1 Timoti 4:3 - DAWAN BÎLA AISKA

³ Naha uplika nani smalkisa, marit takaia apia bara plun tila nani piaia ba sin saura sa; sakuna Gâd mita naha pata nani na paskan, lalukra nani bara kasak tânka kakaira nani ba witin ra tingki yabi ningkara, pibia dukiara.

1 Timoti 4:3 ပူးပေါင်းရင်းမြစ်များ

Blasi Sturka 9:3

Diara nani sut ai rayaka bri aiawi tauki ba, man nani pi raya kama dukiara paskri sa; dus mâ nani sâtka bani ba, inma kura nani ba sut sin yang bui man nani ra maikri sa.

Smasmalkra 5:18

Yang tânka briri, diara kau yamni ba sika piaia, diaia, bara liliaka briaia warkka ba mana, naha tasba ra, Dawan bui wan piua prahni wankan ba tilara, kan baha sika wan sirka sa.

Daniel 11:37

Naha kingka na ai damika nani gâd nani bri kan ba nani ra kulkras takan, mairin nani ba ni mayuni gâdka nani kumi ra sin apia, kan witin bui lukisa witin ba kau tara sa gâd nani sut ba wal.

Matiu 14:19

Bara adar yan uplika nani ba twi purara iwbia. Baha ningkara, brit matsip bara inska wâl ba ai mihta ra brih, kasbrika purara kaiki, Gâd ra tingki win, britka nani ba kriki, ai disaipilka nani ra yaban, bara witin nani bui upla nani ra yuan.

Matiu 15:11

Upla bîlak dimi dukia ba lika witin ra tâski daukras. Sakuna, upla bîla wina taki ba baha sika witin ra tâski dauki ba.

Matiu 15:36

Bara brit ba, inska nani ba sin brih, Gâd ra tingki yaban. Ningkara bâk kriki, disaipil nani ra yan upla nani ra yuaia. Witin nani baku daukan.

Luk 24:30

Witin nani aikuki pat tibil ra iwi kan ba ra, witin ai mihta ra brit ba brih, yamni muni, kriki, witin nani ra yan.

Jan 6:23

Ban sakuna, Tiberias wina duri tara wala nani sin balan, Dawan ra tingki win ningkara, witin nani brit pin ba pliska lamara.

Apastil Nani Sturka 27:35

Pal baha aisin ningkara, ai mihta ra brit kum bri, Gâd ra tingki wisi, baha nani mawan kat kriki pin.

Roman 14:17

Bamna Gâd King aimaki ba lâka lika piaia, diaia wal tânka apia sa, sakuna baha lika wan rayaka wapni briaia lâka sa, bara kupia kumi lâka bara lilia lâka Spirit Holikira bâk yawan bri ba tânka sika.

Roman 14:3

Bamna ya plun sât sât pi ba mita upla kumi plun tila nani piras sa wisi bahki kulkaia apia sa; bara plun tila nani baman pi uplika ba mita plun sut pi uplika ba lâka aisi daukaia apia sa, kan Gâd mita baha uplika ba pat ai uplika saki brin sa.

Roman 14:6

Bamna upla kumi yua kum aihka saki kulki ba lika, Dawan dukiara sa. Bamna ani uplika plun sâtka sut pi ba, baha sin Dawan mayunaia dukiara pîsa, kan witin mita Gâd ra tingki wisa; bara ani uplika sin plun tila nani piras ba, baha sin Dawan mayunaia dukiara piras sa, bara witin mita sin Gâd ra tingki wisa.

1 Korint 6:13

Upla wala kum bila wibia: “Plun ba wan biara dukia sa, bara wan biara ba plun dukia.” Kasak, sakuna Gâd mita dukia wâlsut ba sauhki tikbia. Upla wîna tara ba tâski lâka daukaia dukiara lika apia sa, sakuna Dawan dukia mika; bara Dawan ba wan wîna tara dukia sa.

1 Korint 7:28

Sakuna marit takuma kaka, man saurka kumi sin daukras sma; bara tukta mairin kum marit takbia kaka, witin sin saurka kumi sin daukras sa. Sakuna marit taki uplika nani ba tani trabil nani bribia, bara naha trabilka nani bri ba yang want apia sna.

1 Korint 8:8

Ban sakuna, plun ba mita Gâd lama pali ra lika wan brih wabia apia; bamna yawan na plun pibia ba mita kau pain nani lika takbia apia, bara plun piras ba mita kau saura nani sin takbia apia.

Kolosi 2:16

Bamna, upla kumi mita sin yarka lâmka aisi daukbiara, plun pisma, apia kaka diara disma ba dukiara, lilia yua nani kulkaia dukiara kra, kati raya, apia kaka ris yua nani sin dukiara.

Kolosi 3:17

Dîa dîa daukma, apia kaka aisama ba sut, Dawan Jisas nina ra dauki bas. Witinka bâk Gâd wan Aisa ra tingki wi bas.

1 Timoti 2:4

kan witin want sa, upla sut ba swaki sakan kabia, kasak tânka ba sin witin nani kakaira taki banhbia.

1 Timoti 4:4

Diara nani sut Gâd mita paskan ba lika pain baman sa; diara kumi sin yawan saura kulkaia apia sa, sakuna sut ba Gâd ra tingki wih piaia sa,

1 Timoti 5:14

Baha mita, yang want sna piarka nani kau almuk takras ba, marit takbia bara luhpa baikbia, ai watla nani main kaiki kabia, bara baku mika witin nani mita wan waihla nani ra wan ninara saura aisaia sanska yabaia apia dukiara.

Hibru Nani 13:4

Upla sut mita marit lâka ba pain pali kulki kabia, bara marit waitna nani ba ai maya mairin wal sunu kasak kaia sa. Marit takras si tâski lâka dauki nani ba bara marit lâka sasauhkra nani ba sin, Gâd mita lâka daukbia.

Hibru Nani 13:9

Smalkanka sât aihka nani bara tringsar nani mita yarka yabal kasak ba wina mai brih wabiara. Wan sulka nani ba Gâd kupia yamnika lâka ba karnika bribia ba kau pain sa, plun lâka nani bîla wali daukaia ba wal; baha nani naha lâka nani bîla wali dauki banhwi na wina hilp kumi sin briras sa.

1 Samuil 9:13

Man nani bâra wama ba wal, witin ba pliks, sakripais daukaia watla ra plun piaia kau waras ba ra. Upla nani plun ba pibia apia witin wabia ba kat, kan witin mita pata ba yamni munisa, baha daukbia ba ningkara paiwan uplika nani ba sin pibia. Bara nanara pali man nani mahka was, witin kau bâra kaka wal prawaia sip sma.