Jirimaya 32:44 - DAWAN BÎLA AISKA

⁴⁴ Tasbaya ba witin nani atkbia ba ra, atkan wauhkataya nani ulban ba sîl prakan ba witnis nani ai nina ulban ba sin kaikbia. Baha baku takbia Benjamín tasbaya ra, Jerusalem kir bara Juda tawanka nani ba sut, il nani tasbaya ba twi langni nani ba sut, Négueb tawanka nani ba, yang daukamna baha uplika nani sut kli tawi balaia. Yang, Dawan, kasak aisisna.”

Jirimaya 32:44 ပူးပေါင်းရင်းမြစ်များ

Aiseya 44:26

Sakuna yang duki dadaukra aisan ba, yabri daukisa bara bâk saki briri uplika ba lukanka nani ba pain baman takbia. Yang param sakisna, Jerusalem ba kli upla iwan kabia, bara Juda tawanka nani ra sin. Yang daukamni, kli bukan kabia slingwanka nani ba wina.

Jirimaya 13:19

Négueb tawanka nani ba waihla mita kutban sa; upla kumi sin sip bahak luras sa. Juda uplika nani ba tasba wala ra brih wan, upla sut brih wan.

Jirimaya 17:26

Juda tawanka nani Jerusalem kir ra bâra ba wina upla nani balbia, Benjamín tasbaya wina sin, il kuntrika nani Négueb ra bâra ba wina sut. Daiwan nani tempel ra bri balbia aiska angkaia, bara sakripais wala nani daukaia plun nani prisantka sin, bara dus mâka ba ra tingki wiaia prisantka nani sin.

Jirimaya 30:18

Dawan aisisa: “Jekob nisanka tasbaya ba kli yabamna, ai kuntrika ba ra luki kupi swapni takbia; tawan nani slingwanka ba purara kli paskbia, utla tara nani ba watlika kat mâkbia.

Jirimaya 30:3

yua nani ba aula bamna baha yua ra upliki nani Israel Juda wal ba iwanka ba kli tawi wala ra lakamni. Yang, Dawan, kasak aisisna. Yang daukamna witin nani ai damika nani ra ai tasbaya prapati baku yabri ba ra kli tawi waia.”

Jirimaya 31:23

Dawan karnika sut bri ba, Israel Gâdka bila wisa: “Yang Juda uplika yamnika ba aihka daukamna ba ra, witin nani kli ai tasbaya ra balbia bara ai tawanka nani ra kli wibia: ‘¡Dawan yamni munbia naha ilka holikira ra kasakka lâka dauki ba!’

Jirimaya 32:37

Tawanka uplika nani ba kli asla daukisna, yang kupi baiwan, yang lawri bara yang lawanki tara ra kuntri nani ra yakabri ba wina, yang daukamna witin nani kli bal baha tasbaya ra ai âuyapah iwi kaia.

Jirimaya 33:11

lilia dauki lawana nani aiwani ba, ai maya pliki aiwani ba, bara aisi kaka walbia: ‘Man nani bui Dawan karnika sut bri ba ra tingki wis, Dawan ba yamni sa bamna, witin latwan wan kaiki ba ban sa.’ Witin nani ai prisantka nani ai tingkika lâka ra tempel ra bri balbia. Âu, yang baha kuntrika uplika nani kli bri balamna, bara witin nani kli blasi kata ba baku bâra kabia. Yang, Dawan, kasak aisisna.”

Jirimaya 33:13

Il nani tilara tasba langni nani ra, Négueb ra, Benjamín tasbaya ra, Jerusalem kir bara Juda tawanka nani sut ra sin, sepad nani ba kli bal ai sîpka nani ba kulki kaiki kabia. Yang, Dawan ba, baha aisisni.”

Jirimaya 33:26

Jekob kiamka nani bara duki dadaukra Debit ba sip lulki swimna apia, Ebraham, Aisak, Jekob kiamka nani tila wina pura aimaki kaia wihtka ba sakras swimna apia. Witin nani ra luki kupi swapni lâka kli brimni, bara diara sut witin nani ra yamni takaia daukamni.”

Jirimaya 33:7

Juda uplika nani Israel luhpia nani ba kli bri balamna, bara blasi witin nani nahki pain kan ba kli baku kaia daukamna.

Abdías 1:19

Israel luhpia nani Négueb wina bal, Isau ilka tasbaya nani ba bribia; bara twi langnika tasbaya ra iwi nani ba bal filisteo nani tasbaya ba alki bribia. Israel luhpia nani Efraín tasbaya Sameria sin alki bribia; bara Benjamín lika Galaad tasbaya alki bribia.

Abdías 1:20

Israel luhpia nani priski brih wan kan ba wina kli balan nani ba bal Kenan wina Sarepta kat ai tasbaya piarkika ba ban alki bribia. Jerusalem wina priski brih wan kan nani Sefarad ra bâra ba, baha nani sin bal Négueb tawanka tara nani ba alki bribia.

Sofonías 2:7

Juda uplika nani baha yua pâtka ra pruras swak takan kabia nani ba, Dawan ai Gâdka, witin nani tâwan aimaki balbia bara ai kuntrika ba bribia, bara piua yamni ra witin nani dimbia. Bara bahara ai daiwra daknika nani ba kaiki tihmia ra Ascalón watla nani ra dimi yapi kabia.

Sakaraya 7:7

¿Naha pali bîla nani na apia, patitara prapitka nani kan ba mita, aisi kan ba, Jerusalem ra upla ailal ai âuyapah iwi kan ba piua ra, tawan nani ai tnaya kir ba sin, Négueb tawanka nani ra, tawan lupia nani ra upla ailal iwi kan ba piua ra?