Pura wina brit sin yabram, plun dauki kan ba dakakaia dukiara, bara diranka daskaia dukiara walpa wina lî yabram. Ba ningkara sin witin nani ra wiram yabaia tasbaya ra wih tasba ba bribia.
Moses bara Eran wal, upla nani ba wina taki Dawan wal aisaia tintka watla dimaika ra wih buan. Bahara witin nani ai lal makupan ban ai mawan tasba kat kangban. Bara Dawan prana ba latan takan,
—Kîn ba bris, man muihkam Eran sin tâm baikbia, bara upla nani ba asla dauks. Baha ningkara, upla sut mai kaiki ba ra, walpa ba ra aisas lî baha wina takbia, bara kaikma lî ba takbia, bara upla nani ba ai daiwra nani aikuki lî di banhbia.
Sakuna Dawan ba yang ra ai kupia sauhkan, man nani pâtkam dukiara. Bara âu ai wiras kan, yang makabri ba. Ban sakuna, ai win: ‘¡Ba kat aitani! Naha dukiara kau ai aisapara.
