Ululahu Kings 8:36 - Buka Blahi Ka Cheke Holo

³⁶ Jame te eghuna, neuba iagho ne au neu kligna, fanomho mei ka nodi tharai naikno gre. Hata fadelei nakhibodi nou naikno Israel igre. Farirhiudi ka puhi te doglo, eghuteuna snakre mei nakhete ka vido glose teke tusu lao iagho ka nou naiknore mala au fabrahu tagna.

Ululahu Kings 8:36 ပူးပေါင်းရင်းမြစ်များ

Nodi Khoje Hatimare Mae Jiu 27:11

Lord, farirhiu ghau puhimu iagho na eghuteuna iara ginauna na leghu nigho iagho. Bara fothi ghau, naugna nogu naoka iara gre kmana fara.

Ululahu Samuel 12:23

Eghuteuna te iara na, iara ginauna tarai fabrahu ghami ghotilo. Jame te theome eni iara igne na, iara khibo ranghini Lord. Leuleghu fata na, iara ginauna farirhiu ghami ghotilo ka puhi te keli nei doglo eghu.

Profet Jeremaea 6:16

Lord ne cheke eghu ka nogna naiknore, “Ghotilo ghaoghatho fakeli mala laseni nabrou aheva nate leghuni ghotilo na. Ghotilo mala filoni famane nabrou teke leghuni mae kuꞌeda tifa ra. Eghuteuna ghotilo mala jaola leghuni nabrou igne. Jame te eni ghotilo igne na, ghotilo ginauna na au fakeli nei na au ka pharikeli ka nakarhami na.” Nu ghotilo tiromi neke cheke eghu, “Theo! Ghehati theome magnahaghei te leghuni nabrou te keli igne!

Profet Jeremaea 14:22

Ba, nodi god mae bongihehe igre au nolaghi te mala snakre mei nakhete ka ghehati na? Ba, maloa thegna kolho te au nolaghi te mala snakre mei nakhete ka ghehati na? Thono theo fara! Lord nomi God, kaisei iagho kolho te tangomana na. Ghehati fatutuani nigho iagho kolho, naugna iagho kolho te tangomana te edi gobigna lepore.

Nodi Khoje Hatimare Mae Jiu 94:12

Lord God, mae ihei te tusu lao iagho nou cheke na tagna nei farirhiuni nou famane farirhiu iagho re tagna teuna, mana keli tagna fara.

Ululahu Kings 18:45

Eghuteuna theome raugha, gromno igne ne thafru ka maloa na, eghuteuna nuri na ne funu ghaghafa mei, aonu nakhete biꞌo na ne soru mei funu kligna. Eghume King Ehab ne saghe ka nogna chariot na neke pulo Jesrel.

Ululahu Kings 18:1

Ka fatilo finogha te theome nakhete igre, Lord ne cheke eghu ka profet Elija. “Iagho tei filoni King Ehab. Eigna iara ginauna na theome raugha na kuru meini nakhete na.”

Matiu 22:16

Mare kurudi keha nodi mae fanomho thedire, nei keha mae ka tothoghei te kiloi Herodias. Aonu mae igre mei ne cheke eghu ka mana, “Mae velepuhi, ghehati lase nigho iagho kaisei mae doglo fara. Ghehati lase nigho iagho kaisei mae te farirhiu unha te tutuani eigna puhigna God. Iagho theome mhaghudi unha te cheke eimu iagho naiknore. Naikno te kmanare kaisei nanaba ngala ka iagho.

Profet Maeka 4:2

Kmana naikno ginauna mei cheke eghu, “Mei, tahati na kafe haghe ka nogna thogele Lord, nogna God mae Jekop. Uve, tahati na ari mala pogho soruni mana ka Sugablahi na. Eghuteuna Lord ginauna farirhiu ghita mala leghuni tahati puhigna mana na.” Uve, mana ginauna eni igne, naugna chekegna Lord na ginauna jifla mei Jerusalem, eghuteuna mana ginauna farirhiudi naiknore puhigna mana heva heva.

