26 Yang bui witin nani ba man wal kakaira daukri, bara kau sin baku dauki kamna, bara baku mika latwan ai kaikisma lâka ba witin nani kupia ra kabia, bara yang pali sin witin nani wal asla kumi kamna.”
Jisas pana win: —Ani uplika latwan ai kaiki ba, dîa aisisna ba kat wali daukisa, bara Aisiki mita latwan kaikbia, bamna yang Aisiki wal bal baha uplika ra takaskamna.
Nanara man nani ba albiki nani mai wiras sni, kan alba ba ai dawanka dîa dauki ba kaikras. Bamna man nani ba upliki nani mai wisna, kan Aisiki dîa dîa ai win ba sut man nani ra param mamrikri bamna.
Bamna yang wal asla ban banhwi bas, yang sin man nani wal asla ban sna ba baku. Tnawa kumi ai kiwka ra apia sa kaka, witin yakan sip ai mâ sakras sa; baha sim natka ra, man nani ba yang wal asla ban apia sma kaka, sip mâ sâkma apia.
Yang mita witin nani ra bara man mita lika yang ra, bara baku mika witin nani ba kumi aihwa pali kabia, bara baha mita tasba uplika nani mita kaikbia man mita ai blikram ba, bara man mita witin nani ra latwan kaikisma, sim yang ra latwan ai kaikisma ba baku.
“Baha nani man mita tasba ra iwi uplika nani tila wina saki, yang ra aikram ba sut ra marikri, man ba ya sma ba. Baha nani ba man dukiam kan, sakuna yang ra aikram, bamna man smalkankam bîla nani ba alki brin.
Ban sakuna, Kraist ba man nani ra raya sa kaka, wînam tara ba saurka mita pruan kabia kra, kuna spiritkam ba lika Gâd kasakkira kulkan ba mita raya kabia.
Sakuna Gâd pali mita man nani ba Kraist Jisas wal asla mai prakan sa, bara baku sin daukan Kraist ba wan sinska lâka kabia, yawan na pâtkas wan kulkan kabia, sunu kaia bara swak takan lâka sin bri kaia.
Yang lika Kraist wal dus prihni ra pruri; baha mita yang apia sika raya sna ba, sakuna Kraist sika yang ra raya iwisa. Bamna wîni tara mapa ra yang raya sna ba lika, Gâd Luhpia ra kasak lukisna ba mita raya sna, witinka yang ra latwan ai kaiki prura mihta ra ban aimakan ba.
Baha mita yawan piua bani Gâd ra mayunisa ai latwanka tara ba dukiara, baha sim latwanka ni yamni wan munan sa, yawan ai Luhpia latwan pali wal asla sa bamna.
Witin nani ra Gâd mita baha yuyaka pranakira ba marikaia want kan, naha yukukanka lâka na sika Ju apia nani ra praki brisa. Bara baha yukukanka ba sika Kraist, man nani ra takaski ba, bara naika briaia bîla kaiki ba tânka kum sa.
Bara nanara kli Grik kaia, apia kaka Ju kaia ba tânka apia sa, Aisa sainka brin, Aisa sainka briras kaia, tringsar kaia, wail baku kaia, pri, apia kaka alba kaia, sakuna Kraist sika diara sut ba, bara witin lika diara sut ra bâra sa.
Wan Dawan Jisas Kraist pali mita bara Gâd wan Aisa, witinka ai yamnika ra latwan wan kaikan ba, ban kaia ra maisa nihkra wankan ba, bara bîla kaikanka yamni kum sin wankan sa,
Ani uplika Gâd lâka nani bîla wali dauki ba, witin lika Gâd wal asla sa, bara Gâd sin witin wal asla sa. Bara naha tânka wal yawan kaikisa yawan ra witin raya iwi ba: Spirit Holikira yawan ra wankan ba mita.