kabiara, yuyaka nani kat kaiki ai kainara diara briaia sin luki banhbiara, baha nani ban lap tiwisa bamna. Sakuna, witin nani Gâd ra luki ai kainara diara briaia luki ban kan, witinka diara ailal wankisa, yawan lilia takbia dukiara.

1 Pita 3:20

Naha spiritka nani sika patitara piua ra bîla wali daukras kata ba, Noa ba arp watla paski kan ba ra, Gâd lika wihka takaski bîla kaiki kan. Baha bilara tila upla nani aimakan, sut ba ra upla 8 baman, lî mita swaki sakan ba.

2 Pita 1:11

Baku lika, wan Dawan Sasakra, Jisas Kraist ban kaia ra king aimaki ba pliska ra dimaia nani sut ba, man nani ra param sakan kabia.

2 Pita 3:15

Bamna luki bas, wan Dawan yawan aikuki wihka bîla kaiki ba lika, yawan sut swaki wan sakaia dukiara sa. Baku sin wan muihni latwankira Pal sin man nani ra ulban sa, Gâd mita sins lâka yan ba tânka kat.

2 Pita 3:3

Tâura naha tânka luki bas: Tnata yua lamara upla manis balbia bara diara holikira nani ba lawaska kikbia, ai brinka saura nani ba kat baman iwi kabia swira paskaia luki,

2 Pita 3:9

Dawan ai pramiska ba, pat tnata alkaia brin daukras sa lika apia, upla tila nani luki ba baku; sakuna yawan wal witin ai kupia alki takaski brisa; kan witin brin daukras upla kumi kra tanis tiwbia, kuna upla sut ai daukanka saura wina ai kupia lakbia.

Param Marikanka 2:21

Witin ra sans yâri ai kupia lakaia, sakuna swin daukras sa witin ai rugka lâka ba wina.

Param Marikanka 3:20

Kaiks, yang dur ra kingbisna; ya yang bîli baikra wali dur ba kwâkbia kaka, ai watla ra dimi witin wal plun pimna.