Ululahu Korin 14:25 - Buka Blahi Ka Cheke Holo

²⁵ eghuteuna glepo te poru ka nagnafagna mana re ginauna thakle. Mana ginauna tuturupuku soru mala kilo fnaknoni God, eghuteuna mana ginauna cheke eghu, “Tutuani fara, God na au balumi ghotilo!”

Ululahu Korin 14:25 ပူးပေါင်းရင်းမြစ်များ

Profet Isaia 45:14

Nodi dedei biꞌo naiknodi Ijep nei Kus teu igre ginauna mala nou iagho, maedi Seba te brahu igre ginauna mala nou sneka iagho. Mare ginauna babaꞌo chen mala leghu nigho iagho. Mare ginauna tarai pogho soru ka iagho, mare na cheke eghu eha fabiꞌo, ‘Kaisei God ngala te au balumu iagho na, theo kaisei god ahevanga te au na!’ ” Igne chekegna Lord mae ihei te au nolaghi fateote'o na.

Profet Sekaraea 8:23

“Ka narane tuana, nabotho mae phosa te nhogri nodi cheke re ka nauthoglu igne ginauna hata nogna pohe kaisei Jiu, na cheke faheta eghu ka mana, ‘Iagho snakre ghami ghehati mala tei balumi ghotilo Jerusalem, naugna ghehati nomhini God na au balumi ghotilo.’ ”

Thakle 5:8

Eghuteuna kate hata mae Lam pepa na, fati glepo te karha gre baludi hatimare varadaki fati mae biꞌo ka khiloaure mare ne pogho soru ke ulugna mae Lam ne kilo fnaknoni mana. Mare te gnafa na kafe hata gita biꞌo mala koje nei dis teke hohoro ka gol te fodu ka insens. Dis igre nodi tharai iheire te fatutuani ni God re.

Luku 17:16

Mana mei ne tuturupuku ke ulugna mae Jisas ne tegio ka mana. Mae igne theome mae Jiu, nu mae gna Samaria.

Luku 8:28

Eghuteuna kmana fata naitu na mei faheta fara ka mana. Neuba naiknore ne haru ghahegna nei khamegna teure ka phukri, ba lilisei mae mala reireghini, mana tangomana ngala te kukusu phukrire. Eghuteuna naitu na ne kuru teini mana mala au ka namono nagou na. Kate filoni mae Jisas na, mana eha eghu fabiꞌo ne tuturupuku ke ulugna mae Jisas. Jisas ne cheke faheta ka naitu na mala jifla mei ka mana. Aonu mae igne ne eha eghu fabiꞌo, “Sei, Jisas, Thugna God te nolaghi! Ba, na faꞌunha ghau iara sagho ia? Iara tore nigho mala thosei goigoni ghau iara!”

Luku 5:8

Mae Simon Pita filoni igne ne pogho soru ke ulugna mae Jisas ne cheke eghu ka mana, “Lord, thosei mei namo ka iara, naugna iara naikno diꞌa.”

Profet Isaia 60:14

Thudi iheire teke para ghami fara ghotilo ra ginauna mei fafnakno ghami ghotilo, eghuteuna mare ginauna mei pogho soru pari ke ulumi ghotilo. Iheire teke filo fapari ghami ghotilo tifa ra ginauna mei tuturupuku ke ulumi ghotilo. Eghuteuna naiknore ginauna cheke eghu, ‘Tutuani fara, mare ginauna kiloni namono biꞌo Saion igne nogna namono Lord mae ihei te blahi fara, nodi God mae Israel.’

Nodi Khoje Hatimare Mae Jiu 72:11

Te keli fara na jame hatimare mae king te gnafa igre mei tufru soru ke ulugna mana. Eghuteuna naikno te gnafa ka kantri fateote'o igre mala loku ranghini mana.

Diutronomi 9:18

“Eghuteuna iara ne khoko sukha pari ka glose na ne tarai ke ulugna Lord nabagna phiatutu narane nei phiatutu bongi, iara theome ghamu nei theome koꞌu. Iara eni igne naugna ghotilo neke eni nakhibo biꞌo ranghini Lord neke ghilei diꞌatagna fara mana.

Jenesis 44:14

Kate pulo mei mae Juda baludi mae tahigna re ka sugagna mae Josep na, mae Josep au neu ngala jare. Mare mhaghu nodi fara ne pogho soru pari ke ulugna mae Josep.

Thakle 19:4

Aonu varadaki fati mae biꞌo ka khiloaure baludi fati glepo te karha igre, mare turupuku ne pogho soru ka God mae ihei te gnokro teu ka nogna sape nafnakno na. Eghuteuna mare ne cheke eghu, “Amen! Tahati cheke fakelini God!”

Profet Daniel 2:47

Mana ne cheke eghu ka mae Daniel, “Tutuani fara, nou God iagho igne haghe fara salaꞌudi keha god te gnafa te tufru sorudi ghehati igre. Mana nodi Lord hatimare mae king te gnafa igre. Eigna Mana tangomana te fakakhana gaoghathodi gobigna lepo te poru ka iara igre. Gognarona iara laseni igne, naugna iagho la rurutha la thofno glola fakeli ka iara.”

Jone 4:19

Gaꞌase na ne cheke eghu ka mana, “Mae biꞌo, iara ao la filo glani nigho nga, iagho kaisei mae profet!

Mae Khuru 4:13

Hatimare mae biꞌo re ne jaglo nodi kate filodi mae Pita ghe mae Jone te theome mhaghu kate cheke ke uludi mare na. Mare lasedi phei mae igre neke theome tei sikoluni u glalase na, phiamare au kolho ka namono. Nu kate filoni te theome mhaghu phei mae igre na, mare neke ghatho fapuloni phei mae igre neke tei tafri balugna mae Jisas.

Ululahu Samuel 9:19

Mae Samuel ne cheke eghu ka mana, “Iara ngala mae khaekae na. Ghopa age ke ulugu iara ka vido blahi ana. Ghopa ginauna ghamu balugu iara gognarogne. Eghuteuna hamerane nathuꞌu, iara ginauna cheke balumu iagho eidi gobigna lepo te magnahaghei lasedi iagho re, eghuteuna iara ginauna nake kuru tei nigho iagho.