Joel 2:11 - DAWAN BÎLA AISKA

¹¹ Dawan ba, ai uplika kwâra tara ba kainara aimaki, ai bîla baikra ba alwani binka baku yaban walisa. Ai karnika ba tara pali sa, witin ai adarka bîla nani wali dauki nani ba, sip kulki sakras sa. ¡Dawan yua ba nahki tara sa, sibrin tara yua sa! ¿Ya sip sa witin ai mapara buaia?

Joel 2:11 ပူးပေါင်းရင်းမြစ်များ

Lawana Nani 18:14

Witin imyula nani ba ai trisbaya nani baku lulkan; yang waihli nani ba munan turwi plapan.

Lawana Nani 46:6

Nisan nani bin tara daukisa, king tasbaya nani ba tatatwisa, tasba ba slilwisa ai bîla baikra saki ba waluya ba ra.

Lawana Nani 68:18

Gâd, man purara uli watma upla nani priski brih muni, lal mana sakram upla nani wina; bara man mampara babura nani sut ba, Dawan, man ra bawan.

Aiseya 13:4

Kwâra tara winanka walisa, il nani tilara; upla ailal bâra baku sa. Nisan nani kârma binka ba walisa upla ailal aidrubi asla takan nani ba wina, karnika sut bri Dawanka kli laki kaikisa ai dakni ba aiklabaia ridi takan ba.

Aiseya 42:13

Dawan bal takbia pura lalura tara baku, bara war aiklaklabra lapta baku, aiklabia ai bîla baikra tara ni, ai waihla nani pura lubia, karna takbia sin.

Aiseya 7:18

Baha piua ra Dawan ba mita kukas nani baku yaka balbia, baha nani Idsip awalka ra laihura iwi nani ba ra. Asiria tasbaya ra iwi nani ra lika nasma yula nani baku yaka balbia.

Jirimaya 25:30

“Jirimaya, man bui yang nini ra naha sturka nani na witin nani ra wis: ‘Dawan ba pura wina alwani baku ai bîla baikra ba blikisa, ai iwaika holikira iwi ba wina. Ai sîpka nani ba mapara winisa wain tataibra nani wini ba baku, tasba ra upla nani iwi ba sin mapara.

Jirimaya 30:7

¡Trabil saura piua kum baila aula, baha yua pâtka sât kau takras! Jekob uplika nani sarka piua kum, sakuna yang bui witin nani swaki sakamna.

Jirimaya 50:34

Sakuna witin ra swaki sasakra ba sip pali sa, ai nina ba Dawan karnika sut brisa. Kasakka lâka ba witin mita daukbia; kupia kumi lâka ba ai uplika nani kuntrika ra yabia, bara sirang tara iwaia ba Babilon uplika nani ra yabia.”

Isikiel 22:14

Lukpara man sip kama yang maipara buaia, mampara wapnikam daukaia buamna ba ra; yang Dawan, baku wisni bamna daukamna:

Joel 1:15

¡Dawan ai warkka daukaia yua ba, pat baila pali sa! ¡Yua saura pali kabia, sauhki tikanka tara kabia upla nani purara, Dawan karnika tara bri ba mita baha ba brih aula bamna!

Joel 1:6

Kan kruhkru nani ba, aiklaklabra karnakira nani daknika tara baku, ai napa nani ba layan napa baku, napa yarika ba layan mairin kum napa baku, tawanka ba kutban sa.

Joel 2:1

Saion ilka purara man nani trumpit ba puhbi bas; Dawan ilka holikira ba purara, man nani bin tara dauks, Juda ra iwi nani ba sut tatatwi kabia, kan Dawan yua aula ba, pat baila sa bamna:

Joel 2:2

tihmia tara bara mukus nani yua, kasbrika nani bara dista yua. Suldiar karnakira daknika tara kum unta nani purara bal iwan sa, lalma kahbi ingnika ba baku sa. Baha sât dukia takan upla kau kaikras kan, kli baku sin takka kaikbia apia, diara kum talika baku sin apia.

Joel 2:25

“Yang bui man nani mampara kruhkru nani blikri rau mai sauhki banhwaia dukiara, kruhkru daknika tara, klala maikaia blikri ba tâka, man nani namsla bîla wina mâ nani sakras kapram ba, baha mana aiska sut yang kli mai aibapamna.

Joel 2:31

Dawan yua tara sibrinkira aula ba, kau balras ba kainara lapta ingnika ba tihmia tara man takbia, bara kati ba sin, pauni tala baku takbia.”

Joel 3:14

Upla ailal bâra sa Dawan ai kupia wal lâ daukan ba ilka bîla ra, kan pat baila sa Dawan yua ba.

Joel 3:16

Jerusalem Saion ilka ba wina Dawan aisabia bîla baikra ba alwani binka baku walbia, bara kasbrika tasba sin mahka tatatwi kabia. Sakuna Dawan ba ai uplika nani, Israel luhpia nani ba, yukuwaika kan kahbaika ban kabia.

Emus 1:2

Jerusalem, Saion ilka ba wina, Dawan ai bîla baikra bin tara alwani binka baku aisisa ba ra, tasba nani ra twi painkira pâwi ba srawisa, Carmelo ilka bahna ra twi nani ba sin sut lâwisa.

Emus 5:18

¡Sarkam pali ai daukisa, man nani Dawan yua balka kaikan pali mai dauki ba! ¿Tânka brisma ki baha yua ra man nani ra dîa takaia ba? Baha yua ra yu ingnika ba lika lap tiwbia, tihmia tara baman kabia.

Emus 5:20

Dawan yua ba ingni âpu, tihmia tara pali baman kabia; wan nakra baikan baku kabia, ingni kumi pan kaikras.

Abdías 1:15

Upla wala nani ra dîa daukram ba, man sin baku mai daukbia. ¡Dîa daukram ba mana kulki maikan kabia! “Dawan ai warkka nisan nani sut mapara daukaia yua pat baila sa.

Nahum 1:6

¿Witin ai kupia baiki lawi ba mapara ya sip sa ki bapi buaia? Ai kupia baikuya laptika ba, pauta klauhan baku laiwisa, bamna walpa tara nani ba baiwi lilak wal taki, witin ai mawanra, walpa tara nani ba lilak pîs wâl ra baiwisa.

Malaquía 3:2

Sakuna, ¿baha yua ba ya bui takaskbia? ¿Ya ban bûi kabia? Witin pauta klauhi baku balbia, angki klin wan sakaia, sup baku wan tâskika nani ba sikbi sakaia dukiara aula.

Kulki Kaikanka 24:23

Baha ningkara kli naha dahra na aisin: “¡Alai! ¿Ya kau raya kabia ni Gâd naha diara nani sut dauki ba ra?

1 Tesalonaika 4:16

Kan Dawan pali ba sika bîla baikra karnakira ba wal kasbrika pura ba wina bal iwbia arkinsal bîla baikra wal bara Gâd trumpitka wal sin. Bâra mika, Kraist ra kasak luki pruan nani ba, pas tâura bubia;

Param Marikanka 18:8

Baha tâwan, yu kumi bilara ai pâtka tara nani ba balbia: prura, sari, bara plun wahwan; witin ba pauta ni angkan kabia. Kan Dawan Gâd, witinka ra lâka dauki ba, karnakira sa.”

Param Marikanka 6:17

Kan lawanka tara yua ba balan sa, ¿bara ya baha mapara ban buaia sip kabia ki?”