Ululahu Kronikols 24:6 - Buka Blahi Ka Cheke Holo

⁶ Eghuteuna mae Semaea thugna mae Netanel, kaisei mae Livaet, mana ne rioriso soru nanghadi hatimare mae lida teke vavahi mare igre. King Devet baludi nogna mae biꞌore, nei Pris Sadok, nei Pris Ahimelek thugna mae Abiata, nei hatimare mae biꞌo ka tharaknadi hatimare mae pris nei ka hatimare mae Livaet, mare te gnafa na kafe filoni nei laseni eghu glepo igne.

Ululahu Kronikols 24:6 ပူးပေါင်းရင်းမြစ်များ

Ululahu Kronikols 18:16

Mae Sadok thugna Ahitub ghe mae Ahimelek thugna mae Abiata, phiamae igre mae pris. Eghuteuna mae Savsa gne mae mala rioriso soru nogna cheke king re.

Matiu 13:52

Aonu mae Jisas neke cheke eghu ka mare, “Hatimare mae velepuhigna vetula nogna mae Moses gre au fari hoteidi naikno God te funei frunidire. Mare jateula mae khoto suga te hata fajifla glepo te majaghani ba glepo te tiatifa ka nogna chogho te au nogna glepo te keli ra eghu.”

Matiu 8:19

Kaisei mae velepuhigna vetula nogna mae Moses ne mei ne cheke eghu ka mana, “Mae velepuhi, iara magnahaghei te mala kaisei nou mae fanomho iagho, mala tei balumu iagho ka namono aheva nate tei iagho na.”

Nehemaea 8:1

Kate namo thoke ka fafitu nhigra ka finogha igne, vikegna Israel igne neke au fakeli ka nodi namonore. Ka narane tuana naiknore ne mei Jerusalem ne khapru ka glalaba biꞌo ke ulugna Grengatha Mala Hata Khoꞌu igne. Mare ne kilo meini Pris Esra, mae ihei te mae velepuhigna Vetula teke cheke mei God ka mae Moses mala leghuni naiknodi Israel, eghuteuna mare toreni mae Esra mala hata mei buka gna Vetula igne.

Esra 7:6

Pris Esra neke pulo mei funu Babilonia. Mana kaisei mae velepuhi te laseni fara Vetula teke tusu lao Lord nodi God mae Israel ka mae Moses tifa ia. Ka fafitu finogha te funei fruni King Atasekses Pesia igne, Esra neke tarabana kaisei tothoghei biꞌo gna Israel mala batudi ke pulo Jerusalem. Naugna Lord nogna God mana igne fablahini mana, gobigna lepo te toredi mana ka king re, king igne tusu lao ngala ka mana. Ka tothoghei igne, au mae pris nei mae Livaet, nei mae kwaea, nei mae greireghi, nei mae gloku, mae igre mala loku ka Sugablahi.

Fapea Kronikols 34:13

mare te bosidi mae gloku ka soasopaigna nafnata gloku. Eghuteuna keha mae re mala rioriso soru ka buka eidi gloku igre. Eghuteuna keha re mala reireghi grengathagna Sugablahi na.

Ululahu Kronikols 23:24

Igre nanghadi mae biꞌodi teke tharaknagna nei vikegna teku mae Livae re. Nogna mae gloku king igre neke rioriso soru ka buka nanghadi re, eghuteuna kahadi mae iheire te funu ka varadaki finogha te haghe igre mala loku ka nogna Sugablahi Lord.

Ululahu Kings 4:3

Mae Elihoref ghe mae Ahaeja, phei thugna mae Sisa igre, mae mala reireghigna nogna buka king. Mae Jehosafat thugna mae Ahilud, mae mala rioriso soru chekegna king.

Ululahu Kronikols 24:7

Ka thofno narane gna na mare ne vavahi tothoghei igre: Ulu lahu na nogna tothoghei Pris Jehoearib. Fapea na, nogna tothoghei Pris Jedaea.

Ululahu Kronikols 24:31

Mae biꞌodi tharakna te gnafa nei thabusidi mare te majaghani igre eghu ne lalahu khale mala laseni nodi gloku mae igre jateula te edi mare ka kheradi pris ka tharaknagna mae Eron tifa ra. King Devet, Pris Sadok, Pris Ahimelek, nei mae biꞌo ka tharaknadi hatimare mae pris, nei hatimare mae Livaet, mare te gnafa na ne filoni te lalahu khale mare igne.