Ululahu Samuel 17:44 - Buka Blahi Ka Cheke Holo

⁴⁴ Mae Golia ne eha eghu tei ka mae Devet, “Mei sagho! Iara ginauna snakre lao nafnahimu iagho na ka nanghaji nei ka glepo te tautagu are eghu mala ghamu reꞌe.”

Ululahu Samuel 17:44 ပူးပေါင်းရင်းမြစ်များ

Proveb 18:12

Jame mae te fahaehaghe te pala hagheni nanghagna thegna, ke leghu na ginauna krofu pari. Iagho theome naba te hata nangha biꞌo na jame te theome kulu nhaꞌa fapari nigho themu na.

Profet Esikiel 28:2

“Maegna ka nauthoglu. Cheke ranghini mae funei gna Taea iara Lord God te cheke igne: Iagho kaisei mae fahaehaghe fara cheke eghui, ‘Iara jateula kaisei god eghu, eghuteuna iara gnokro ka chea ka nogu nolaghi, aheva thongna te faligoho ghau iara. “ ‘Nu neuba iagho ne cheke eghu, iara jateula kaisei god eghu sia neu, iagho kaisei maemu ka nauthoglu igne kolho, eghuteuna iagho theome kaisei god.

Profet Jeremaea 9:23

Lord ne cheke eghu, “Ihei te lalase na thosei fahaehagheni nogna glalase na. Eghuteuna ihei te nheta na thosei fahaehagheni nogna nanheta na. Eghuteuna ihei te dedei na thosei fahaehagheni nogna dedei na.

Ululahu Samuel 17:46

Gognarogne, Lord ginauna snakre mei nigho iagho ka khamegu iara. Iara ginauna falehe nigho iagho, eghuteuna iara ginauna kusu phaꞌumu iagho na. Eghuteuna iara ginauna snakre lao thinimi ghotilo mae Filistia are ka nanghaji nei ka glepo te tautagu are eghu mala ghamu reꞌe. Aonu naikno te gnafare ginauna laseni te God na reireghini Israel.

Thakle 19:17

Ke leghu na iara ne filoni kaisei engel kegra neu ke kligna naprai. Mana ne eha eghu fabiꞌo ka nanghaji te flalo tafri teu ka maloa re, “Khapru mei ka nogna gaghamu biꞌo God igne!

Ululahu Samuel 14:12

Aonu mare ne eha eghu tei ka phiamare, “Ei! Mei si ghopa! Ghehati magnahaghei ghami ghopa te lasedi keha glepo agne!” Mae Jonatan ne cheke eghu ka mae soldia majaghani igne, “Keli fara, mei sagho ke leghugu iara. Lord na lisa meidihi ka khameda tahati maeda Israel.”

Fapea Samuel 21:10

Aonu Rispa hata pohe tiatifa te diꞌare ne lisei lao ke kligna thina biꞌo rhegna te au thinidi fitu mae te lehe igre. Eghuteuna naꞌa au fabrahu jare funu ka narane te funu ukli bali mare na ghilei posa ka narane te funu nakhete na. Ka narane na naꞌa brue nanghaji, eghuteuna bongiro na, naꞌa brue khuma mata. Naugna naꞌa theome magnahaghedi glepo igre te mei ghamu thinidi fitu mae igre.

Profet Jeremaea 34:20

Eghume, iara ginauna lilisei ghami ghotilo ke pari gna nodi nolaghi hatimare mae naoka mae iheire te magnahaghei falehe ghami ghotilo igre. Eghuteuna thinimi ghotilore ginauna mala ghamu ghedi saroko nei khuma mata.