Profet Jeremaea 42:3

Iagho toreni Lord nou God mala falalase ka tahati unha nabrou nate leghuni tahati na, nei unha te magnahaghei nei eni teu tahati na.”

Profet Isaia 35:8

Kaisei nabrou biꞌo ginauna au ka namono igne, eghuteuna mare ginauna kiloni nabrou igne, nogna Nabrou Blahi Lord. Naikno te diꞌa nei naikno te fameomekro teu ra, ginauna theome leghuni nabrou igne, nu iheire te leghuni kolho puhi te keli na nate tangomana te leghuni nogna Nabrou Blahi Lord.

Profet Isaia 30:21

Neuba ghotilo ne figri fei mairi ba fei nheta, ghotilo ginauna tangomana te nomhini naoglagna mana te cheke eghu mei ke leghumi na, “Igne nogu nabrou iara na. Leghuni!”

Nodi Khoje Hatimare Mae Jiu 143:8

Ka hamerane di gre cheke mei sagho mala ghathoni iara nou namha biꞌo iagho na, naugna iagho ngala te rouronu nigho iara na. Leuleghu fata ngala iara te tarai ari ka iagho na. Falalase mei sagho ranghi ghau iara u nabrou te mala leghuni iara na.

Nodi Khoje Hatimare Mae Jiu 119:33

Lord God, falase ranghi ghau gaoghathodi nou vetula iagho gre mala leghu fabrahudi iara.

Nodi Khoje Hatimare Mae Jiu 86:11

Lord God, farirhiu mei ghau glepo te magnahaghedi iagho te mala edi iara re, mala leghudi iara thofno chekemu iagho re. Uve, togho ghau iara sagho mala thofno keli tagu iara te mala ghatho tahu nigho na.

Nodi Khoje Hatimare Mae Jiu 68:9

God, iagho neke snakre meini nakhete biꞌo na mala soru ka nou glose teke diꞌa na mala ke keli fapulo.

Nodi Khoje Hatimare Mae Jiu 32:8

Lord ne cheke eghu, “Iara ginauna na farirhiu ka iagho puhi te keli te mala leghuni iagho na. Iara ginauna na tusu ari gaoghatho te keli ka iagho eghuteuna iara na reireghi nigho iagho.

Nodi Khoje Hatimare Mae Jiu 25:12

Lord, ihei te leghudi nou cheke iagho re, iagho ginauna falalase ka mana nabrou te keli te mala leghuni mana na.

Nodi Khoje Hatimare Mae Jiu 25:8

Naugna Lord na mae doglo nei mae keli eghu, mana farirhiudi naikno te diꞌa re mala leghuni puhigna mana na.

Nodi Khoje Hatimare Mae Jiu 5:8

Lord, nogu naoka iara gre thono kmana fara. Eghume iara magnahaghei nigho iagho te bara fothi ghau ka mae iheire te magnahaghei mei goigoni ghau iara igre. Batudi ghahegu gre mala leghuni iara u puhimu iagho te doglo na. Falalase ranghi ghau u nabrou te magnahaghei iagho te mala leghuni iara na.

Ululahu Kings 18:41

Profet Elija ne cheke eghu ka King Ehab, “Iagho faghose tei ghamu nei koꞌu eghu, naugna iara la nomhinihi naogla gna nakhete biꞌo na ginauna mei.”

Nodi Khoje Hatimare Mae Jiu 119:133

Thosei snakre ghau mala tapla jafra iara ka nakhibo. Uve, iagho eni igne eigna iagho neke nhaꞌa chekenihi.

Nodi Khoje Hatimare Mae Jiu 68:10

Nou naikno iagho re neke hohoro nodi namono jare ka glose tuana, eigna puhimu iagho na ne thofno keli fara ne faghedi gano fabrahu naikno te kuma re.

Profet Joel 2:23

Ghotilo naiknomi ka namono Saion! Ghotilo gleale'a ka unha teke edi iara nomi Lord nei nomi God, iara eni igne mala togho ghami ghotilo. Ka narane te joꞌu ghotilo na, iara na snakre mei nakhete mala karha gano te joꞌu ghotilo ka nagare ra, jateula teke eni iara ka ghotilo tifa ia eghu.